ភ្នំពេញ ៖ រដ្ឋមន្ដ្រីក្រសួងការងារ បានបញ្ជាក់ថា ពលការិនីក្រុមទីមួយ នឹងបញ្ជូនទៅកាន់ប្រទេសម៉ាឡេស៊ី ក្នុងអំឡុងដើមខែមិថុនា ឆ្នាំ២០១៨។ រដ្ឋមន្ដ្រីបង្ហាញជំនឿចិត្ដយ៉ាងមុតមាំថា ការបញ្ជូនពលករ កម្ពុជាទៅប្រទេសម៉ាឡេស៊ីលើកនេះ នឹងមិនមានបញ្ហាប្រឈមអ្វីទាំងអស់ ព្រោះរាជរដ្ឋាភិបាលកម្ពុជា បានកំណត់លក្ខខណ្ឌច្បាស់លាស់ មុនពេលបញ្ជូនពលការិនីទាំងនោះ។
លោក លៀ ស៊ីណា រាយការណ៍៖
ការបញ្ជាក់របស់រដ្ឋមន្ដ្រីក្រសួងការងារដូចនេះ ធ្វើឡើងក្នុងជំនួបទ្វេភាគី សំដៅពង្រឹងការអនុវត្ដអនុស្សរណៈ នៃការយោគយល់គ្នាស្ដីពីការជ្រើសរើស និងគ្រប់គ្រងពលករខ្មែរ ទៅធ្វើការនៅប្រទេសម៉ាឡេស៊ី រវាងលោករដ្ឋមន្ដ្រីក្រសួងការងាកម្ពុជា ជាមួយ រដ្ឋមន្ដ្រីក្រសួងធនធានមនុស្ស នៃប្រទេសម៉ាឡេស៊ីលោក Dato’Sri Richard Riot AnakJaem នៅសណ្ឋាគារសូហ្វីតែល ភ្នំពេញ នៅថ្ងៃទី២៣ ខែមករា ។
ក្រោយបញ្ចប់ជំនួបទ្វេភាគីនេះ លោករដ្ឋមន្ដ្រី អ៊ិត សំហេង បានថ្លែងប្រាប់អ្នកសារព័ត៌មានថា នៅថ្ងៃទី០១ ខែមិថុនា ខាងមុខនេះ គឺជាការបញ្ជូនពលការិនីខ្មែរ ទៅធ្វើការងារនៅប្រទេសម៉ាឡេស៊ីជាថ្មី ក៏ប៉ុន្ដែនៅពេលនេះលោកមិនទាន់អាចប្រាប់ពីចំនួនជាក់លាក់បាននៅឡើយទេ ដោយត្រូវរង់ចាំក្រោយពេលពលករខ្មែរដែលដាក់ពាក្យទៅធ្វើការនៅប្រទេសម៉ាឡេស៊ី បញ្ចប់វគ្គបណ្ដុះបណ្ដាលជាមុនសិន។
បន្ថែមពីនេះរដ្ឋមន្ដ្រីក្រសួងការងារ បានអះអាងយ៉ាងមុតមាំថា ការបញ្ជូនពលការិនីខ្មែរទៅប្រទេសម៉ាឡេស៊ីជាថ្មីនេះ នឹងមិនមានបញ្ហាកើតឡើងឡើយ ដោយលោកសំអាងថា មុនពេលបញ្ជូនពលករខ្មែរទៅម៉ាឡេស៊ី ពួកគេបានទទួលវគ្គបណ្ដុះបណ្ដាល ហើយក្រសួងការងារ ត្រួតពិនិត្យមើលកិច្ចសន្យាការងារ និងផ្ដល់ឱកាសឲ្យពលករពលការិនីខ្មែរទាំងអស់ ជាអ្នកសម្រេចចិត្ដជ្រើសរើសកន្លែងដែលពួកគេចង់ទៅ។
លោក អ៊ិត សំហេង ៖«ខ្ញុំក៏សូមបញ្ជាក់ដែរថា ដោយការយកចិត្ដទុកដាក់ដល់បញ្ហានេះ ឥឡូវនេះរាជរដ្ឋាភិបាលកម្ពុជាយើងបានចាត់បញ្ជូន ទីប្រឹក្សាពីររូបដើម្បីទៅធ្វើការអបស្ថានទូតយើងនៅឯម៉ាឡែស៊ី ដើម្បីជាដៃគូ ដោះស្រាយបញ្ហាផ្សេងៗ ជាមួយម៉ាឡេស៊ី»។
ជាមួយគ្នានេះលោក រដ្ឋមន្ដ្រីក្រសួងធនធានមនុស្ស នៃប្រទេសម៉ាឡេស៊ី លោក Dato’Sri Richard Riot AnakJaem បានអះអាងតាមរយៈអ្នកបកប្រែថា ការអនុញ្ញាតឲ្យមានការបញ្ជូនពលករខ្មែរទៅប្រទេសម៉ាឡេស៊ីជាថ្មីនេះ ពួកគេនឹងត្រូវបានការពារដោយច្បាប់ ដោយពិនិត្យយ៉ាងល្អិតល្អន់ក្នុងអនុស្សារណៈ រវាងរដ្ឋាភិបាលម៉ាឡេស៊ី និងរដ្ឋាភិបាលកម្ពុជា។ លោកបន្ដថា ច្បាប់ដែលមានចែងក្នុងអនុស្សរណៈយោគយល់គ្នារវាងកម្ពុជានេះ ក៏ជាឯកសារស្ដង់ដាមួយ បានធ្វើឡើងរវាងប្រទេសជាច្រើនទៀតផងដែរ។ លោករដ្ឋមន្ដ្រីក្រសួងធនធានមនុស្ស ម៉ាឡេស៊ី ជឿជាក់ថា អនុស្សារណៈរវាងម៉ាឡេស៊ី និងកម្ពុជានេះ រួមជាមួយនឹងច្បាប់នៃប្រទេសម៉ាឡេស៊ី នឹងអាចការពារពលករខ្មែរមិនឲ្យមានការរំលោភបំពាន់អ្វីឡើយ។
លោក Dato’Sri Richard Riot AnakJaem ៖«អនុស្សរណៈយោគយល់គ្នារវាងកម្ពុជា និងប្រទេសម៉ាឡេស៊ីហ្នឹងគឺពលរដ្ឋខ្មែរដែលទៅធ្វើការនៅប្រទេសម៉ាឡេស៊ីហ្នឹង គឺនឹងទទួលបាននូវការការពារបន្ថែមពីលើច្បាប់ការងារនៃប្រទេសម៉ាឡេស៊ី ឬក៏ច្បាប់ ឬក៏អនុញ្ញាអន្ដរជាតិរបស់អង្គការ ilo»។
សូមជម្រាបថា បច្ចុប្បន្ននេះ ប្រទេសម៉ាឡេស៊ី មានពលករបរទេស កំពុងធ្វើការងារប្រមាណ ១លាន ៧សែននាក់ ដែលធ្វើការងារលើវិស័យ ឧស្សាហកម្ម ផលិតកម្ម និងការងារតាមផ្ទះ។ ចំពោះពលករខ្មែរដែលធ្វើការងារស្របច្បាប់នៅប្រទេសម៉ាឡេស៊ីគិតមកដល់ចុងឆ្នាំ២០១៧ នេះ មានចំនួនប្រមាណជាង ៨០០០នាក់។
គួររឮកថា នេះគឺជាគម្រោងថ្មីរបស់រាជរដ្ឋាភិបាលកម្ពុជា ដែលត្រៀមបញ្ជូនពលករពលការិនីខ្មែរទៅបម្រើការងារនៅក្នុងប្រទេសម៉ាឡេស៊ី បន្ទាប់ពីរាជរដ្ឋាភិបាលបានសម្រេចបញ្ឈប់អស់រយៈពេល ៦ឆ្នាំ ក្រោយពេលមានរបាយការណ៍ជាច្រើនបង្ហាញពីការរំលោភបំពានសិទ្ធិការងារ ការធ្វើទុក្ខបុកម្នេញ ការបង្ខំរំលោភ និង ការធ្វើទារុណកម្ម ពីសំណាក់ក្រុម្ចាស់ផ្ទះម៉ាឡេស៊ី មកលើស្ដ្រីខ្មែរដែលជាជំនួយការមេផ្ទះ៕
