ភ្នំពេញ៖ សម្តេច ស ខេង រដ្ឋមន្ត្រីក្រសួងមហាផ្ទៃបានលើកឡើងថា រដ្ឋាភិបាលគ្រោងធ្វើវិសោធនកម្មច្បាប់ស្តីពីអន្តោប្រវេសន៍ និងច្បាប់ស្តីពីសញ្ជាតិ ឬឈានទៅធ្វើច្បាប់ថ្មីដើម្បីដើរឲ្យទាន់នឹងសភាពការណ៍ នៃការប្រែប្រួលរបស់សង្គមកម្ពុជាបច្ចុប្បន្ននេះ។
ការលើកឡើងរបសរដ្ឋមន្រ្ដីក្រសួងមហាផ្ទៃដូចនេះ នៅក្នុងពិធីបិទសន្និបាតត្រួតពិនិត្យលទ្ធផលការងារអត្តសញ្ញា ណកម្ម រយៈពេល៣ឆ្នាំ(២០១៤-២០១៧) និងលើកទិសដៅការងារបន្ដ របស់អគ្គនាយកដ្ឋានអត្តសញ្ញាណកម្ម ។
ថ្លែងក្នុងពិធីនេះ កាលពីរសៀលថ្ងៃទី២២ ខែមករា ឆ្នាំ២០១៨ ទីស្តីការក្រសួងមហាផ្ទៃ សម្ដេច ស ខេ ង បានឱ្យដឹងបន្ដថា ក្រសួងកំពុងរៀបចំនូវលិខិតស្នាមផ្សេងៗដើម្បីបង្កើតនូវក្រុមការងារដើម្បីធ្វើវិសោធនកម្មច្បាប់ទាំងពីរនេះ ។
រដ្ឋមន្ត្រីក្រសួងមហាផ្ទៃរូបនេះ បានបញ្ជាក់ថា “ ពាក់ព័ន្ធនឹងច្បាប់ទាំងពីរនេះដែរ កាលពីពេលថ្មីៗនេះ ក្រសួងបានទទួលអនុសាសន៍របស់នាយករដ្ឋមន្ត្រីនៃព្រះរាជាណាចក្រកម្ពុជា ដើម្បីពិនិត្យមើលចំពោះច្បាប់នេះផងដែរ ”។
ជុំវិញរឿងនេះដែរ អគ្គនាយកដ្ឋានអត្ដសញ្ញាណកម្ម លោក ម៉ៅ តារា បានផ្ដល់បទសម្ភាសន៍ឱ្យវិទ្យុស្រ្ដី FM 102 ដឹងបន្ថែមលើរឿងនេះថា ការធ្វើវិសោធនកម្មច្បាប់ស្តីពីអន្តោប្រវេសន៍ និងច្បាប់ស្តីពីសញ្ជាតិគឺកំពុងស្ថិតនៅក្នុងការសិក្សាស្រាវជ្រាវ ដែលមិនទាន់អាចនិយាយបានថា ចំនុចណាដែលយកមកកែប្រែនិងធ្វើថ្មីនោះទេ។
លោក ម៉ៅ តារា៖ «ដោយសារតែច្បាប់របស់យើងនេះ ត្រូវបានបង្កើតតាំងពីឆ្នាំ១៩៩៤ ចឹងឥលូវប្រៀបធៀបមកសភាការណ៍បច្ចុប្បន្ននឹងការវិវឌ្ឍន៍របស់ប្រទេសជាតិយើង ស្ថានភាពនយោបាយ សេដ្ឋកិច្ចសង្គមរបស់ប្រទេសយើង ចឹងចាំបាច់ត្រូវតែធ្វើការសិក្សាស្រាវជ្រាវដើម្បីផ្ដើមយោបល់ជូនរាជរដ្ឋាភិបាលធ្វើវិសោធនកម្មនេះ»។
តាមអគ្គនាយកដ្ឋានអត្ដសញ្ញាណកម្មរូបនេះ រាជរដ្ឋាភិបាលនឹងរៀបចំក្រុមការងារមួយដើម្បីធ្វើការទៅលើរៀបចំច្បាប់ទាំងពីរខាងលើនេះ នៅ១សប្ដាហ៍ ឬ២សប្ដាហ៍ក្រោយនេះ៕
