ភ្នំពេញ ៖ ករណីពុលស្រាថ្នាំ បានកើតឡើងមួយករណីស្ថិតក្នុងស្រុកទឹកឈូ ខេត្ដកំពត កាលពីថ្ងៃទី១៤ ខែកុម្ភៈ ឆ្នាំ២០១៨។ បុរសពីរនាក់ ដែលបានផឹកស្រាថ្នាំនេះ មានម្នាក់បានស្លាប់ ខណៈកំពុងបញ្ជូនទៅព្យាបាល និងម្នាក់ទៀតកំពុងសម្រាកព្យាបាលនៅប្រទេសវៀតណាម។ សមត្ថកិច្ចបញ្ជាក់ថា មូលហេតុដែលនាំឲ្យពុល ព្រោះតែស្រាថ្នាំនោះ គឺបានត្រាំគ្រាប់ធញ្ញជាតិ ដែលមានសារធាតុពុល។
លោក លៀ ស៊ីណា រាយការណ៍ ៖
បុរសពីរនាក់នេះ រស់នៅក្នុងឃុំកំពង់គ្រែង ស្រុកទឹកឈូ ខេត្ដកំពត ម្នាក់ឈ្មោះ សំ វណ្ណា អាយុ ៥៩ឆ្នាំ និងម្នាក់ទៀតឈ្មោះ ហ៊ួត អាយុជិត ៥០ឆ្នាំ បានពុលស្រាថ្នាំ ផ្សំពីសំបកឈើ និងគ្រាប់ធញ្ញជាតិ ដែលមានសារធាតុពុល។ បុរសទាំងពីរនាក់នេះ ម្នាក់ស្លាប់ខណៈកំពុងបញ្ជូនចេញពីមន្ទីរពេទ្យខេត្ដកំពត ទៅកាន់ប្រទេសវៀតណាម និងម្នាក់ទៀតត្រូវបានបញ្ជូនទៅសង្គ្រោះទាន់ពេល កំពុងសម្រាកព្យាបាលនៅក្នុងមន្ទីរពេទ្យមួយកន្លែងនៅប្រទេសវៀតណាម។
លោក ហេង យ៉ាន់ ជំទប់ទី១ ឃុំកំពង់គ្រែង បានប្រាប់វិទ្យុស្ដ្រីអហេ្វអឹម១០២ នៅថ្ងៃទី១៥ ខែកុម្ភៈ នេះថា លោកមិនទាន់បានទៅដល់កន្លែងកើតហេតុនៅឡើយទេ ប៉ុន្ដែតាមព័ត៌មានដែលលោកទទួលបាន គឺបុរសទាំងពីរនាក់នេះ បានផឹកស្រាថ្នាំនោះ ហើយពុលពិតមែន។ ក៏ប៉ុន្ដែសម្រាប់រូបលោកផ្ទាល់ មិនទាន់បានដឹងច្បាស់នៅឡើយទេ ថា បុរសទាំងពីរនាក់ខាងលើនោះ ពុលស្រាថ្នាំ ឬក៏ពុលសាច់ ឆ្កែ។
ជុំវិញករណីនេះ លោកអធិការរងស្រុកទឹកឈូ លោក សូ ប៊ុនធឿន បានប្រាប់ឲ្យដឹងថា ជនរងគ្រោះទាំងពីររូប នេះ គឺពុលស្រា ដែលដាក់ត្រាំជាមួយថ្នាំ ផ្សំឡើងដោយសំបក និងគ្រាប់ធញ្ញជាតិចំនួន ០៥មុខ។ លោកបន្ដថា បុរសទាំងពីរនាក់ខាងលើនេះ បានទិញស្រាថ្នាំពីគ្រូលក់ថ្នាំខ្មែរម្នាក់យកមកផឹក បរិភោគជាមួយសាច់ឆ្កែ។ ក្រោយពីបុរសទាំងពីរនាក់នេះ បានផឹកស្រាថ្នាំអស់ប្រមាណពីរ បី ពែងក្នុងម្នាក់ៗ ស្រាប់តែពួកគេមានអាការៈទន់ដៃ ទន់ជើង តែងម្ដង។ លោកអធិការរង បន្ដទៀតថា បើយោងតាមការសាកសួរ គ្រូថ្នាំខ្មែរ ថ្នាំដែលលក់ឲ្យជនរងគ្រោះទាំងពីរនាក់នេះ គឺមានសារធាតុពុល។ គ្រូថ្នាំខ្មែរនោះ បានប្រាប់ទៅជនរងគ្រោះ ឲ្យត្រាំថ្នាំនោះក្នុងស្រារយៈពេលមួយ ៧ថ្ងៃ (មួយសប្ដាហ៍) ឬ ១០ថ្ងៃ ជាមុនសិន ដើម្បីបន្សាប។ ក៏ប៉ុន្ដែបុរសពីរនាក់ ខាងលើបានត្រាំស្រាត្រឹមតែ ១ម៉ោងប៉ុណ្ណោះ ហើយក៏ផឹក ទើបបណ្ដាលឲ្យពួកគេពុលដូច្នេះ។
លោក សូ ប៊ុនធឿន ៖«គ្រូផ្សំថ្នាំហ្នឹងគាត់បានយកថ្នាំមកលក់ឲ្យជនរងគ្រោះ គាត់បានប្រាប់ថា ថ្នាំហ្នឹងវាមានជាតិពុល បើត្រាំអស់រយៈពេលមួយអាទិត្យទៅ ១០ថ្ងៃ ទើបវាកាត់ជាតិពុលហ្នឹងបាត់ តែបើយើងហូបក្នុងអំឡុងពេលភ្លាមៗហ្នឹងវាអាចនឹងពុល ប៉ុន្ដែអ្នករងគ្រោះហ្នឹង គាត់មិនអនុវត្ដតាមគ្រូផ្សំថ្នាំហ្នឹង»។
យោងតាមការឲ្យដឹងពីសមត្ថកិច្ច អ្នកលក់ថ្នាំខ្មែររូបនោះមានឈ្មោះថា អ៊ឹង ឈាន់ ហៅ កៅ ភេទប្រុសអាយុ ៥១ឆ្នាំ រស់នៅក្នុងភូមិ ឃុំជាមួយបុរសពីររូបនេះដែរ។ គាត់កំពុងត្រូវបានអាជ្ញាធរបន្ដការសាកសួរ។
ជុំវិញបញ្ហានេះអ្នកស្រី គីម មួយ ភរិយាលោក សំ វណ្ណា ដែលជាជនរងគ្រោះបានស្លាប់ក្នុងករណីពុលស្រានេះ បានប្រាប់ឲ្យដឹងថា កាលពីថ្ងៃម្សិលមិញអ្នកស្រីបានធ្វើដំណើរមករាជធានីភ្នំពេញ ដោយស្វាមី និងកូនប្រុសពៅរបស់អ្នកស្រី នៅចាំផ្ទះ។ អ្នកស្រីបន្ដថា ប្ដីរបស់អ្នកស្រីបានទិញ ថ្នាំហ៊ឺត ពីគ្រូខ្មែរ ដើម្បីយកមកត្រាំស្រាទុកផឹក ពីនាក់មិត្ដភក្ដិរបស់គាត់។ ថ្នាំនោះត្រូវបានទិញពីពេលព្រឹកថ្ងៃទី១៤ ខែកុម្ភៈ លុះល្ងាចឡើងទើបលោក សំ វណ្ណា ប្ដីអ្នកស្រីបានយកស្រានោះមកផឹក ក្រោយពីផឹកបានម្នាក់ពីរ បី ពែង ស្រាបតែប្ដីរបស់អ្នកស្រី និងមិត្ដរបស់គាត់ មានអាការទន់ដៃ ទន់ជើង និយាយសម្ដីស្ដាប់មិនបានតែម្ដង។
អ្នកស្រី គីម មួយ ៖«ដោយសារតែម្សិលមិញខ្ញុំអត់នៅដែរ ខ្ញុំទៅភ្នំពេញ ខ្ញុំមកអត់ទាន់ដង្ហើមគាត់ផង ពេលអ្នកហូបជាមួយគាត់ និងកូនៗនៅផ្ទះឃើញថា គាត់ញាំស្រាហ្នឹងហើយស្រាប់តែ ទន់យកហ្មង ញាំហើយលើកដៃអត់រួចទេ ញ័រហ្មង ហើយនិយាយសម្ដី (ស្ដាប់មិនបាន)»។
ពាក់ព័ន្ធ ករណីពុលស្រានេះដែរ ក្រសួងសុខាភិបាល ធ្លាប់បានអំពាវនាវកាលពីដើមខែកុម្ភៈ កន្លងទៅនេះ សុំឲ្យប្រជាពលរដ្ឋកុំបរិភោគស្រាដែលមិនមានការត្រួតពិនិត្យត្រឹមត្រូវពីក្រសួងសុខាភិបាល ឬអាជ្ញាធរ។ តែបើក្នុងករណីពលរដ្ឋមានតម្រូវការស្រា សូមឲ្យពិនិត្យឲ្យបានជាក់លាក់ជាមុនសិន។
គួរជម្រាបថា បើយោងតាមទិន្នន័យ របស់ក្រសួងសុខាភិបាល ករណីពុលស្រា បានឲ្យដឹងថា ក្នុងឆ្នាំ២០១៥ ករណី ពុលស្រា មានចំនួន ២៨៤ករណី ហើយបង្កឲ្យមនុស្សស្លាប់ចំនួន ៣៣នាក់ ដែលកើតឡើងនៅខេត្ដចំនួន០៣ គឺខេត្ដត្បូងឃ្មុំ ក្រចេះ និងខេត្ដមណ្ឌលគិរី។ ដោយឡែកសម្រាប់ឆ្នាំ២០១៦ ករណី ការពុលស្រា បានកើតឡើងចំនួន ៩២ករណី បង្កឲ្យមនុស្សស្លាប់ចំនួន ១៥នាក់ ស្ថិតនៅក្នុងខេត្ដកំពង់ឆ្នាំ។ ចំណែកឆ្នាំ២០១៧ ករណី ពុលស្រាបានកើតឡើងចំនួន ១៣ករណី ហើយបង្កមនុស្សស្លាប់ចំនួន ២នាក់ ស្ថិតក្នុងខេត្ដមណ្ឌគិរី៕
