en     km
en     km

រដ្ឋមន្ដ្រី​ក្រសួងមហាផ្ទៃ​បញ្ជា​ឲ្យ​បិទ​ច្រករបៀង​តាម​ព្រំដែន​ឲ្យ​បាន​នៅ​ឆ្នាំ​២០១៨ ​ករណី​ទប់ស្កាត់​ការ​ជួញដូរ​មនុស្ស​

Share

ភ្នំពេញ​ ៖​ រដ្ឋមន្ដ្រី​ក្រសួងមហាផ្ទៃ​បាន​ចេញ​បញ្ជា​ ដល់​មន្ដ្រី​ក្រោម​ឱវាទ​ទាំងអស់​ឲ្យ​បង្កើន​សកម្មភាព​ការងារ​ ឈាន​ទៅ​ដល់​ការ​បិទ​ច្រករបៀង​តាម​ព្រំដែន​កម្ពុជា​ឲ្យ​បាន​ បំណង​ធ្វើ​យ៉ាងណា​រក្សា​សន្ដិសុខ​តាម​ព្រំដែន​ ទប់ស្កាត់​បទល្មើស​ឆ្លង​ដែន​ ដែល​មាន​ទាំង​ការ​ជួញដូរ​មនុស្ស​ និង​ការ​រត់ពន្ធ​គ្រឿងញៀន​ជាដើម​។​

​លោក​ លៀ​ ស៊ី​ណា​ រាយការណ៍​ ៖​

 

សម្ដេច ស ខេង ឧបនាយករដ្ឋមន្រ្ដី និងជារដ្ឋមន្រ្ដីក្រសួងមហាផ្ទៃ

 

​សម្ដេច​ ស​ ខេ​ង​ ឧបនាយករដ្ឋមន្ដ្រី​ និង​ជា​រដ្ឋមន្ដ្រី​ក្រសួងមហាផ្ទៃ​ បាន​ចេញ​បទបញ្ជា​ផ្ទាល់មាត់​ដូចនេះ​ នៅ​ក្នុង​ពិធី​បិទ​សន្និបាត​ បូក​សរុប​លទ្ធផល​ការងារ​ប្រចាំឆ្នាំ​ ២០១៧​ និង​លើក​ទិស​ដៅ​ការងារ​សម្រាប់​ឆ្នាំ​២០១៨​ កាលពី​រសៀល​ថ្ងៃ​ទី​២៣​ ខែមករា​ ឆ្នាំ​២០១៨​ នៅ​ក្រុង​បាត់ដំបង​។​ ក្នុង​ពិធី​នេះ​សម្ដេច​ ស​ ខេ​ង​ បាន​ថ្លែង​លើក​សរសើរ​ដល់​ការ​ខិតខំ​ប្រឹងប្រែង​អនុវត្ដ​តួនាទី​របស់​មន្ដ្រី​អាជ្ញាធរ​ ក្រោម​ឱវាទ​ ដែល​បាន​ទប់ស្កាត់​បទល្មើស​ផ្សេងៗ​តាម​ព្រំដែន​។​ ក៏​ប៉ុន្ដែ​សម្ដេច​រដ្ឋមន្ដ្រី​ បាន​បង្ហាញ​ពី​ក្ដី​បារម្ភ​ ជុំវិញ​បទល្មើស​តាម​ព្រំដែន​ដែល​មិន​ទាន់​អាច​ទប់ស្កាត់​បាន​ទាំងស្រុង​។​

​សម្ដេច​ ស​ ខេ​ង​ មើលឃើញ​ថា​ មាន​តែ​ការ​បិទ​ច្រករបៀង​តាម​ព្រំដែន​ទេ​ ទើប​អាច​ធ្វើ​ឲ្យ​បទល្មើស​តាម​ព្រំដែន​ មាន​ដូច​ជា​ ការ​ហូរ​ចូល​ទំនិញគេចពន្ធ​ ការ​រត់ពន្ធ​មនុស្ស​ ការ​លាង​លុយ​ ការ​ជួញដូរ​គ្រឿងញៀន​ ការ​លួច​ចេញ​ទៅ​កាប់​ឈើ​ដោយ​ខុសច្បាប់​ និង​បទល្មើស​ផ្សេងៗ​ទៀត​។​ លោក​រដ្ឋមន្ដ្រី​បន្ដ​ថា​ បញ្ហា​នេះ​គឺជា​រឿង​គ្រោះថ្នាក់​ ប្រសិនបើ​មិន​មាន​យន្ដការ​ទប់ស្កាត់​ និង​ដោះស្រាយ​ឲ្យ​បាន​ត្រឹមត្រូវ​។​

​សម្ដេច​ ស​ ខេ​ង​ ៖«​អ​ញ្ចឹ​ង​ការ​គ្រប់គ្រង​ច្រក​នេះ​ ជា​ផ្នែក​មួយ​សំខាន់​ដែរ​ ។​ការ​គ្រប់គ្រង​ខ្សែបន្ទាត់​ទាំងមូល​រឿង​មួយទៀត​ ហើយ​បិទ​ច្រករបៀង​ឲ្យ​បាន​ ព្រោះថា​ បើ​មិន​អ​ញ្ចឹ​ង​ទេ​ ទំនិញ​វា​មក​តាម​ច្រករបៀង​នោះ​ ការ​រត់ពន្ធ​មនុស្ស​ ការ​ជួញដូរ​គ្រឿងញៀន​ វា​មក​តាម​ច្រករបៀង​ ដែល​ជា​បញ្ហា​ដ៏​គ្រោះ​បើ​យើង​ធ្វើ​មិន​បាន​ត្រឹមត្រូវ​»​។​

​បន្ថែម​លើស​នេះ​សម្ដេច​ ស​ ខេ​ង​ មាន​ប្រសាសន៍​ថា​ គោលដៅ​របស់​លោក​គឺ​ការ​លុប​បំបាត់​ឲ្យ​បានការ​ជួញដូរ​ខុសច្បាប់​ ឆ្លងកាត់​ព្រំដែន​ទាំងអស់​របស់​កម្ពុជា​។​ ជាង​នេះ​លោក​ក៏​បាន​លើកទឹកចិត្ដ​ដល់​មន្ដ្រី​ក្រោម​ឱវាទ​ទាំងអស់​រួម​គ្នា​អនុវត្ដ​ការងារ​នេះ​ឲ្យ​បាន​។​

​ក្នុង​ពិធី​បិទ​សន្និបាត​ បូក​សរុប​លទ្ធផល​ការងារ​ប្រចាំឆ្នាំ​ ២០១៧​នេះ​ សម្ដេច​ ស​ ខេ​ង​ ក៏​បាន​លើក​ឡើង​ពី​ជោគជ័យ​ នៃ​ការ​ស្នើ​សុំ​ទៅ​កាន់​អាជ្ញាធរ​ថៃ​ និង​ឡាវ​ ដែល​បាន​បញ្ឈប់​ការ​បាញ់​សម្លាប់​ពលរដ្ឋ​ខ្មែរ​ ដែល​បាន​លួច​ចូល​ទៅ​កាប់​ឈើ​ដោយ​ខុសច្បាប់​នៅ​ប្រទេស​ទាំងនោះ​ទេ​។​

​សម្ដេច​ ស​ ខេ​ង​ ៖«​សុំ​ធ្វើ​ម៉េច​គឺ​ទុក​ជីវិត​ បើ​ថា​ ខុស​ គឺ​ខុស​ហើយ​ ប៉ុន្ដែ​សុំ​ថា​ ចាប់​ទៅ​ផ្ដន្ទាទោស​ទៅ​ កុំ​សម្លាប់​ចោល​ ដល់​ឥឡូវ​ធ្វើ​បាន​ គឺ​អត់​មាន​ទេ​ មក​ដល់​ឥឡូវ​គឺ​អត់​មាន​ អ​ញ្ចឹ​ង​គឺជា​ជោគជ័យ​មួយ​ដែរ​ដោយ​កិច្ច​សហប្រតិបត្ដិការ​ អ​ញ្ចឹ​ង​ខេត្ដ​ជាប់​ព្រំដែន​យើង​ខិតខំ​ហៅរក​គ្នា​ទៅ​ ប៉ុន្ដែ​មិនមែន​ហៅរក​ក្នុង​ន័យ​លក់​អធិបតេយ្យភាព​ លក់​ឯករាជ្យ​យើង​ទេ​ គឺ​ក្នុង​ន័យ​ការពារ​ផលប្រយោជន៍​របស់​ប្រជាជន​»​។​

​ទាំង​ប្រទេស​វៀតណាម​ ឡាវ​ ថៃ​ និង​កម្ពុជា​ សុទ្ធតែ​មាន​គណៈកម្មាធិការ​ព្រំដែន​រួម​គ្នា​។​ គណៈកម្មាធិការ​នេះ​ មាន​ភារកិច្ច​ ជួយ​ទប់ស្កាត់​ការ​ប៉ះទង្គិច​គ្នា​ តាម​ព្រំដែន​ និង​ ការ​ទប់ស្កាត់​សកម្មភាព​ ជួញដូរ​ដែល​មិន​ស្របច្បាប់​ នៅ​តាម​ព្រំដែន​នៃ​ប្រទេស​ទាំង​ ៣​នេះ​។​ ប្រសាសន៍​របស់​ សម្ដេច​រដ្ឋមន្ត្រី​ក្រសួងមហាផ្ទៃ​ធ្វើ​ឡើង​ ស្រប​ពេល​ដែល​ករណី​បាតុភាព​ផ្សេងៗ​ តាម​ព្រំដែន​ នៅ​តែ​បន្ត​កើត​មាន​ មាន​ជា​អាទិ៍​ ការ​ជួញដូរ​គ្រឿងញៀន​ ការ​នាំ​ទំនិញគេចពន្ធ​ និង​លួច​រត់ពន្ធ​មនុស្ស​ឆ្លង​ដែន​ខុសច្បាប់​ជាដើម​៕​

Share

ព័ត៌មានទាក់ទង

Image