ភ្នំពេញ ៖ អតីតអ្នករាយការណ៍ព័ត៌មាន ២រូប ឲ្យវិទ្យុអាសេរី ផ្សាយជាខេមរៈភាសា ដែលត្រូវបានអាជ្ញាធរ កម្ពុជា ចោទប្រកាន់ ពីបទចារកម្ម បានស្ថិតនៅក្នុងការឃុំខ្លួន រយៈពេល ៣ខែ មកហើយ។ ជនត្រូវចោទទាំង២រូបនេះ ម្នាក់ឈ្មោះ អួន ឈិន និង យាង សុ ជាមេត្តា។ ករណីពួកគេនេះ ធ្វើឱ្យ កម្ពជារងការរិះគន់ថា ប្រើប្រព័ន្ធច្បាប់ដើម្បីបំបិទសេរីភាពបញ្ចេញមតិនិងសារព័ត៌មាននៅកម្ពុជា។ ដូចករណីនេះ យ៉ាងតិចអង្គការអន្ដរជាតិចំនួន ០៤ រួមនឹងអង្គការសារព័ត៌មានក្នុងស្រុកមួយបានទាមទារឲ្យដោះលែងពួកគេ មានសេរីភាពឡើងវិញ។
លោក លៀ ស៊ីណា ជូនសេចក្ដីរាយការណ៍ ៖
អង្គការអន្ដរជាតិទាំងនោះរួមមាន អង្គការអ្នករាយការណ៍ព័ត៌មានគ្មានព្រំដែន (RSF) គណៈកម្មការ ការពារអ្នកសារព័ត៌មាន (CPJ) សម្ព័ន្ធអ្នកសារព័ត៌មានអាស៊ីអាគ្នេយ៍ (SEAPA) ក្លឹបអ្នកសារព័ត៌មាននៅក្រៅប្រទេស (OPCC) រួមនឹងមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) ។ សេចក្ដីថ្លែងការណ៍ របស់អង្គការទាំងនេះ បានរៀបរាប់ថា ការចាប់ខ្លួន និងចោទប្រកាន់ ទៅលើអតីតអ្នកសារព័ត៌មានអាស៊ីសេរី ទាំងពីរ រូបនេះ គឺធ្វើឲ្យប៉ះពាល់ និងរំលោភរដ្ឋធម្មនុញ្ញ កម្ពុជា ដែលចែងអំពី សិទ្ធិសេរីភាព សារព័ត៌មាន។
សេចក្ដីថ្លែងការណ៍ បានបន្ដទៀតថា ការប្រើប្រាស់ក្រមព្រហ្មទណ្ឌ និងមាត្រា ៤៤៥ នៃច្បាប់នេះ គឺជា ការបំពានរួចទៅហើយ ទៅលើសេរីភាពសារព័ត៌មាននៅកម្ពុជា ។ តាមមាត្រានេះ ពួកគាត់ប្រឈមមុខ ការផ្ដន្ទាទៅសចំនួន ១៥ឆ្នាំ។ សេចក្ដីថ្លែងការណ៍បានបន្ដថា ការប្រើប្រាស់ប្រព័ន្ធតុលាការ និងក្រមព្រហ្មទណ្ឌ ទៅលើអ្នកសារព័ត៌មានទាំងពីររូបនេះ កើតឡើងចំពេលដែលរដ្ឋាភិបាលបង្ក្រាបប្រព័ន្ធផ្សព្វផ្សាយ រិះគន់រដ្ឋាភិបាល។
Daniel Bastard ប្រធានអង្គការអ្នកសារព័ត៌មានគ្មានព្រំដែន ប្រចាំតំបន់អាស៊ីប៉ាស៊ីហ្វិក បានសម្ដែងការព្រួយបារម្ភយ៉ាងខ្លាំង ចំពោះអ្នកសារព័ត៌មានមួយចំនួនទៀត ដែលប្រើប្រាស់វិជ្ជាជីវៈរបស់ខ្លួនដោយឯករាជ្យ ។
ក្នុងបទសម្ភាសន៍ខ្លីមួយ ជាមួយវិទ្យុស្ដ្រីអេហ្វអឹម១០២ លោក គឹម សន្ដិភាព អ្នកនាំពាក្យក្រសួងយុត្ដិធម៌ មានប្រសាសន៍ថា ករណីអតីតអ្នកសារព័ត៌មានវិទ្យុអាស៊ីសេរីទាំងពីររូបនេះ គឺជាការអនុវត្ដច្បាប់របស់កម្ពុជា។ លោកបញ្ជាក់ថា សេចក្ដីថ្លែងការណ៍ទាំងឡាយរបស់អង្គការផ្សេងៗ គឺជារូបភាពមួយដែលពួកគេប្រើប្រាស់សិទ្ធិរបស់ពួកគេតែប៉ុណ្ណោះ។ តែលោកថា ករណីរបស់ជនត្រូវចោទទាំងពីរនេះ អាស្រ័យទៅលើការស៊ើបអង្កេតរបស់តុលាការ។
លោក គឹម សន្ដិភាព៖«សម្រាប់ការដែលអង្គការសង្គមស៊ីវិល ឬអ្នកណាមួយនិយាយអំពីបញ្ហា មិនមានភស្ដុតាងឬមិនមានអ្វីនោះ គឺសូមបញ្ជាក់ថា ភស្ដុតាង ឬមិនភស្ដុតាងនោះគឺវាអាស្រ័យទៅលើច្បាប់ បើច្បាប់កំណត់ថា អំពើណាមួយវាជាភស្ដុតាងដាក់បន្ទុកសម្រាប់ការដាក់បន្ទុកនៃអំពើនោះហើយ ហ្នឹងច្បាប់ជាអ្នកថា តុលាការជាអ្នកស្វែងរក អញ្ចឹងសុំទុកភារកិច្ចនេះ ជូនទៅខាងសមត្ថកិច្ចរបស់តុលាការដើម្បីធ្វើការពិនិត្យស្រាវជ្រាវ»។
ចំពោះការរិះគន់ថា ប្រព័ន្ធផ្សព្វផ្សាយរបស់កម្ពុជា ស្ថិតក្នុងស្ថានភាពគួរឲ្យព្រួយបារម្ភដែលជាការលើកឡើងរបស់ ប្រធានអង្គការអ្នកសារព័ត៌មានគ្មានព្រំដែន ប្រចាំតំបន់អាស៊ីប៉ាស៊ីហ្វិក លោក អ៊ុក គឹមសេង អ្នកនាំពាក្យក្រសួងព័ត៌មាន មិនទទួលស្គាល់ការរិះគន់នេះទេ ។ លោកថា សិទ្ធិសេរីភាពសារព័ត៌មាននៅកម្ពុជា នៅតែទូលំទូលាយ ហើយគ្មានអ្នកសារព័ត៌ណាម្នាក់ត្រូវបានចាប់ខ្លួនដោយសារតែការសរសេរអត្ថបទប្រកបដោយវិជ្ជាជីវៈនោះទេ។
លោក អ៊ុក គឹមសេង៖«ដូចជាករណីអ្នកពីរនៅអាស៊ីសេរីអញ្ចឹង ជារឿងរបស់គាត់មួយដោយឡែក គាត់ប្រព្រឹត្ដល្មើសច្បាប់ក្នុងប្រទេសមួយមានអធិបតេយ្យភាពអញ្ចឹងហើយ គាត់មិនដែលយកឧបទ្ទវហេតុ ជាក់លាក់ណាមួយមកនិយាយទេ គាត់និយាយរួមរស់ អញ្ចឹងខ្ញុំសូមវាយតម្លៃថា វាជារឿងដដែលៗទេ ចំពោះក្រសួងព័ត៌មានមិនភ្ញាក់ផ្អើលចំពោះរបាយការណ៍របស់គាត់ហ្នឹងទេ»។
យ៉ាងណាក៏ដោយអង្គការអ្នកសារព័ត៌មានគ្មានព្រំដែន បានចាត់ចំណាត់ថ្នាក់ សេរីភាពសារព័ត៌មាននៅកម្ពុជា លេខ ១៣២ ក្នុងចំណោម ១៨០ប្រទេស នៃរបាយការណ៍សេរីភាពសារព័ត៌មានពិភពលោកប្រចាំ ២០១៧ ។ អង្គការនេះ បានព្យាករណ៍ថា ប្រទេសកម្ពុជា ទំនងនឹងធ្លាក់ចុះសេរីភាពសារព័ត៌មានបន្ថែមទៀតនៅឆ្នាំក្រោយ៕
