ភ្នំពេញ ៖ តំណាងសហជីពមួយរូប បង្ហាញពីក្ដីបារម្ភពីស្ថិរភាព សុវត្ថិភាពការងាររបស់ក្រុមកម្មករ កម្មការិនី ដែលលោកសង្កេតឃើញថា ឆ្នាំ២០១៨នេះ រោងចក្រភាគច្រើន តែងតែប្រើកិច្ចសន្យារយៈពេលខ្លី។ តែបែបនេះក្ដី សមាគមរោងចក្រកាត់ដេរកម្ពុជា អះអាងថា កម្មករភាគច្រើនក៏ចង់បានកិច្ចសន្យារយៈពេលខ្លីដែរ ព្រោះមានប្រាក់អត្ថប្រយោជន៍៥ភាគរយ។
លោក លៀ ស៊ីណា រាយការណ៍ ៖
កិច្ចសន្យាការងារសម្រាប់កម្មករ កម្មការិនី ត្រូវបានបែងចែកជាពីរ គឺកិច្ចសន្យាការងារមានថេរវេលាកំណត់ និងកិច្ចសន្យាការងារគ្មានថេរវេលាកំណត់។ យោងតាមច្បាប់ការងារកម្ពុជា កម្មករ កម្មការិនី ដែលធ្វើការងារក្នុងរោងចក្រមួយចាប់ពី ២ឆ្នាំឡើងទៅ ជាស្វ័យប្រវត្ដពួកគេនឹងត្រូវបានទទួលកិច្ចសន្យាការងារគ្មានថេរវេលាកំណត់។ ប៉ុន្ដែបើយោងតាមមេដឹកនាំ សហជីពមួយរូប បានបញ្ជាក់ថា រហូតមកដល់ឆ្នាំ២០១៨នេះ ក្រុមថៅកែ និយោជក ភាគច្រើននៅតែប្រើកិច្ចសន្យារយៈពេលខ្លីសម្រាប់កម្មករ។
លោក អាត់ ធន់ ប្រធានសហភាពការងារកម្ពុជា ដែលជាសហជីពតំណាងកម្មករធំមួយក្នុងចំណោមសហជីពជាច្រើនទៀត បានបង្ហាញពីការមើលឃើញរបស់លោកថា ក្នុងឆ្នាំ២០១៨នេះ កម្មករ កម្មការិនី ដែលបម្រើការងារក្នុងវិស័យឧស្សាហកម្មកាត់ដេរ ពួកគេនៅតែទទួលបានកិច្ចសន្យារយៈពេលខ្លី ដែលជាក្ដីបារម្ភមួយ នាំឲ្យប៉ះពាល់ដល់ទឹកចិត្ដកម្មករ ដែលភាគច្រើនជាស្ដ្រីបម្រើការងារក្នុងវិស័យដ៏ធំមួយនេះ។
ប្រធានសហភាពការងារកម្ពុជា យល់ឃើញថា មូលហេតុដែលនាំឲ្យថៅកែ និយោជក មានបំណងប្រើកិច្ចសន្យារយៈពេលខ្លីដូចនេះ ពីព្រោះតែពួកគេចង់គ្រប់គ្រងសកម្មភាពកម្មករ មិនឲ្យមានការប្រមូលផ្ដុំគ្នាតវ៉ា ឬក៏បង្កើតជាចលនាសហជីពជាដើម។
លោក អាត់ ធន់ ៖«ដោយសារតែ ខាងនិយោជកគាត់ចង់ប្រើប្រាស់កិច្ចសន្យាខ្លីៗហ្នឹង គឺក្នុងគោលបំណងដើម្បីស្រួលបញ្ឈប់កម្មករ នៅពេលដែលកម្មករហ្នឹង ដូចជា ចូលសហជីព កម្មករ ឬក៏កម្មករ តវ៉ា ឬក៏កម្មករ ឈឺច្រើន ឬក៏អាចនិយាយថា គាត់ឆ្លងទន្លេអីអញ្ចឹង ឬក៏កម្មករហ្នឹងគាត់មិនពេញចិត្ដអីអញ្ចឹងគាត់បញ្ឈប់ចោលហើយ»។
លោក អាត់ ធន់ បន្ដថា ប្រសិនបើតាមរោងចក្រកាត់ដេរនៅតែមានការប្រើប្រាស់កិច្ចសន្យាការងារ រយៈពេលខ្លី កាន់តែច្រើន វាគឺជាសម្ពាធធំមួយ ទៅលើកម្មករ កម្មការិនី ហើយ រឿងនេះ ធ្វើឲ្យពួកគេមិនហ៊ានតវ៉ា ឬប្រឆាំងថៅកែ និយោជកនោះទេ នៅពេលដែលមានការដាក់បន្ទុកឲ្យកម្មករធ្វើការងារច្រើនលើសកម្លាំង និងការទទួលបានប្រាក់កម្រៃ មិនអនុឡោមទៅតាមច្បាប់ការងារកម្ពុជាជាដើម។
ប្រធានសហភាពការងារកម្ពុជា សំណូពរដល់ប្រមុខដឹកនាំរាជរដ្ឋាភិបាលឲ្យជួយពង្រឹងការអនុវត្ដការច្បាប់ស្ដីពីការងារឲ្យបានខ្លាំងដោយផ្ដោតទៅលើក្រុមនិយោជក ហើយ ប្រសិនជាពួកគេមិនព្រមបន្ដកិច្ចសន្យារយៈពេលវែង ឬហៅថា កិច្ចសន្យាគ្មានថេរវេលាកំណត់ គឺជាកំហុសរបស់និយោជក។
តែសម្រាប់ លោក កាំង ម៉ូនីកា អគ្គលេខាធិការរងសមាគមរោងចក្រកាត់ដេរកម្ពុជា ហៅកាត់ថា GMAC បានបង្ហាញការយល់ឃើញខុសពីប្រធានសហភាពការងារកម្ពុជា។ អគ្គលេខាធិការរងសមាគមរោងចក្រកាត់ដេររូបនេះ មានប្រសាសន៍ថា ជាការពិតគឺមានរោងចក្រខ្លះប្រើកិច្ចសន្យារយៈពេលវែង និងរោងចក្រខ្លះទៀតប្រើកិច្ចសន្យារយៈពេលខ្លី ដែលលោកអះអាងថា កម្មករមួយចំនួនធំក៏ចង់បានកិច្ចសន្យារយៈពេលខ្លីដែរ គឺដោយសារតែពួកគេនឹងទទួលបានប្រាក់អត្ថប្រយោជន៍ ៥ភាគរយ ក្នុងករណីដែលការតម្រូវឲ្យឈប់ពីការងារ។
លោក កាំង ម៉ូនីកា ៖«អញ្ចឹងមានមួយចំនួនទៅ គាត់ចង់បានកិច្ចសន្យាមានថេរវេលាមិនកំណត់ ប៉ុន្ដែក៏មានចំនួនច្រើនដែរដែលគាត់ចង់បានកិច្ចសន្យាការងារដែលមានថេរវេលាកំណត់ ដើម្បីបើកសិទ្ធិឲ្យគាត់ទទួលបានប្រាក់បំណាច់នៅពេលដែលគាត់បញ្ចប់កិច្ចសន្យាម្ដងៗ ៥ភាគរយៈនោះបាទ»។
តែយ៉ាងណាកម្មករ មានសិទ្ធិគ្រប់គ្រាន់ដើម្បីដាក់សំណើរទៅកាន់ថៅកែ ក្នុងករណីដែលពួកគេចង់បានកិច្ចសន្យារយៈពេលវែង ឬក៏រយៈពេលខ្លី ។ លោក កាំង ម៉ូនីកា បញ្ជាក់ថា រាល់ការសម្រេចចិត្ដគឺស្ថិតនៅលើថៅកែ «ពីព្រោះជួនកាលទៅគេត្រូវអនុម័តការងារទៅតាមស្ថានភាព ទៅតាមលក្ខខណ្ឌសេដ្ឋកិច្ចនៃអាជីវកម្មរបស់គេ ជួនកាលទៅការងារមួយចំនួន គឺត្រូវការធ្វើតែរយៈពេលខ្លី យើងក៏មិនអាចបង្ខំថៅកែ ទៅធ្វើកិច្ចសន្យាដែលគ្មានថេរវេលាកំណត់ជាអចិន្ដ្រៃយ៍បានដែរ»។
កម្មករ កម្មការិនី ក្នុងប្រទេសកម្ពុជាទាំងអស់ប្រមាណ ៩០ម៉ឺននាក់ មានជាង ៨០ម៉ឺននាក់ជាស្ដ្រី។ ក្នុងឆ្នាំ២០១៨នេះ ពួកគេត្រូវទទួលបានប្រាក់ខែ ១៧០ដុល្លារ ក្នុងមួយខែៗ។ តែខាងសហជីពបានអះអាងថា ចំនួននេះថ្វីត្បិតតែអាចលើកតម្កើងជីវភាពកម្មករ បានមួយកម្រិតក្ដី តែវាមិនទាន់គ្រប់គ្រាន់សម្រាប់ការចំណាយប្រចាំថ្ងៃរបស់កម្មករឡើយ។ ករណីនេះ សហជីពបានបង្ហាញជំហរថា ពួកគេនឹងនៅតែទាមទារឲ្យមានការដំឡើងប្រាក់ឈ្នួលកម្មករ បន្ដទៀតនៅឆ្នាំក្រោយ។
សម្ដេច ហ៊ុន សែន ប្រមុខដឹកនាំរាជរដ្ឋាភិបាលកម្ពុជា កាលពីថ្ងៃទី១១ ខែតុលា ឆ្នាំ២០១៧ មានប្រសាសន៍ថា នៅឆ្នាំ២០១៩ ខាងមុខ រាជរដ្ឋាភិបាលនឹងដាក់ឲ្យអនុវត្ដនូវរបបប្រាក់សោធនិវត្ដន៍សម្រាប់កម្មករ កម្មការិនី ក្នុងក្របខណ្ឌឯកជន ជាប្រយោជន៍ជួយដល់កម្មករ កម្មការិនី មានប្រាក់សម្រាប់ខ្លួនឯងនៅពេលពួកគេ បានធ្វើការងារនេះ រយៈពេល ២៥ឆ្នាំឡើងទៅ៕
