ភ្នំពេញ ៖ យ៉ាងតិចណាស់កម្មការិនី ប្រមាណជាង ១៤០នាក់ ស្ថិតនៅក្នុងភូមិកណ្ដឹង ឃុំកណ្ដឹង ស្រុកបាទីខេត្ដតាកែវ នៅថ្ងៃទី០១ ខែកុម្ភៈនេះ បានដួលសន្លប់ជាបន្ដបន្ទាប់ នៅពេលចូលទៅដល់រោងចក្រ។ តែយ៉ាងណា អភិបាលស្រុកបាទី បានបញ្ជាក់ថា លោកនឹងប្រជុំដើម្បីចាត់វិធានការ និងរកពីមូលហេតុករណីនេះ ។
លោក លៀ សីណា រាយការណ៍៖
រោងចក្រកាត់ដេរសម្លៀកបំពាក់ សេឌូណូ ដែលមានទីតាំងស្ថិតនៅក្នុងស្រុកបាទី ខេត្ដតាកែវ កាលពីពេលព្រឹកថ្ងៃទី០១ ខែកុម្ភៈនេះ មានកម្មការិនីចំនួន ១៤០នាក់ បានដួលសន្លប់ជាបន្ដបន្ទាប់ ដោយមិនទាន់ដឹងច្បាស់ពីមូលហេតុនៅឡើយ។នេះបើយោងតាមប្រសាសន៍របស់អភិបាលស្រុកបាទី លោក អ៊ុក រី ដែលបានប្រាប់វិទ្យុស្ដ្រីអេហ្វអឹម១០២។ តែយ៉ាងណាលោកអភិបាលស្រុកបាទី បញ្ជាក់ថា ចំនួននេះគឺគ្រាន់តែជាចំនួនបឋមតែប៉ុណ្ណោះ។
រោងចក្រនេះ មានកម្មករ កម្មការិនី សរុបប្រមាណ ១៦៥០ ហើយមានបុរស៩០នាក់។ ក្រោយមានការដួលសន្លប់អាជ្ញាធរស្រុកបាទី មន្ដ្រីរបស់បេឡាជាតិរបបសន្ដិសុខសង្គម និងខាងភាគីរោងចក្រ បានបញ្ជូនកម្មការិនីដែលដួលសន្លប់ទាំងអស់ទៅកាន់មន្ទីរពេទ្យបង្អែកស្រុក និងគ្លីនិក សុខា បាទី ដែលនៅក្បែរនោះ។ លោក អ៊ុក រី បានបន្ដថា នៅពេលនេះលោកមិនអាចធ្វើការសន្និដ្ឋានពីមូលហេតុ ដែលកម្មការិនីបានដួលសន្លប់បានទេ ដោយត្រូវរង់ចាំជួបប្រជុំជាមួយរោងចក្រនេះជាមុនសិន។ តែលោកបានបញ្ជាក់ថា កាលពីពីរថ្ងៃមុន ក៏មានករណីកម្មការិនី នៅរោងចក្រនេះ ដួលសន្លប់ដូចគ្នាដែរ។
លោក អ៊ុក រី ៖«វាអត់ទាន់ដឹងមូលហេតុដោយសារតែកាលពីពីរថ្ងៃមុនមានកម្មករ សន្លប់ដែរ ប៉ុន្ដែយើងអត់ទាន់ដឹងពីមូលហេតុទេ នៅម៉ោងមួយ កន្លះ បានប្រជុំគណៈកម្មការជាមួយរោងចក្រពិនិត្យស្ថានភាពជាក់ស្ដែង»។
ទាក់ទិនករណីនេះបើយោងតាមលោក ងាន់ សារី អធិការស្រុកបាទី បានបង្ហាញការសន្និដ្ឋានបឋមរបស់លោកថា មូលហេតុដែលកម្មការិនី ដួលសន្លប់អាចបណ្ដាលមកពីការភិតភ័យនៅពេលដែលឃើញមានកម្មការិនីផ្សេងៗដួលសន្លប់។ បន្ថែមលើនេះលោក អធិការស្រុកបាទីបន្ដថា ក្នុងចំណោមអ្នកដួលសន្លប់នៅថ្ងៃនេះ ក៏មានមួយចំនួនគឺជាអ្នកជំងឺចាស់ ដែលបានដួលសន្លប់កាលពីថ្ងៃអង្គារ។
លោក ង៉ាន់ សារី ៖«បើតាមខ្ញុំពិនិត្យមើល ខ្ញុំសន្និដ្ឋាន ហ្នឹងគឺបណ្ដាលមកពីបញ្ហាអារម្មណ៍ទេ កម្មករ ថ្ងៃមុន ម្សិលម្ង៉ៃនោះ ដួលមួយសាទៅ ហើយឥឡូវនេះត្រូវចូលធ្វើការ មានអារម្មណ៍មិនសូវស្រួលក៏ដួលសន្លប់បន្ដៗគ្នាអញ្ចឹងទៅ»។
តែជុំវិញរឿងនេះ លោក សួន វណ្ណៈ ប្រធានបេឡាជាតិរបបសន្ដិសុខសង្គមហៅកាត់ថា ប.ស.ស ប្រចាំនៅខេត្ដតាកែវ បានបញ្ជាក់លើគេហទំព័រហ្វេសប៊ុកផ្លូវការរបស់ ប.ស.ស ថា មូលហេតុនៃការដួលសន្លប់របស់កម្មការិនី របស់រោងចក្រក សេឌូណូ គឺបណ្ដាលមកពីការពុលថ្នាំបាញ់ស្រូវរបស់កសិករ ដែលប្រជាពលរដ្ឋបានបាញ់ដាក់ស្រូវរបស់ពួកគាត់ នៅជិតរោចក្រកាលពីថ្ងៃទី៣០ ខែមករា ឆ្នាំ២០១៨ទៅនេះ។
គួរជម្រាបថា បើទោះជាមានការសន្និដ្ឋានផ្សេងគ្នាពីអធិការស្រុកបាទី និងមន្ដ្រីរបស់បេឡាជាតិរបបសន្ដិសុខសង្គមប្រចាំនៅតំបន់នោះក្ដី តែវិទ្យុស្ដ្រីអេហ្វអឹម១០២ មិនទាន់អាចសុំការបកស្រាយពីខាងមន្ទីរពេទ្យបង្អែកស្រុកបាទី និងគ្លីនិក សុខា បាទី ដែលទទួលព្យាបាលកម្មការនី ដួលសន្លប់បាននៅឡើយ។
សូមរឮកថា កន្លងមកក្រសួងការងារកម្ពុជា ធ្លាប់បានចេញសេចក្ដីណែនាំមួយចំនួនស្ដីពីការរក្សាសុវត្ថិភាពការងារក្នុងរោងចក្រដើម្បីឲ្យមានសុវត្ថិភាពល្អសម្រាប់កម្មករ កម្មការិនី ។ ក៏ប៉ុន្ដែខាងភាគីរោងចក្រហាក់មិនបានអនុវត្ដបានល្អនៅឡើយទេ រហូតកាលពីចុងឆ្នាំ២០១៧។ រដ្ឋមន្ដ្រីក្រសួងការងារ និងបណ្ដុះបណ្ដាលវិជ្ជាជីវៈ លោក អ៊ិត សំហេង បាន ទទូចដល់មន្ដ្រីក្រោមឱវាទរបស់ខ្លួនឲ្យបង្កើនសកម្មភាពការងារ ចុះត្រួតពិនិត្យឲ្យបានហ្មត់ចត់នៅតាមរោងចក្រ ជុំវិញសុវត្ថិភាពការងារ និងបានព្រមានធ្ងន់ៗ ថា លោកនឹងដាក់ទណ្ឌកម្មទៅលើថៅកែរោងចក្រទាំងអស់ដែលបណ្ដោយឲ្យនៅតែមានករណី កម្មករ កម្មការិនី ដួលសន្លប់ជាបន្ដទៀត៕
