ភ្នំពេញ ៖ សេចក្ដីប្រកាសព័ត៌មានរបស់ក្រសួងការបរទេស និងសហប្រតិបត្ដិការអន្ដរជាតិ នៅថ្ងៃទី២១ ខែកុម្ភៈនេះ បានឲ្យដឹងថា ស្ថានតំណាងកម្ពុជា បានអន្ដរាគមន៍ជួយដល់រដ្ឋខ្មែរចំនួន ១១នាក់ ដែលជួបប្រទេះបញ្ហានៅក្នុងប្រទេសចំនួន០៣។ ប្រទេសទាំងនោះរួមមាន ប្រទេសម៉ាឡេស៊ី សឹង្ហបុរី និងប្រទេសថៃ។
ស្ថានឯអគ្គរាជទូកម្ពុជា ប្រចាំប្រទេសម៉ាឡេស៊ី បានហការជាមួយអាជ្ញាម៉ាឡេស៊ី ដោះស្រាយបញ្ហា និងរៀបចំឲ្យមានការធ្វើមាតុភូមិនិវត្ដន៍ របស់ពលករ ពលការិនីខ្មែរចំនួន ០៨នាក់ មានស្ដ្រី០៥នាក់ និងប្រុស ០៣នាក់ ដែលទៅធ្វើការនៅប្រទេសម៉ាឡេស៊ី បានវិលត្រឡប់មកកម្ពុជាវិញ កាលពីថ្ងៃទី១៧ ខែកុម្ភៈ ឆ្នាំ២០១៨។
ចំណែកនៅប្រទេសសឹង្ហបុរី ស្ថានឯកអគ្គរាជទូតកម្ពុជា បានជួយដល់ស្ដ្រីខ្មែរម្នាក់ ឲ្យបានវិលត្រឡប់មកកម្ពុជាវិញ បន្ទាប់ពីនាង មិនអាចទ្រាំទ្រការងារដែលមានការលំបាក នៅប្រទេសសឹង្ហបុរីបាន។ ស្ដ្រីរូបនេះ មានស្រុកកំណើតនៅខេត្ដកំពង់ធំ មានអាយុ ២៦ឆ្នាំ។ នាងបានមកដល់កម្ពុជា កាលពីថ្ងៃទី១០ ខែកុម្ភៈ ឆ្នាំ២០១៨។
ដោយឡែករហូតមកដល់ថ្ងៃទី២១ ខែកុម្ភៈនេះ ស្ថានអគ្គកុងស៊ុលកម្ពុជា ប្រចាំខេត្ដសាកែវ នៃប្រទេសថៃ បានកំពុងធ្វើអន្ដរាគមន៍តាមផ្លូវច្បាប់ ដើម្បីជួយពលរដ្ឋខ្មែរចំនួន ២នាក់ ដែលត្រូវបានអាជ្ញាធរថៃចាប់ខ្លួន កាលពីថ្ងៃទី១២ ខែកុម្ភៈ ឆ្នាំ២០១៨ ពីបទឆ្លងដែនចូលកាប់ឈើគ្រញូងក្នុងទឹកដីថៃដោយខុសច្បាប់។ ពលរដ្ឋពលខ្មែរទាំង ០២នាក់នេះ ម្នាក់មានស្រុកកំណើតនៅខេត្ដបន្ទាយមានជ័យ និងម្នាក់ទៀតនៅខេត្ដសៀមរាប។ បច្ចុប្បន្នពួកគេកំពុងត្រូវបានឃុំខ្លួនបណ្ដោះអាសន្ននៅប៉ុស្ដិ៍នគរបាលប៉ាងស៊ីដា ប្រទេសថៃ។
យ៉ាងណាពាក់ព័ន្ធករណី មានពលរដ្ឋខ្មែរលួចឆ្លងដែន ចូលទៅកាប់ឈើដោយខុសច្បាប់ នៅប្រទេសជិតខាងនេះ សម្ដេច ស ខេង រដ្ឋមន្ដ្រីក្រសួងមហាផ្ទៃ នៅក្នុងពិធីបិទសន្និបាត បូកសរុបលទ្ធផលការងារប្រចាំឆ្នាំ ២០១៧ និងលើកទិសដៅការងារសម្រាប់ឆ្នាំ២០១៨ កាលពីថ្ងៃទី២៣ ខែមករា ឆ្នាំ២០១៨ នៅក្រុងបាត់ដំបង បានថ្លែងថា ករណីនេះ ប្រសិនបើគ្មានអ្នកទិញ និងនាំពលរដ្ឋខ្មែរ ទៅកាប់ឈើនោះទេ ពលរដ្ឋធម្មតាច្បាស់ជាមិនមានសមត្ថភាពលួចឆ្លងដែនទៅប្រព្រឹត្ដទង្វើល្មើសច្បាប់ទាំងនេះនោះទេ។ សម្ដេច បានប្រាប់មន្ដ្រីក្រោមឱវាទនៅតាមតំបន់ព្រំដែន ត្រូវពង្រឹងការងារនេះឡើងវិញ៕
