ជីវៈព័ត៌មាន៖ នៅក្នុងការងារជាមេធាវីជិត ១៥ ឆ្នាំ លោក ជួង ជូងី មានបំណងមួយស្វែងរកយុត្ដិធម៌ជួយដល់ជនរងគ្រោះក្នុងសង្គម។ ប៉ុន្ដែនៅក្នុងការងារជាមេធាវី លោក ជួង ជូងី ដូចជាមិនសូវជាទទួលបានជោគជ័យឡើយ។
ដោយសារហេតុនេះ លោកត្រូវបានគេអោយរហ័ស្សនាមថា ជាមេធាវីដែលកម្រឈ្នះក្ដី។ យ៉ាងណាក៏ដោយ លោក ជូង ជូងី ហាក់ដូចជា មិនសូវខ្វល់ តែផ្ទុយទៅវិញលោកមានមោទនភាពចំពោះការងាររបស់លោកកាន់តែខ្លាំងដោយសន្យាបន្ដការងាររបស់លោកជាមេធាវីនេះបន្តទៀត។ ដោយពេលខ្លះធន់ថប់ លោក មេធាវី បានសម្រេចបួសជាសង្ឃមួយរយៈទៀតផង។
ទោះជាយ៉ាងណា លោក បានចែករំលែកបទពិសោធន៍របស់លោកវិញថា បើចង់ធ្វើមេធាវីកុំធ្វើជំនួញ បើធ្វើជំនួញកុំធ្វើមេធាវី។
តើមានន័យយ៉ាងដូចម្ដេច ហើយមានមូលហេតុអ្វីបានជាលោកមេធាវី ជួង ជូងី លើកឡើងដូចនេះ?
ជាបន្ដសូមអញ្ជើញស្ដាប់ជីវៈព័ត៌មានដែលចងក្រងដោយកញ្ញា ជុំ ជោគជាតា ដូចតទៅ៖
ដោយសារស្អប់អំពើឈ្លានពាននឹងធ្វើទុក្ខទោសម្នេញដល់អ្នកស្លូតត្រង់ លោក ជូង ជូងី ពីនិស្សិតរូបវិទ្យាម្នាក់មករៀនមុខវិជ្ជាផ្នែកច្បាប់រហូតបានក្លាយជាមេធាវី នៅក្នុងឆ្នាំ២០០៣ ។ ក្នុងវ័យ ៤៩ ឆ្នាំ លោកមេធាវី ជូង ជូងី ទទួលការពារគ្រប់រឿងក្ដីស្ទើរគ្រប់បទល្មើស ជាពិសេស សំណុំរឿងដែលមានចរិតនយោបាយ។
លោកការពារក្ដីអោយទាំង មន្ត្រីសង្គមស៊ីវិល សកម្មជន និងមន្ត្រីគណបក្សនយោបាយ រួមទាំងអ្នកវិភាគរិះគន់បញ្ហាក្នុងសង្គមជាដើម។
លោក ជួង ជូងី៖«ទូទៅ ប៉ុន្ដែភាគច្រើនក៏មានរឿងច្រើនដែរដែលគាត់ជាសកម្មជននយោបាយ ហើយនិងជាសកម្មជនដែលគាត់មានសកម្មភាពតស៊ូមតិខ្លាំងនៅក្នុងសង្គមដើម្បីទាមទារសិទ្ធដីធ្លី សិទ្ធមនុស្ស »។
លោក ជូង ជូងីបានប្រាប់បន្ដថា រឿងក្ដីដែលលោកពិបាកការពារជាងគេ និងមិនដែលឈ្នះ គឺ រឿងក្ដីរវាងអាជ្ញាធរ និងពលរដ្ឋសាមញ្ញ ហើយនឹងរឿងនយោបាយ។
លោក ជូង ជូងី ៖ «រឿងពិបាកជាងគឺជាប្រភេទរឿងក្ដីពាក់ព័ន្ធរឿងសកម្មជននយោបាយ និងសកម្មជនដីធ្លី ឬសកម្មជនដែលគាត់ហ៊ានតវ់ាដូចជារឿងគឹម សុខ ឬ ផន សុផានី ចឹងជាប្រភេទរឿងក្ដីដែលភាគីអ្នកប្ដឹងណឹងជាភាគីអាជ្ញាធរ នេះគឺជារឿងដែលលំបាក ហើយបែរនិយាយពីរឿងលទ្ធផលជាទម្រង់វិញរឿងនយោបាយ រឿងសកម្មមិនដែលឈ្នះទេ ទោះបីទៅដល់កំពូលក៏ដោយ»។
តាម លោក ជូង ជូងី កាលពីឆ្នាំ២០១៧ លោកបានបួសជាសង្ឃ នៅក្នុងវត្តមួយ នៅឯខេត្តសៀមរាប ដែលនៅពេលនោះលោកបានដកឃ្លា រយៈពេល ២ ទៅ ៣សប្ដាហ៍ ពីការងារជាមេធាវី ។ លោក ជូង ជូងី បញ្ជាក់ថា ការបួសនៅពេលនោះ គឺដើម្បីស្វែងរកភាពស្ងប់ស្ងាត់និងធម៌បរិសុទ្ធ។
លោក ជូង ជូងី ៖«និយាយភាសាយ៉ាងខ្លីថា ស្វែងរកធម៌បរិសុទ្ធ ប្រតិបត្តធម៌បរិសុទ្ធ »។
កត់សម្គាល់ឃើញថា បើទោះបីការងារដែលលោកមេធាវី ជួង ជូងី ធ្វើត្រូវប្រើប្រាស់ភាពអត់ធ្មត់ និងភាពប្រថុនប្រថានខ្លាំង ប៉ុន្ដែ លោក ហាក់ដូចជាមិនមានភាពខ្លាចរអា ឬថយក្រោយ ចំពោះការងារដែលលោកស្រឡាញ់នោះទេ។
លោក ជូង ជូងី ៖«លុះត្រាតែការងារផ្សេងទៀតដែលខ្ញុំមានឱកាសទៅធ្វើ ហើយដែលអាចជួយយុត្ដិធម៌ក្នុងសង្គមបានល្អជាងមេធាវី នោះខ្ញុំទៅ »។
ក្នុងអាជីពជាមេធាវី តាំងពីឆ្នាំ ២០០៣ គេសង្កេតឃើញថា រយៈពេល ១៥ ឆ្នាំមកនេះ លោក ជូង ជូងី បានការពាររឿងក្ដីជាច្រើន ក្នុងនោះរួមមានសំណុំរឿងលោក ដាំ សិទ្ធិ និពន្ធនាយកកាសែតមនសិការខ្មែរ ដែលត្រូវប្ដឹងពីបទផ្សាយព័ត៌មានមិនពិតបរិហារកេរ្តិ៍ឧបនាយករដ្ឋមន្ត្រី ហោ ណាំហុង។
សំណុំរឿងរដ្ឋាភិបាលប្ដឹងអតីតប្រធានគណបក្សប្រឆាំង លោក សម រង្ស៊ី ក្នុងរឿងដកតម្រុយបង្គោលព្រំដែននៅខេត្តស្វាយរៀង កាលពីឆ្នាំ២០០៩។
សំណុំរឿងអ្នកតំណាងរាស្ត្រ មន្ត្រី និងសកម្មជនគណបក្សប្រឆាំងក្នុងរឿងអំពើហិង្សានៅទីលានប្រជាធិបតេយ្យកាលពីឆ្នាំ២០១៣ និងអូសបន្លាយមកដល់ពេលនេះ។
សំណុំរឿងអតីតប្រធានគណបក្សប្រឆាំង លោក សម រង្ស៊ី តំណាងរាស្ត្រ អ៊ុំ សំអាន និងព្រឹទ្ធសភា លោក ហុង សុខហួរ និងរឿងផែនទី និងព្រំដែនរវាងកម្ពុជា និងវៀតណាម ដែលត្រូវរដ្ឋាភិបាលប្ដឹងចោទប្រកាន់ក្នុងឆ្នាំ ២០១៥។
សំណុំរឿងប្រធានគណបក្សសង្គ្រោះជាតិ លោក កឹម សុខា ដែលត្រូវប្ដឹងពីការមិនទទួលស្គាល់ប្រវត្តិសាស្ត្រខ្មែរក្រហមកាលពីឆ្នាំ២០១៣ និងសំណុំរឿងអាស្រូវស្នេហាដែលត្រូវចោទប្រកាន់ជាមួយនាង ខុម ចាន់តារាទី ហៅស្រីមុំ ដែលកើតឡើងកាលពីឆ្នាំ២០១៦ ជាដើម។
ក្នុងពេលថ្មីៗនេះ លោក ជូង ជូងី បានទទួលការពារក្ដីឲ្យ លោក គឹម សុខ ដែលប្ដឹងដោយលោកនាយករដ្ឋមន្ត្រី ហ៊ុន សែន សំណុំរឿងចៅសង្កាត់ដែលមានដើមកំណើតខ្មែរក្រោម លោក ចៅ វាសនា និងសំណុំរឿងព្រះសង្ឃលេងកាំភ្លើងជ័រ ព្រះតេជគុណ ហន សុផាន្នី នៅខេត្តបាត់ដំបងផងដែរ។
ក្នុងអាជីពជាមេធាវី លោក ជូង ជូងី មានគំនិតមួយរកយុត្ដិធម៌ជូនអ្នកស្លូតត្រង់តាមដែលលោកអាចធ្វើទៅបាន។
លោក ជួង ជូងី៖«តាមពិតទៅនិស្ស័យរបស់ខ្ញុំតាំងពីក្មេងមក ខ្ញុំស្អប់ការឈ្លានពានការបំពាន ខ្ញុំមានគំនិតចង់ការពារយុត្ដិធម៌ ការពារជនស្លូតត្រង់ កុំអោយមានការបំពាន ហើយការវិវត្តន៍ក្នុងវ័យរបស់ខ្ញុំពីក្មេងរហូតដល់ចាស់ទៅៗ ខ្ញុំឃើញថា មានការបំពានកាន់តែច្រើនទៅនៅពេលដែលអាយុកាន់តែច្រើន រៀនកាន់តែច្រើនកាន់តែឃើញអាការបំពានកាន់តែខ្លាំងទៅ។ ដូច្នេះបំណងឬក៏ឆន្ទៈក្នុងជីវិតចង់កុំអោយមានការបំពានចង់អោយមានយុត្ដិធម៌ហើយការដែលឈានចូលមកធ្វើជាមេធាវីក្នុងគោលបំណងរបស់ខ្ញុំ ប្រើចំណេះ និងសមត្ថភាពរបស់ខ្ញុំជួយវិស័យយុត្ដិធម៌នៅក្នុងសង្គម។ចឹងគោលដៅចំបងចិញ្ចឹមជីវិតរបស់ខ្ញុំគឺយុត្ដិធម៌សង្គមជាចំបង»។
នៅក្នុងខ្លឹមសារកិច្ចសម្ភាសមួយជាមួយវិទ្យុស្រ្ដីFM 102 នៅថ្ងៃទី ២៣ ខែមករា ឆ្នាំ២០១៨នេះលោក ជូង ជូងី បញ្ជាក់ថា មុននឹងបញ្ចប់បរិញ្ញាបត្រផ្នែកច្បាប់ លោកបានបញ្ចប់បរិញ្ញាបត្ររូបវិទ្យានៅក្នុងឆ្នាំ១៩៩៥ ។
ដោយឡែកឆ្នាំ១៩៩៩ លោកជូង ជូងី ក៏បានបញ្ចប់បរិញ្ញាបត្រច្បាប់មួយទៀត។ ដោយសារឆន្ទៈស្អប់អំពើឈ្លានពាន និងស្រលាញ់យុត្ដិធម៌នៅឆ្នាំ២០០២ លោក ជូង ជូងី ក៏បានសម្រេចចិត្តចូលប្រឡងធ្វើជាមេធាវី។
លោក ទទូចថា មុខរបរជាមេធាវី ជារដ្ឋអាជ្ញាក្ដី ជាចៅក្រមក្ដី គឺជាអ្នកជួយរកយុត្តិធម៌របស់មនុស្ស បើគិតថាជាជំនួញមួយដូចអ្នកលក់ដូរដែរ គឺ មិនគម្បីទេ។
លោកជួង ជូងី ៖« ដូចគ្នាដែរ ខ្ញុំក៏មានគំនិតមួយចំនួនចង់ផ្ដាំផ្ញើទៅអ្នកច្បាប់ដែរទាំងមេធាវី ទាំងមន្រ្ដីតុលាការដែរ នៅពេលដែលយើងអនុវត្ដវិស័យច្បាប់ទោះបីក្នុងតួនាទីជាមេធាវីក្ដី ជាចៅក្រមក្ដី ជាព្រះរាជអាជ្ញាក្ដី គឺដាក់គោលដៅយុត្ដិធម៌ជាចំបង ចៀសវាងទៅប្រព្រឹត្តអំពើពុករលួយយកវិជ្ជាជីវៈរបស់ខ្លួនដែលជាវិជ្ជាជីវៈខ្ពង់ខ្ពស់ដែលសង្គមមានជំនឿ ឬក៏មានទំនុកចិត្ត បែរ ជាទៅប្រព្រឹត្តផ្ដេសផ្ដាសបំពានដើម្បីបំពេញតណ្ហា ឬក៏ភាពលោភៈរបស់ខ្លួន នេះគឺវាខុសធ្ងន់ណា បែរនិយាយពីជំនឿសាសនាវិញគេហៅថា បាបធ្ងន់ណាស់ ។ចឹងបើបានជាខ្លួនធ្វើមេធាវី ឬក៏ធ្វើជាចៅក្រម ធ្វើជាព្រះរាជអាជ្ញាទៅហើយ គួរតែបំពេញតួនាទីរបស់ខ្លួនអោយបានល្អ កុំប្រព្រឹត្តអំពើពុករលួយ កុំប្រើតួនាទីរបស់ខ្លួនប្រព្រឹត្តកាមតណ្ហារបស់ខ្លួន ផ្ទុយទៅវិញប្រសិនបើខ្លួនមានគំនិតចង់មានចង់បានគួតែលាលែងពីការងារមេធាវី លាលែងការងារចៅក្រម ព្រះរាជអាជ្ញាទៅធ្វើជំនួញវិញទើបត្រឹមត្រូវ»។
