ភ្នំពេញ៖ក្រុមអភិរក្សដើរល្បាតព្រៃក្នុងដែនជម្រកសត្វព្រៃកែវសីមាដឹកនំាដោយក្រសួងបរិស្ថាននិងអង្គការសហគមអភិរក្សសត្វព្រៃរួមទំាងប្រជាសហគមន៍បានរឹបអូសអន្ទាក់ដាក់សត្វព្រៃជាង៥០០ខ្សែ ម៉ាស៊ីអាឈើឬរណាយន្តជាង៨០គ្រឿង កំាភ្លើងកែច្នៃនិងជនល្មើជាច្រើននាក់ ក្នុងដែនជម្រកសត្វព្រៃកែវសីមា។ លោក ធូ វិរៈ ជូនសេចក្តីរាយការណ៍
បើយោងតាមសេចក្តីជូនដំណឹងរបស់អង្គការសហគមអភិរក្សសត្វព្រៃ(WCS)ចុះផ្សាយនៅថ្ងៃទី២២ ខែមករានេះបញ្ជាក់ថាក្នុងរយៈពេលមួយឆ្នំា២០១៧ក្រុមល្បាតសហគមន៍ដែលគំាទ្រដោយអង្គការWCSនិងក្រសួងបរិស្ថានបានចុះល្បាតចំនួន៥២លើកដើម្បីការពារនិងទប់បទល្មើសព្រៃឈើនិងការបរបាញ់សត្វព្រៃ។
ជាលទ្ធផលក្រុមល្បាតបានឃាត់ខ្លួនមនុស្ស៧នាក់និងធ្វើលិខិតព្រមាន៥៧ចំពោះអ្នកប្រព្រឹត្តសកម្មភាពខុសច្បាប់ក្នុងដែនជម្រកសត្វព្រៃកែវសីមានិងរឹបអូសរណាយន្ត៨៦គ្រឿង អន្ទាក់៥១៣ខ្សែ កំាភ្លើងកែច្នៃ៦ដើម កំាបិត ពូថៅ៧២និងម៉ូតូ១៧គ្រឿង។
លោក អែម ត្រាយ ប្រធានក្រុមសម្របសម្រួលការដើរល្បាតសហគមន៍ប្រចំាដែនជម្រកសត្វព្រៃកែវសីមា ឲ្យដឹងក្នុងសេចក្តីប្រកាសព័ត៌មានថាក្រុមល្បាតប្តេជ្ញាបន្តសកម្មភាពដើរល្បាតដើម្បីការពារនិងទប់ស្កាត់ បទល្មើសព្រៃឈើក្នុងដែនជម្រកនេះ។
លោក អែម ត្រាយ សង្កេតឃើញថាប្រជាជនកាន់តែច្រើនឡើងបានចូលរួមស្ម័ត្រចិត្តចូលរួមជាមួយក្រុមល្បាតសហគមន៍ដោយសារពួកគេយល់ច្បាស់អំពីផលប្រយោជន៍ព្រៃឈើនិងសត្វព្រៃ។ លោកត្រាយអំពានាវដល់ប្រជាជននិងអាជ្ញាធរសហការគ្នាដើម្បីការពារធនធានធម្មជាតិឲ្យនៅគងវង្ស។
ដែនជម្រកសត្វព្រៃកែវសីមាស្ថិតនៅក្នុងខេត្តក្រចេះនិងមណ្ឌលគិរីជាទីជម្រកសត្វព្រៃនិងរុក្ខាជាតិជាង៦០ប្រភេទស្ថិតនៅក្នុងបញ្ជីក្រហមរបស់អង្គការIUCN។ធនធានកម្រទំាងនេះកំពុងប្រឈមនឹងគំរាមកំហែងឈានទៅរកការផុតពូជដូចជាសត្វស្វាកន្ទុយស ទោចថ្ពាល់លឿង ខ្លា ដំរីព្រៃ ក្រុមគោសាទិសនិងសត្ចស្លាបជាប្រភេទទៀត។
លោក តាន់ សេដ្ឋា ទីប្រឹក្សាបច្ចេកទេសអង្គការ WCSឲ្យដឹងថាក្រោមកញ្ចប់ថវិកានៃការលក់ឥណទានកាបូននិងម្ចាស់ជំនួយក្រសួងបរិស្ថាននិងអង្គការWCSផ្តល់ធនធានមនុស្សបច្ចេកទេសនិងថវិកាដល់ក្រុមល្បាតសហគមន៍ក្នុងរយពេល១៥ឆ្នំាដើម្បីអភិរក្សធនធានធម្មជាតិនិងជីវជម្រុះក្នុងដែនជម្រកសត្វព្រៃកែវ សី មា៕
