កម្មករកម្មារិនីរោងចក្រកាត់ដេរសម្លៀកបំពាក់ វ៉ូណាមមីខេមបូឌាហ្គាមេន មកពីភូមិសំរោង ឃុំសុភី ស្រុកបាទី ខេត្តតាកែវប្រមាណ ៤០០នាក់ បានប្រមូលផ្តុំគ្នានៅមុខក្រសួងការងារនិងបណ្តុះបណ្តាលវិជ្ជាជីវៈ ដើម្បីសុំក្រសួងអន្តរាគមន៍រកដំណោះស្រាយលើវិវាទ១៤ចំណុចជាមួយក្រុម ក្រុមហ៊ុនកាលពីព្រឹកថ្ងៃសុក្រ ទី០៨ ខែឧសភាឆ្នាំ២០១៥។
វិវាទសំខាន់ៗ ដែលក្រុមកម្មករស្នើរសុំរួមមាន ទាមទារប្រាក់ថ្លៃបាយមួយថ្ងៃចំនួន ២០០០រៀល សុំឱ្យក្រុមហ៊ុនផ្តល់ប្រាក់រង្វាន់ទៀងទាត់ដល់កម្មករ ហើយសុំឲ្យស្រី្តមានផ្ទៃពោះបានចេញមុនម៉ោងការងារ១៥នាទី នឹងសុំឱ្យក្រុមហ៊ុន ទទួលខុសត្រូវលើគ្រោះថ្នាក់ផ្សេងៗក្នុងពេលបំពេញការងារព្រមទាំងសុំឱ្យក្រុមហ៊ុន រក្សាប្រាក់ឈ្នួល និងប្រាក់រង្វាន់ផ្សេងៗក្នុងពេលធ្វើបាតុកម្ម និងមានចំណុចសំខាន់ៗមួយចំនួនទៀត។
កញ្ញា សុខ លាភ ជាកម្មារិនីរោងចក្រកាត់ដេរសម្លៀកបំពាក់ វ៉ូណាមមី បាននិយាយថា « ថៅកែរោងចក្រមិនបានគោរពទៅតាមលក្ខខ័ណ្ឌការងារបានត្រឹមត្រូវនោះទេ។ ភាគីរោងចក្របានបំពានលើច្បាប់និងសិទ្ធិការងារយ៉ាងខ្លាំង។ កម្មារិនីម្នាក់រូបនេះក៏បានឱ្យដឹងទៀតថា ក្រុមកម្មករបាននាំគ្នាទាមទារទៅភាគី ក្រុមហ៊ុនជាច្រើនលើករួចមកហើយ គឺចាប់តាំងពីថ្ងៃទី២៨ ខែមេសា ប៉ុន្តែភាគី រោងចក្រមិនព្រមជួបជាមួយកម្មករដើម្បីរកដំណោះស្រាយនោះឡើយ។»
ស្រដៀងគ្នានេះដែរ កម្មារិនីកំពុងមានផ្ទៃពោះមួយរូបគឺ អ្នកស្រី ស៊ុំ ស្រីខូច ដែលបានចូលរួមក្នុងបាតុកម្មនោះបានប្រាប់ថាថៅកែមិនគោរពសិទ្ធិកម្មករព្រមទាំងមិនអើពើរាល់សំណើរទាមទាររបស់កម្មករឡើយ។ កត្តានេះហើយ បានជំរុញឱ្យក្រុមកម្មករបង្ខំចិត្តចេញមុខមកតវ៉ាដើម្បីរកយុត្តិធម៌។
ចំនែក លោក សន សុភាព ជាអ្នកសម្របសម្រួលសហព័ន្ធសហជីពការងារដើម្បីកម្ពុជាជាអ្នកដឹកនាំបាតុកម្មនេះបានឱ្យដឹងថា ការហែក្បូនកម្មករមកបាតុកម្មនេះមានគោលបំណងដាក់ញ្ញាតិដល់ក្រសួងការងារឱ្យជួយអន្តរាគមន៍លើវិវាទ១៤ចំណុចរបស់កម្មករនិងភាគីរោងចក្រ ដូចជាទាមទារប្រាក់ថ្លៃបាយមួយថ្ងៃ ចំនួន ២០០០រៀល សុំឱ្យក្រុមហ៊ុនផ្តល់រង្វាន់ដល់កម្មករចំនួន១៥ ដុល្លា ក្នុងមួយខែដើម។
លោក សន សុភាព បានបញ្ជាក់ផងដែរថា បន្ទាប់ពីតំណាងកម្មករទាំង ១៥រូបបានចូលទៅចរចារនៅក្នុងក្រសួងការងាររូចមក ជាលទ្ធផលពុំទទួលបាន ដំណោះស្រាយសមស្របណាមួយនៅឡើយនោះទេ។ លោកថា ប្រសិនបើក្រសួងមិនបានជួយអន្តរាគមន៍ក្នុងករណីវិវាទខាងលើ ក្រុមកម្មករនៅតែបន្តតវ៉ា ដដែល។
ជុំវិញបញ្ហានេះ វិទ្យុស្ត្រី មិនអាចទាក់ទងសុំការអត្ថាធិប្បាយរឿងនេះពីអ្នកនាំពាក្យក្រសួងការងារបាននោះទេ។
ចំនែកឯ ក្រុមកម្មកររោងចក្រកាត់ដេរសម្លៀកបំពាក់ វ៉ូណាមមី ខេមបូឌា ហ្គាមេន បញ្ជាក់គោលជំហរថា ពួកគេនឹងបន្តធ្វើបាតុកម្ម ប្រសិនបើថៅកែរោងចក្រនៅ តែមិនព្រមផ្តល់ដំណោះស្រាយសមរម្យដល់ពួកគេ៕
