ភ្នំពេញ៖អង្គការខុមហ្វ្រែល(COMFREL)បានចេញរបាយការណ៍ដោយបង្ហាញថារាជរដ្ឋាភិបាលដឹកនាំដោយគណបក្សប្រជាជនកម្ពុជា(CPP)សម្រេចពេញលេញក្នុងការអនុវត្តគោលនយោបាយចំនួន៦ចំណុចក្នុងចំណោម១៦ចំណុច។ទោះបីយ៉ាងណាអ្នកនាំពាក្យគណបក្សកាន់អំណាចច្រានចោលរបាយការណ៍អង្កេតនេះដោយចាត់ទុកថាមិនឆ្លុះបញ្ជាំងការពិត។
របាយការណ៍របស់អង្គការខុមហ្វ្រែលបានបង្ហាញថារាជរដ្ឋាភិបាលដឹកនាំដោយគណបក្សប្រជាជនកម្ពុជា(CPP)សម្រេចពេញលេញក្នុងការអនុវត្តគោលនយោបាយចំនួន៦ចំណុចនិងសម្រេចបានខ្លះមាន៦ចំណុចនិង៤ចំណុចទៀតមិនសម្រេចបានឬសម្រេចបានតិចតួច។
ក្នុងគោលនយោបាយទាំង១៦ចំណុចនេះ រាជរដ្ឋាភិបាលធ្វើឲ្យមានកំណើនសេដ្ឋកិច្ច៧ភាគរយក្នុងរយៈពេលមួយឆ្នាំនិងកាត់បន្ថយភាពក្រីក្រក្នុងអត្រា១ភាគរយក្នុងមួយឆ្នាំ បញ្ឈប់ផ្តល់សម្បទានដីសេដ្ឋកិច្ច បានកសាងគោលនយោបាយជាតិស្តីពីលំនៅដ្ឋាន ការរៀបចំគោលនយោបាយដឹកជញ្ជូនទីក្រុងនិងការបង្កើតគោលនយោបាយជាតិស្តីពីមុខរបរនិងការងារ។
ចំណែកគោលនយោបាយចំនួន៦ចំណុចទៀតរាជរដ្ឋាភិបាលអនុវត្តនិងសម្រេចបានខ្លះគឺការនាំអង្ករឲ្យបាន១លានតោន ការរក្សាផ្ទៃនេសាទទឹកសាប ការចំបញ្ជីដីធ្លី ប្រជាពលរដ្ឋទទួលបានសេវាទឹកស្អាត ការពង្រីកការផ្គត់ផ្គងអគ្គីសនីពីបណ្តាញជាតិដល់ភូមិនិងគោលដៅទេសចរណ៍ពីក្រៅប្រទេសឆ្នាំ២០១៨។
ទោះបីជាយ៉ាងណាគោលនយោបាយចំនួន៤ចំណុច រាជរដ្ឋាភិបាលបានអនុវត្តដោយមិនសម្រេចឬសម្រេចដែរតែតិចតូចទៅតាមការសន្យារបស់ខ្លួនដូចជាគោលនយោបាយរក្សាផ្ទៃដីគ្របដណ្តប់ដោយព្រៃឈើ ការកែលម្អផ្លូវលំជនបទពី៣០០ទៅ៤០០គីឡូម៉ែត្រក្នុងមួយឆ្នាំ ការបន្តកសាងអនុវិទ្យាល័យគ្រប់ឃុំនិងការសាកឲ្យដំណើរការរបបប្រាក់សោធននិវត្តន៍សម្រាប់កម្មករនិយោជិតក្នុងវិស័យឯកជន។
លោក កន សាវាង្ស អ្នកសម្រប់សម្រួលផ្នែកអង្កេតរបស់អង្គការគណៈកម្មាធិការដើម្បីការបោះ ឆ្នោតដោយសេរីនិងយុត្តិធម៌នៅកម្ពុជា(Comfrel)ទទូចថា រាជរដ្ឋាភិបាលត្រូវខិតខំប្រឹងប្រែងអនុវត្តឲ្យពេញលេញចំពោះគោលនយោបាយរបស់ខ្លួនដែលបានដាក់ចេញដើម្បីបំពេញបំណងរបស់ម្ចាស់ឆ្នោត។ លោក កនសាវាង្សទទូចទៀតថារាជរដ្ឋាភិបាលត្រូវពង្រឹងលើវិស័យអាទិភាពដូចជាវិស័យសុខាភិបាលនិងហេដ្ឋារចនាសម្ព័ន្ធក្នុងការបង្កើនជីវភាពប្រជាពលរដ្ឋប្រចាំថ្ងៃ។
លោក កន សាវាង្ស៖«រដ្ឋាភិបាលត្រូវពង្រឹងអំពីគោលនយោបាយដែលខ្លួនដាក់ចេញព្រោះធម្មតាកាលណារបស់ខ្លួនដាក់ចេញត្រូវអនុវត្តក្នុងនោះយើងមានដូចជាវិស័យសុខាភិបាល ទាក់ទងរឿងហេដ្ឋារចនាសម្ព័ន្ធផ្លូវថ្នល់។»
ក្នុងចំណោមគោលនយោបាយនេះរាជរដ្ឋាភិបាលមិនសម្រេចក្នុងការកសាងអនុវិទ្យាល័យឲ្យបានគ្រប់ឃុំដែលធ្លាប់សន្យាកាលពីឆ្នាំ២០១៦។មិនបានសម្រេចគោលនយោបាយនេះព្រោះអនុវិទ្យាល័យថយចុះចំនួន៦ដែលទំនងមកពីការពង្រីក អនុវិទ្យាល័យទៅជាវិទ្យាល័យ។
យោងតាមរបាយការណ៍របស់អង្គការខមហ្វ្រែល(COMFREL) ការផ្តល់ពន្ទុសម្រាប់ឆ្នាំទី៤លើគោលនយោបាយគ្មានសូចនាករច្បាស់លាស់ដោយមានប្រជាជន២១៤នាក់ក្នុងចំនួន១០រាជធានីខេត្តដែលចូលរួមផ្តល់ពិន្ទុ។ក្នុងនោះប្រជាជន១៧ភាគរយពេញចិត្ត ៦០ភាគរយពេញចិត្តខ្លះនិង២២ភាគរយមិនពេញចិត្តនឹងលទ្ធផលការបំពេញនិងអនុវត្តគោលនយោបាយទាំងអស់នោះ។
ក្នុងរយៈពេល៣ឆ្នាំចុងក្រោយនេះការអនុវត្តគោលនយោបាយរបស់រាជរដ្ឋាភិបាលត្រូវបានប្រជាពលរដ្ឋផ្តល់ពិន្ទុពេញចិត្តខ្លះកើនឡើងរហូតដល់៦០ភាគរយចាប់ពីឆ្នាំ២០១៥រហូតដល់ឆ្នាំ២០១៧ខណៈឆ្នាំ២០១៤ប្រជាពលរដ្ឋផ្តល់ពិន្ទុពេញចិត្តខ្លះមានត្រឹម៣៨ភាគរយប៉ុន្តែចាប់ពីឆ្នាំ២០១៦និងឆ្នាំ២០១៧មិនបានកើនឡើងនោះទេ។ផ្ទុយទៅវិញក្រុមប្រជាពលរដ្ឋផ្តល់ពិន្ទុពេញចិត្តនឹងគោលនយោបាយរដ្ឋាភិបាលបានធ្លាក់ចុះហើយការផ្តល់ពិន្ទុមិនពេញចិត្តជាមួយគោលនយោបាយកើនទៅវិញ។
លោក សុខ ឥសាន អ្នកនាំពាក្យគណបក្សប្រជាជនកម្ពុជាបានច្រានចោលរបាយការណ៍នេះដោយចាត់ទុកថាមិនឆ្លើយតបនឹងស្ថានភាពពិតនៃការរីកចម្រើនលើគ្រប់វិស័យរបស់រាជរដ្ឋាភិបាលនៅពេលបច្ចុប្បន្ននេះ។
លោក សុខ ឥសាន៖«ការវាយតម្លៃទោះបីវិជ្ជមានខ្លះហើយនឹងមិនវិជ្ជមានយ៉ាងណាក៏ដោយគឺយើងមិនយកចិត្តទុកដាក់ទេបាទព្រោះបញ្ហាសំខាន់មិនចំណុះទៅការវាយតម្លៃទេបញ្ហាសំខាន់ជាកត្តាកំណត់វាចំណុះទៅនិងការរីករីកចម្រើនសមទ្ធិផលនានាដែលកើតឡើងព្រោងព្រៀតនៅទូទាំងប្រទេសកម្ពុជាហើយផ្សារភ្ជាប់ទៅនឹងផលប្រយោជន៍របស់ជាតិនិងប្រជាពលរដ្ឋយើង។»
ក្នុងរបាយការណ៍សង្ខេបរបស់ខុមហ្វ្រែលនេះឲ្យដឹងថាថវិកាជាតិគ្រោងនឹងចំណាយឆ្នាំ២០១៧ជាង៥ពាន់លានដុល្លារអាមេរិកកើនឡើង១៥ភាគរយបើធៀបទៅនឹងឆ្នាំ២០១៦។ថវិកាជាតិចំណាយនេះទៅលើវិស័យសង្គមកិច្ច២៨ភាគរយ សេដ្ឋកិច្ច២៦ភាគរយពោលគឺធ្លាក់ចុះ៣ភាគរយបើធៀបទៅនឹងឆ្នាំមុ។
ថវិការចំណាយឆ្នាំ២០១៧កើនឡើង១ភាគរយចំពោះវិស័យការពារជាតិសន្តិសុខនិងសណ្តាប់ធ្នាប់សាធារណៈ១៧ភាគរយ វិស័យរដ្ឋបាលទូទៅ១០ភាគរយនិងការចំណាយមិនទាន់បែងចែក១៧ភាគរយនៃថវិកាជាតិសរុប។
រាជរដ្ឋាភិបាលនីតិកាលទី៥ដឹកនាំដោយគណបក្សកាន់អំណាចកំពុងអនុវត្តគោលនយោបាយ៤វិស័យធំៗ។ក្នុងនោះ៖ទី១ ការពារជាតិសន្តិសុខនិងសណ្តាប់ធ្នាប់សាធារណៈ ទី២ ការពង្រឹងរដ្ឋបាលសាធារណៈដូចជាវិមជ្ឈការនិងវិសហមជ្ឈការ ការពង្រឹងផ្នែកច្បាប់និងប្រព័ន្ធយុត្តិធម៌និងការប្រឆាំងអំពើពុករលួយ ទី៣ការអភិវឌ្ឍសេដ្ឋកិច្ចនិងចុងក្រោយការអភិវឌ្ឍន៍វិស័យអប់រំសុខាភិបាល ការងារវប្បធម៌និងសង្គមកិច្ចអស់រយៈពេល៤ឆ្នាំមកហើយ៕
