ភ្នំពេញ ៖ នាយកអង្គការសមាគមអភិរក្សសត្វព្រៃ ប្រចាំប្រទេសកម្ពុជា សម្ដែងក្ដីព្រួយបារម្ភយ៉ាងខ្លាំង ពីសុវត្ថិភាពរបស់អ្នកអភិរក្សព្រៃឈើ ក្នុងប្រទេសកម្ពុជា បន្ទាប់ពីក្រុមអភិរក្សព្រៃឈើចំនួន ០៣នាក់ ត្រូវបានជនមិនស្គាល់មុខលួចបាញ់សម្លាប់កាលពីថ្ងៃទី៣០ ខែមករា ឆ្នាំ២០១៨ ខណៈពួកគេ កំពុងចុះបំពេញការងារក្នុងព្រៃក្បែរព្រំប្រទល់កម្ពុជា និងវៀតណាម។
លោក សេរី វឌ្ឍនៈ រាយការណ៍ ៖
សេចក្ដីថ្លែងការណ៍របស់អង្គការ WCS ដែលបានផ្ញើមកកាន់មណ្ឌលព័ត៌មានស្ដ្រីកម្ពុជា នៅថ្ងៃទី០២ ខែកុម្ភៈនេះ បានឲ្យដឹងថា អង្គការសមាគមអភិរក្សសត្វព្រៃ ពិតជាមានការសោកស្ដាយយ៉ាងក្រៃលែង ចំពោះការបាត់បង់នូវមន្ដ្រីអភិរក្សព្រៃឈើទាំង បី រូបនេះ។ បន្ថែមពីនេះ អង្គការសមាគមអភិរក្សសត្វព្រៃ បានសង្កត់ធ្ងន់ថា ខ្លួននឹងនៅតែបន្ដគាំទ្ររាជរដ្ឋាភិបាលកម្ពុជា និងសមាគមន៍ជាដៃគូទាំងអស់ ដើម្បីរួមគ្នាបញ្ឈប់ការកាប់បំផ្លាញ់ព្រៃឈើ និងការលួចបរបាញ់សត្វព្រៃដោយខុសច្បាប់ ព្រមទាំងស្វែងរកយុត្ដិធម៌ជូនដល់ជងរងគ្រោះ និងក្រុមគ្រួសារ។
លោក កែន សេរីរដ្ឋា នាយកប្រចាំប្រទេសកម្ពុជា របស់អង្គការសមាគមអភិរក្សសត្វព្រៃហៅកាត់ថា WCS ដែលបានចេញសេចក្ដីថ្លែងការណ៍នេះ បានហៅជនរងគ្រោះទាំងបីរូបនេះថា ជា វីរៈជនអភិរក្សសត្វព្រៃឈើ ។
វីរៈជនអភិរក្សព្រៃឈើទាំង ៣រូប ដែលត្រូវជនល្មើសលួចបាញ់សម្លាប់រួមមាន លោក តឺន សុខណៃ អាយុ ៣៧ឆ្នាំ ជាមន្ដ្រីឧទ្យានុរក្ស របស់ក្រសួងបរិស្ថាន លោក សេក វឌ្ឍនា អាយុ ៣៤ឆ្នាំ ជាមន្ដ្រីកងរាជអាវុធហត្ថលើផ្ទៃប្រទេស និងលោក ថុល ខ្នា អាយុ ២៤ឆ្នាំ ជាមន្ដ្រីផ្នែកព័ត៌មានភូមិសាស្ដ្រ របស់អង្គការសមាគមអភិរក្សសត្វព្រៃ។ ហេតុការណ៍ដ៏រន្ធត់នេះ បានកើតឡើង ខណៈដែលក្រុមអ្នកអភិរក្សព្រៃឈើទាំង បីរូបនេះ ត្រឡប់ពីចំណុចអូហុច ព្រំប្រទល់កម្ពុជា និងវៀតណាម បន្ទាប់ពីឃើញជំរុំស្នាក់នៅ របស់ជនល្មើសកាប់ឈើខុសច្បាប់ និងដកហូត រឹបអូសយករណាយន្ដ និងម៉ូតូដែលប្រើប្រាស់សម្រាប់ដឹកជញ្ជូនឈើ។
សេចក្ដីថ្លែងការណ៍បន្តទៀតថា ជារៀងរាល់ថ្ងៃ មន្ដ្រីឧទ្យានុរក្ស និងក្រុមអនុវត្ដច្បាប់ បានប្រថុយជីវិតរបស់ខ្លួន ដើម្បីការពារសត្វព្រៃ និងព្រៃឈើ។ លើសពីនេះ លោក កែន សេរីរដ្ឋា បានសង្កត់ធ្ងន់ថា ក្នុងនាមអង្គការ ដែលធ្វើការងាររួមគ្នាជាមួយរាជរដ្ឋាភិបាលកម្ពុជា ក្នុងការ ការពារសត្វព្រៃ និងព្រៃឈើនៅកម្ពុជា អង្គការសមាគមអភិរក្សសត្វព្រៃ ប្ដេជ្ញានឹងនៅតែបន្ដបេសកកម្មអភិរក្សសត្វព្រៃ និងព្រៃឈើជាបន្ដទៀត ដោយមិនអនុញ្ញាតិជាដាច់ខាត ឲ្យក្រុមឧក្រិដ្ឋជនបន្ដសកម្មភាពកាប់បំផ្លាញព្រៃឈើនៅកម្ពុជា គំរាមកំហែង និងបាញ់សម្លាប់អ្នកការពារសម្បត្ដិធម្មជាតិ កើតឡើងជាថ្មីម្ដងទៀតឡើយ៕
