ភ្នំពេញ៖អង្គការសង្គមស៊ីវិលជាង៣០អំពាវនាវឲ្យទម្លាក់បទចោទប្រកាន់អតីតគណៈកម្មាបុណ្យសពលោកបណ្ឌិតកែម ឡីដែលរងការចោទពីកិបកេងបច្ច័យបុណ្យដែល ដើមបណ្តឹងលោក ពេជ្រ ស្រស់ ប្រធានគណបក្សយុវជនកម្ពុជា។
អតីតគណៈកម្មការបុណ្យសពលោក កែម ឡីគឺលោក ប៉ា ដួនទៀត លោក មឿន តុលា និងព្រះតេជគុណប៊ុត ប៊ុនតេញត្រូវបានសាលាដំបូងរាជធានីភ្នំពេញចោទប្រកាន់ពីបទ«រំលោភសេចក្តីទុកចិត្ត»តាមមាត្រា៣៩១និងមាត្រា៣៩២នៃក្រមព្រហ្មទណ្ឌ កាលពីថ្ងៃទី៤ ខែមករា ឆ្នាំ ២០១៨។
ក្នុងសេចក្តីថ្លែការណ៍របស់ក្រុមអង្គការសង្គមស៊ីវិលឲ្យដឹងថាការចោទប្រកាន់ប្រធានអង្គការនេះគ្មានមូលដ្ឋាននិងគំរាមកំហែង យាយី ដើម្បីបំបិទសំឡេងសង្គមស៊ីវិលនិងអ្នកការពារសិទ្ធិមនុស្ស។
អតីតគណៈកម្មការបុណ្យសពលោក កែម ឡី ត្រូវបានរងបណ្តឹងដោយប្រធានគណបក្សយុវជនកម្ពុជា លោក ពេជ្រ ស្រស់ចោទសមាជិកអតីតគណៈកម្មការបុណ្យលួចបន្លំមូលនិធិបុណ្យសពកាលពីថ្ងៃទី៨ ខែកញ្ញា ឆ្នាំ ២០១៧។
លោក ប៉ា ងួនទៀង នាយកប្រតិបត្តិមជ្ឈមណ្ឌលកម្ពុជាដើម្បីប្រព័ន្ធឯករាជ្យ(CCIM) លោក មឿន តុលា នាយកប្រតិបត្តិមជ្ឈមណ្ឌលសម្ពន្ធភាពការងារ និងសិទ្ធិមនុស្ស (CENTRALនិង ព្រះ តេជគុណ ប៊ុត ប៊ុនតិញ ស្ថាបនិកបណ្តាញព្រះសង្ឃឯករាជ្យដើម្បីយុត្តិធម៌សង្គមត្រូវបានតុលាការចេញដីការចាប់ខ្លួនហើយប្រសិនបើតុលាការរកឃើញថាមានទោសអ្នកទំាងបីអាចប្រឈមមុខដាក់ពន្ធាគារពី៦ខែដល់៣ឆ្នាំនិងពិន័យជាប្រាក់៦លានរៀល។
ក្រុមអង្គការសង្គមស៊ីវិលអំពាវឲ្យអាជ្ញាធរបញ្ឈប់ការធ្វើទុកបុកម្នេញលើមេដឹកនាំអង្គការសង្គមស៊ីវិល អ្នកការពារសិទ្ធិមនុស្ស និងសកម្មជនកំពុងធ្វើការងារដោយស្របច្បាប់។ក្រុមអង្គការទាំងនេះក៏ស្នើឲ្យរាជរដ្ឋាភិបាលគោរពរដ្ឋធម្មនុញ្ញកម្ពុជានិងច្បាប់សិទ្ធិមនុស្សអន្តរជាតិ ដើម្បីសង្គមស៊ីវិលអាចដំណើរដោយគ្មានយាយីនិងរឹតត្បិត៕
