ភ្នំពេញ៖វេជ្ជបណ្តិតឯកទេសជំងឺហង់សិនឬជំងឺឃ្លង់នៃមន្ទីរពេទ្យគៀនឃ្លាំងពន្យល់ថាជំងឺហង់សិនជាជំងឺឆ្លងដែលអាចព្យាបាលជាសះស្បើយ១០០ភាគរយ។ អ្នកជំងឺហង់សិនអំពាវនាវកុំមានការរើសអើងពួកគាត់។
ជំងឺហង់សិនឬជំងឺឃ្លង់ជាប្រភេទជំងឺឆ្លងមិនមែនជាជំងឺតំណពូជទេ។ជំងឺហង់សិនអាចព្យាបាលជាសះស្បើយនិងមិនបណ្តាលឲ្យពិការភាពទេ ប្រសិនបើអ្នកជំងឺមកពិនិត្យព្យាបាលទាន់ពេលវេលា។រោគសញ្ញាជំងឺហង់សិនមានស្នាមព័ណ៌សនៅលើស្បែកដូចជាបន្ទះ ដុំពក និងស្ពឹកនៅត្រង់រោគសញ្ញា។ជំងឺនេះសង្ងំនៅក្នុងខ្លួនមនុស្សពី២ទៅ៣ឆ្នាំទើបចេញរោគសញ្ញា។
មន្ទីរពេទ្យគៀនឃ្លាំងឬមជ្ឈមណ្ឌលស្តារនីតិសម្បទាគៀនឃ្លាំងបានដំណើរការព្យាបាលជំងឺឃ្លង់នៅរាជធានីភ្នំពេញអស់រយៈពេលជិត២០ឆ្នាំចាប់ពីឆ្នាំ២០០០មកដោយទទួលមូនីធិពីប្រទេសស្វីសនៃអង្គការCIOMAL។បច្ចុប្បន្នមជ្ឈមណ្ឌលស្តារនីតិសម្បទាគៀនឃ្លាំងមានគ្រែចំនួន៤០សម្រាប់ព្យាបាលជំងឺហង់សិន។
លោក អ៊ុន វ៉ាន់ថន វេជ្ជបណ្ឌិតឯកទេសព្យាបាលជំងឺហង់សិននៃមន្ទីរពេទ្យគៀនឃ្លាំងថ្លែងនៅក្នុងកម្មវិធីជួបជុំជាមួយអ្នកជំងឺហង់សិន ក្នុងការប្រារព្ធទិវាជំងឺហង់សិនពិភពលោកលើកទី៦៤នៅ រាជធានីភ្នំពេញនៅថ្ងៃទី២៤ ខែមករា ឆ្នាំ ២១០៨នេះថាជំងឺហង់សិនជាជំងឺរាំរៃដែលអាចឆ្លងមកមនុស្សតាមរយៈផ្លូវដង្ហើមឬប៉ះពាល់ផ្ទាល់ត្រង់ដំបៅឬទឹករងីអ្នកកើតជំងឺហង់សិន។
លោកវេជ្ជបណ្ឌិត អ៊ុន វ៉ាន់ថន បន្ថែមថា បច្ចុប្បន្នអ្នកជំងឺហង់សិនចំនួន២៥នាក់កំពុងសម្រាកព្យាបាលដោយឥតគិតថ្លៃនៅក្នុងមន្ទីរពេទ្យគៀនឃ្លាំងរាជធានីភ្នំពេញ។
គូស្វាមីភរិយាមួយគូគឺលោក ហ៊ិន ឈត់ និងអ្នកស្រី ហ៊ាម សាវើង កំពុងសម្រាកព្យាបាលជំងឺហង់សិននៅមន្ទីរពេទ្យគៀនឃ្លាំងបានបង្ហាញអារម្មណរីករាយចំពោះស្ថានភាពជំងឺធូរស្រាល បន្ទាប់ពីទទួលបានការព្យាបាលដោយត្រឹមត្រូវ។
ដោយសារមកទទួលសេវាព្យាបាលទាន់ពេលវេលាអ្នកស្រី ហ៊ាម សាវើង អាយុ ៣២ឆ្នាំដោយមិនធ្លាក់ខ្លួនពិការធ្ងន់ធ្ងរទេ។ អ្នកស្រីប្រាប់ថា អ្នកស្រីពិការម្រាមដៃពីរប៉ុណ្ណោះ។«លេបថ្នំាទាន់កុំអីដូចប្តីខ្ញុំដែរកុំអីខូចដៃទំាងអស់គ្នា គ្មានធ្វើការងារកើតទេឥឡូវអត់អីទេកាន់អ្វីក៏ជាប់ដែរ។ព្យាបាលទាន់បានមិនទាន់ខូចដៃ ខូចដែរពីរនេះ(ម្រាមដៃនាងនិងកូនដៃ)។»
ចំណែកស្វាមីរបស់អ្នកស្រីគឺលោក ហ៊ិន ឈត់ អាយុ៤៧ឆ្នាំ បានធ្លាក់ខ្លួនពិការដៃទាំងសង់ខាងគឺដាច់ម្រាមដៃទាំងអស់ដោយសារកើតជំងឺឃ្លង់ធ្ងន់ធ្ងរទើបមករកសេវាព្យាបាល។លោក ឈត់ថាលោកកើតជំងឺហង់សិនចាប់តាំងពីអាយុ១៥ឆ្នាំមកម្ល៉េះ។ជំងឺរបស់លោកមានស្ថានភាពជំងឺ ធូរស្រាលច្រើនបន្ទាប់ពីចំណាយពេលព្យាបាលអស់រយៈពេល២ឆ្នាំ។អ្នកទាំងពីរអំពាវនាវកុំរើសអើងអ្នកមានជំងឺហង់សិន។«សូមសំណូមពរអ្នកជាកុំរើសអើងអ្នកកើតជំងឺហង់សិន មិនឆ្លងទេ ព្រោះខ្ញុំនៅ៤០ឆ្នំាហើយមិនទាន់មានបញ្ហានៅក្នុងភូមិទេ។ប៉ុន្តែគេដូចជានៅរើសអើង។»
លោកវេជ្ជបណ្ឌិតអ៊ុន វ៉ាន់ថន អំពាវនាវឲ្យពលរដ្ឋណាដែលសង្ស័យថាមានរោគសញ្ញាដូចជាជំងឺសើស្បែកស្នាម ព័ណ៌ស ជាបន្ទះ ឬដុំពកនិងស្ពឹង បន្ទាប់មករមាស់និងដំបៅលើស្បែកត្រូវប្រញាប់មកពិនិត្យនិងទទួលសេវាព្យាលរៀងរាលថ្ងៃធ្វើការចាប់ពីថ្ងៃចន្ទដល់សុក្រនៃមន្ទីរពេទ្យគៀនឃ្លាំង។
លោកវេជ្ជបណ្ឌិតសំណូមពរដល់សាធារណៈជនកុំរើសអើងចំពោះអ្នកកើតជំងឺហង់សិនព្រោះជំងឺនេះអាចព្យាបាលជាសះស្បើយ១០០ភាគរយ។«ចំពោះការរើសអើងគឺសូមឲ្យសហគមន៍របស់គាត់នេះមិនមែនជាជំងឺតពូជទេជាជំងឺឆ្លងដូច្នេះក្នុងសហគមន៍ប្រសិនបើសង្ស័យថាគាត់មានជំងឺនិងហើយឲ្យគាត់មកព្យាបាលគឺជាសះស្បើយ១០០ភាគរយ។»
យោងតាមរបាយការណ៍សម្រាប់ឆ្នាំ២០១៧របស់មន្ទីរពេទ្យគៀនឃ្លាំងឬមជ្ឈមណ្ឌលស្តារនីតិសម្បទាគៀនឃ្លាំងបង្ហាញថាជំងឺសើស្បែកសរុប៦៣៨៨នាក់ទទួលបានសេវាព្យាបាលនិង៥៧២២នាក់ទទួលសេវាប្រឹក្សាជំងឺសើស្បែក។
របាយការណ៍នេះបញ្ជាក់ថាអ្នកកើតជំងឺហង់សិនករណីថី្មមាន៣៦នាក់។ក្នុងនោះ១២នាក់មានស្ថានភាពជំងឺស្រាលប្រភេទជំងឺPBនិងអ្នកជំងឺ២៤នាក់ទៀតមានស្ថានភាពធ្ងន់ប្រភេទជំងឺMP។
អ្នកជំងឺយ៉ាងតិច២០នាក់ធ្លាក់ខ្លួនពិការភាពមុនមកទទួលសេវាព្យាបាលនៅមន្ទីរពេទ្យគៀន
ឃ្លាំង។
អ្នកជំងឺយ៉ាងតិច១៧៥នាក់ទទួលការវះកាត់កែលម្អកាយសម្បទាបន្ទាប់ពីព្យាបាលជាសះស្បើយ។ក្នុងនោះ៨នាក់វះកាត់ដៃជើងនិង១៦៧នាក់វះកាត់កែលម្អតិចតួច។របាយការណ៍នេះបន្ថែមថាក្នុងឆ្នាំ២០១៧នេះអ្នកជំងឺហង់សិនសម្រាកព្យាបាលនៅមជ្ឈមណ្ឌលស្តារនីតិសម្បទាគៀនឃ្លាំងចំនួន១៨៤នាក់ដោយចំណាយពេលសម្រាកព្យាបាលយ៉ាងហោចណាស់៤៣ថ្ងៃ៕
