ភ្នំពេញ៖ ដើម្បីធានាសន្ដិសុខ សុវត្ថិភាព សណ្ដាប់ធ្នាប់សាធារណៈជូនគណបក្សនយោបាយទាំងអស់ឱ្យបានល្អប្រសើរ និងដើម្បី ជៀសវាងការកកស្ទៈចរាចរដែលរំខានដល់ការធ្វើដំណើររបស់ប្រជាពលរដ្ឋ ក៏ដូចជាភ្ញៀវជាតិ និងអន្ដរជាតិ គ.ជ.ប នឹងសហការជាមួយអភិបាលរាជធានីភ្នំពេញធ្វើការហាមឃាត់ផ្លូវ និងទីសាធារណៈមួយចំនួន នៅអំឡុងពេលហែរក្បួនឃោសនាបោះឆ្នោត។ នេះបើតាមសេចក្ដីប្រកាសព័ត៌មានរបស់ គ.ជ.ប ចុះនៅថ្ងៃទី ៨ ខែសីហា ឆ្នាំ២០១៨នេះ។
តាមសេចក្ដីជូនដំណឹងរបស់គ.ជ.ប ដដែលនេះ ផ្លូវ វិថី និង មហាវិថីមួយចំនួនដែលត្រូវចៀសវាងក្នុងការហែក្បួរ រួមមាន៖
១.កំណាត់មហាវិថីព្រះនរោត្ដម (ចាប់ពីវិមានឯករាជ្យដល់ស្ដុបមន្ទីរពេទ្យព្រះអង្គឌួង)
២.មហាវិថីសហព័ន្ធរុស្ស៊ី
៣.កំណាត់មហាវិថីព្រះមុនីវង្ស (ចាប់ពីស្ដុប បេ កា សេ ដល់ស្ដុបអតីតមន្ទីរពេទ្យចិន)
៤.កំណាត់មហាវិថីព្រះសីហនុ(ចាប់ពីនាគបាញ់ទឹកវិថីសុធារសដល់ស្ដុបអតីតមន្ទីរពេទ្យចិន)
៥.កំណាត់មហាវិថីម៉ៅសេទុង(ចាប់ពីស្ដុបចេនឡា ដល់ស្ដុបទេពផន)
៦.កំណាត់ផ្លូវទេពផន (ចាប់ពីកែងស្ដុបមហាវិថីព្រះមុនីវង្ស ដល់ស្ដុបនាងគង្ហីង)
៧.កំណាត់វិថីសុធារស(ចាប់ពីកែងផ្លូវលេខ ១៥៤ ដល់មហាវិថីព្រះសីហនុ)
៨.មហាវិថីព្រះសុរាម្រិត
៩.ផ្លូវជុំវិញព្រះបរមរាជវាំង(កំណាត់ផ្លូវលេខ ២៤០ -ផ្លូវលេខ ១៨៤ និងផ្លូវលេខ ១៩)
ដោយឡែកទីប្រជុំជនដែលត្រូវជៀសវាងប្រមូលផ្ដុំឃោសនា និងហែក្បួន រួមមាន៖
១.ផ្លូវជុំវិញផ្សារធំថ្មី
២.ផ្លូវជុំវិញផ្សារអូរឬស្សី
៣.ផ្លូវជុំវិញផ្សារអូឡាំពិក
៤.ផ្លូវជុំវិញផ្សារទួលទំពូង
៥.ផ្លូវជុំវិញផ្សារដេប៉ូ
៦.ផ្លូវជុំវិញផ្សារដើមគរ
ក្រៅពីទីប្រជុំជន និងផ្លូវ ដែលត្រូវជៀសវាងការប្រមូលផ្ដុំឃោសនាហើយនោះក៏នៅមានទីសាធារណៈមួយចំនួនដែលត្រូវជៀសវាងក្នុងការប្រមូលផ្ដុំឃោសនាផងដែរ ក្នុងនោះរួមមាន៖
១.សួនព្រះបរមរាជវាំង
២.ទីធ្លាព្រះមេរុ
៣.សួនមុខវត្តបទុវតី (អនុញ្ញាតជូនទីវាលការីឡាចុងខាងត្បូងសួនវត្តបទុមវតី)
៤.ទីតាំងវិមានឯករាជ្យ និងសួនច្បារវិមានឯករាជ្យទាំងមូល
៥.ទីធ្លារូបសំណាកលោកយាយពេញ
៦.សួនច្បារអ្នកភិរម្យភាសាអ៊ូ ហៅង៉ុយ
៧.សួនច្បារសម្ដេច ហ៊ុន សែន
សូមជម្រាបថា យុទ្ធនាការឃោសនាបោះឆ្នោតជ្រើសតាំងសមាជិកព្រឹទ្ធសភានីតិកាលទី៤ ឆ្នាំ២០១៨ ប្រព្រឹត្តទៅរយៈពេល ១៤ថ្ងៃ ចាប់ពីថ្ងៃទី ១០ ដល់ថ្ងៃទី ២៣ ខែកុម្ភៈ ឆ្នាំ២០១៨។
ក្នុងនោះផងដែរ គណបក្សនយោបាយដែលនឹងចូលរួមប្រកួតប្រជែងការបោះឆ្នោតជ្រើសតាំងសមាជិកព្រឹទ្ធសភានីតិកាល ទី៤ នៅថ្ងៃទី ២៥ ខែកុម្ភៈ ឆ្នាំ២០១៨ រួមមាន គណបក្សប្រជាជនកម្ពុជា គណបក្សយុវជនកម្ពុជា គណបក្សខ្មែររួបរួមជាតិ និងគណបក្សហ្វ៊ុនស៊ិនប៉ិច ៕
