ភ្នំពេញ ៖ រដ្ឋបាលថ្នាក់ក្រោមជាតិ នៃខេត្ដព្រះវិហារ មន្ទីរបរិស្ថាន និងប្រជាសហគមន៍ សហការជាមួយអង្គការសមាគមអភិវរក្សសត្វព្រៃ (WCS) បានបញ្ចប់ការបោះបង្គោលព្រំប្រទល់ តំបន់បេតិកភណ្ឌធម្មជាតិភ្នំត្បែង ដោយធ្វើបានរួចរាល់ហើយ។ នេះបើយោងតាមសេចក្ដីប្រកាសព័ត៌មានរបស់អង្គការ WCS ដែលមណ្ឌលព័ត៌មានស្ដ្រីកម្ពុជា ទទួលបាននៅថ្ងៃទី២២ ខែកុម្ភៈនេះ។
លោក លៀ ស៊ីណា រាយការណ៍ ៖
លោក អេង ម៉េងអ៊ី មន្ត្រីផ្នែកទំនាក់ទំនងរបស់អង្គការសមាគមអភិរក្សសត្វព្រៃ WCS បានឲ្យវិទ្យុស្ដ្រីដឹងថា ការបោះបង្គោលព្រំប្រទល់នេះ គឺមានគោលបំណងផ្ដល់ភាពងាយស្រួលដល់មន្ដ្រីឧទ្យានុរក្ស ក្នុងការចុះបំពេញការងារដើរល្បាតព្រៃ នៅក្នុងតំបន់បេតិកភណ្ឌធម្មជាតិភ្នំត្បែង និងជាពិសេស គឺការចុះអនុវត្ដច្បាប់ដើម្បីការពារព្រៃឈើ និងសត្វព្រៃក្នុងតំបន់នេះ។
លោក អេង ម៉េងអ៊ី ៖«គោលបំណងសំខាន់ យើងចង់ឲ្យមានព្រំប្រទល់ច្បាស់លាស់ មានន័យថា ភ្នំត្បែងហ្នឹងជាតំបន់បេតិកភណ្ឌធម្មជាតិ ជាតំបន់ការពារអញ្ចឹង។ ការបោះបង្គោលហ្នឹងគឺជួយទី១ ឲ្យប្រជាជនដឹងថា ព្រំប្រទល់ត្រឹមណាតំបន់ការពារ ហើយមួយទៀតមន្ដ្រីឧទ្យានុរក្សគាត់ងាយស្រួលក្នុងការដើរល្បាត គាត់មានព្រំប្រទល់ច្បាស់លាស់ តំបន់កន្លែងណាគាត់ត្រូវធ្វើការដើរល្បាត ហើយមួយទៀតងាយស្រួលក្នុងការអនុវត្ដច្បាប់ ប្រសិនបើមានបទល្មើស តើវាស្ថិតនៅក្រៅឬក្នុង ដោយយើងមើលបង្គោលហ្នឹងអាចដឹង»។
បង្គោលព្រំប្រទល់តំបន់បេតិកភណ្ឌធម្មជាតិភ្នំត្បែង ត្រូវបោះបង្គោលជាស៊ីម៉ង់ចំនួន ៤០ដើម នៅតាមទីតាំងសំខាន់ៗ មួយនចំនួនក្នុងតំបន់នេះ។ សកម្មភាពបោះបង្គោលនេះ គឺទទួលបានថវិការគាំទ្រពីម្ចាស់ជំនួយ Rainforest Trust។ មុនពេលដែលចាប់ផ្ដើមបោះបង្គោល អាជ្ញាធខេត្ដព្រះវិហារ រួមមាន មន្ដ្រីមន្ទីរបរិស្ថាន អភិបាលស្រុក និងមេឃុំ បានរៀបចំកម្មវិធីអប់រំផ្សព្វផ្សាយដល់ប្រជាពលរដ្ឋក្នុងតំបន់បេតិកភណ្ឌធម្មជាតិភ្នំត្បែង ឲ្យបានយល់កាន់តែច្បាស់ពីមូលហេតុនៃការកំណត់ព្រំប្រទល់អភិរក្ស និងទីតាំងហាមឃាត់ផងដែរ។
លោក អ៊ា សុខា ប្រធានមន្ទីរបរិស្ថានខេត្ដព្រះវិហារ បាននិយាយថា ការបញ្ចប់ ការងារបោះបង្គោលព្រំប្រទល់នេះ គឺជាជំហ៊ានដំបូង ក្នុងការបង្កើតផែនការអភិរក្សតំបន់នេះ ហើយវា នឹងជួយឲ្យប្រជាសហគមន៍បានដឹងអំពីទីតាំងព្រំប្រទល់ការពារ ព្រមទាំងផ្ដល់ជាមូលដ្ឋានសម្រាប់ ការរៀបចំផែនការដើរល្បាតរបស់មន្ដ្រីឧទ្យានុរក្ស។
បន្ថែមពីនេះលោកបន្ដថា តំបន់បេតិកភណ្ឌធម្មជាតិភ្នំត្បែង គឺជាទីកន្លែងវប្បធម៌ប្រវត្ដិសាស្ដ្រ ដែលប្រជាពលរដ្ឋនៅក្នុងខេត្ដព្រះវិហារ ក៏ដូចជាប្រជាពលរដ្ឋនៅខេត្ដផ្សេងៗទៀត ចាត់ទុកជាកន្លែង ទីសក្ការបូជា និងជាកន្លែងមានសក្កដានុពលសម្រាបវិស័យទេសចរណ៍ធម្មជាតិផងដែរ។
តំបន់បេតិកភណ្ឌធម្មជាតិភ្នំត្បែង គ្របដណ្ដប់លើទំហំផ្ទៃដីប្រមាណ ២ម៉ឺន ៥ពាន់ ២៦៩ហិកតា និងមានរយៈកម្ពស់រហូតដល់ ៤០០ម៉ែត្រ។ ការបោះបង្គោលព្រំប្រទល់នេះ បានចំណាយពេលចំនួន ៥សប្ដាហ៍។ ភ្នំត្បែងត្រូវបានដាក់ជាតំបន់ ការពារធម្មជាតិ នៅក្នុងឆ្នាំ២០១៦ និងជាផ្នែកដ៏សំខាន់មួយនៃអាងស្ដុកទឹក ប៉ែកខាងលើស្ទឹងសែន ដែលជាដៃនៃបឹងទន្លេសាប។
លោក អេង ម៉េងអ៊ី មន្ត្រីផ្នែកទំនាក់ទំនងរបស់អង្គការសមាគមអភិរក្សសត្វព្រៃ បង្ហាញចំណាប់អារម្មណ៍ថា រយៈពេលចុងក្រោយនេះ ប្រជាសហគមន៍មានការយល់ដឹងកាន់តែច្រើន អំពីសារៈសំខាន់ នៃការចូលរួមអភិរក្សព្រៃឈើ និងសត្វព្រៃ។ លោក ម៉េងអ៊ី បន្ដទៀតថា ក្រោយពេលដែលបោះបង្គោលនេះ ក្រុមអ្នកភិរក្សសត្វព្រៃ សហការជាមួយមន្ទីរបរិស្ថានខេត្ដ នឹងរៀងចំដាក់កាម៉េរ៉ាថតរូបស្វ័យប្រវត្ដិ ដើម្បីដឹងកាន់តែច្បាស់ពីប្រភេទសត្វព្រៃ ដែលកំពុងមានវត្ដមានក្នុងតំបន់បេតិកភណ្ឌធម្មជាតិភ្នំត្បែងនេះ៕
