ភ្នំពេញ ៖ សាលារាជធានីបានចេញសេចក្ដីណែនាំ ស្ដីពីអំពីការហាមប្រាម ការដុតផាវ កាំជ្រួច ឬបង្កឲ្យមានសំឡេងផ្ទុះគ្រប់ប្រភេទ ជាពិសេស គឺហាមដាច់ខាតចំពោះការលេងល្បែងស៊ីសងគ្រប់ប្រភេទ និងការហែក្បូនផ្សេងៗ ដែលគ្មានការអនុញ្ញាត។ បន្ថែមពីនេះ គ្រប់អង្គភាព ស្ថាប័ន និងសាធារណជនទាំងអស់ ត្រូវប្រុងប្រយ័ត្នឲ្យបានខ្ពស់ចំពោះការដុតធូប ទៀន ឬ ក្រដាសសែន ហើយជាពិសេសសាលារាជធានី មិនអនុញ្ញាត ដាច់ខាតចំពោះការយកចិញ្ចើមផ្លូវ ឬទ្រូងផ្លូវសាធារណៈ ជាកន្លែងដុតធូប ទៀន និងក្រដាសសែនផ្សេងៗ។
សេចក្ដីណែនាំរបស់សាលារាជធានីភ្នំពេញ ដែលផ្សព្វផ្សាយកាលពីថ្ងៃទី០៨ ខែកុម្ភៈ ម្សិលមិញ បានបញ្ជាក់ដូចនេះ ដោយប្រាប់ទៅកាន់ មន្ទីរ អង្គភាព ខណ្ឌ សង្កាត់ សមាគម ក្រុមហ៊ុនឯកជន អង្គការក្រៅរដ្ឋាភិបាល និងសាធារណជនទាំងអស់ដែលរស់នៅក្នុងរាជធានីភ្នំពេញ។
លើសពីនេះ សាលារាជធានី បានបញ្ជាឲ្យអាជ្ញាធរ មានសមត្ថកិច្ចគ្រប់លំដាប់ថ្នាក់ ចាប់ពីថ្ងៃទី០៨ កុម្ភៈ តទៅ ត្រូវតែចាត់វិធានការឲ្យបានម៉ឺងម៉ាត់បំផុត គឺមិនត្រូវឲ្យមានការនាំចូលផាវ កាំជ្រួច ឬសារធាតុផ្ទុះគ្រប់ប្រភេទតាមច្រកចូលរាជធានីភ្នំពេញ ហើយត្រូវត្រួតពិនិត្យដកហូតរវត្ថុទាំអស់នេះ ពីគ្រប់កន្លែងលក់ក្នុងរាជធានីភ្នំពេញ ជាពិសេសត្រូវអនុវត្ដតាមសេចក្ដីណែនាំនេះឲ្យមានប្រសិទ្ធភាពខ្ពស់បំផុត។ ជាមួយគ្នានេះសាលារាជធានីភ្នំពេញ ក៏បានអំពាវនាវផងដែរ ដល់មន្ទីរធម្មការ និងសាសនារាជធានីភ្នំពេញ ត្រូវអញ្ញើញបណ្ដាសមាគមចិន និងវៀតណាម ដើម្បីផ្សព្វផ្សាយឲ្យបានដឹងនូវខ្លឹមសារខាងលើនេះ។
ទន្ទឹមនឹងនេះ សាលារាជធានីភ្នំពេញព្រមាន ចាត់វិធានការផ្លូវច្បាប់ចំពោះជនទាំងឡាយណាដែលបំពានលើសេចក្ដីណែនាំ ឬប្រព្រឹត្ដល្មើស បង្កឲ្យមានចលាចលក្នុងសង្គម បាត់បង់សណ្ដាប់ធ្នាប់ សន្ដិសុខ សុវត្ថិភាព និងរបៀបរៀបរយសាធារណៈ ក្នុងឱកាសពិធីបុណ្យចូលឆ្នាំចិន និងវៀតណាម ដែលប្រព្រឹត្ដទៅក្នុងថ្ងៃទី១៥ ដល់ថ្ងៃទី១៨ កុម្ភៈនេះ៕
