ភ្នំពេញ ៖ កម្មកររោងចក្រកាត់ដេរសម្លៀកបំពាក់ ហ្វឺសហ្គាវ័ន្ដ ស្ថិតនៅក្នុងសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ បានសម្រេចផ្អាកសកម្មភាពការងារ របស់ពួកគេ ដោយនាំគ្នាមកនៅខាងមុខរោងចក្រនេះ ដើម្បីរង់ចាំដំណោះស្រាយពីក្រសួងការងារ ជុំវិញថៅកែ មិនបើកប្រាក់ខែឲ្យ។
លោក លៀ ស៊ីណា រាយការណ៍៖
គិតមកដល់ថ្ងៃចន្ទ ទី១៥ មករា នេះ មានរយៈពេលជិត ៧ថ្ងៃហើយ ដែលក្រុមកម្មករ រោងចក្រកាត់ដេរសម្លៀកបំពាក់ ហ្វឺស ហ្គា វ័ន្ដ អឹមភើរែល មិនទាន់បានបើកប្រាក់ខែរបស់ពួកគេ។ លោក ផាន់ សាវ៉ុន កម្មករមួយរូបក្នុងរោងចក្រនេះ បានប្រាប់វិទ្យុស្ដ្រីអេហ្វអឹម១០២ នៅថ្ងៃនេះថា កាលពីថ្ងៃទី១០ មករា ថៅកែរោចក្រកាត់ដេរមួយនេះ បានចេញមកជួបក្រុមកម្មករ ដោយប្រាប់ថា ខ្លួនពុំមានប្រាក់ដើម្បីឲ្យកម្មករឡើយ គឺត្រូវរង់ចាំដល់ថ្ងៃទី១៣ មករា។ ក៏ប៉ុន្ដែលោក សាវ៉ុន បញ្ជាក់ថា រហូតដល់ថ្ងៃទី១៣ មករា ថៅកែបានមកជួបកម្មករជាថ្មី ហើយប្រាប់ក្រុមកម្មករថា ខ្លួនពុំមានប្រាក់បើកឲ្យកម្មករនោះទេ ត្រូវរង់ចាំដល់ថ្ងៃអង្គារិ «បើទោះជាសម្លាប់គាត់ ក៏គាត់គ្មានលុយបើកឲ្យដែរ គាត់ចង់ឲ្យចូលធ្វើការវិញទៅ ថ្ងៃអង្គារិ គាត់បើកលុយឲ្យ» តែយ៉ាងណា លោក ផាន់ សាវ៉ុន អះអាងថា កម្មករ មិនព្រមចូលធ្វើការវិញឡើយ ព្រោះថៅកែរោងចក្រនេះ តែងតែសន្យាដូចនេះ ក៏ប៉ុន្ដែពេលវេលានៃការបើកប្រាក់ខែតែងតែផ្លាស់ប្ដូរពីម្ដងទៅម្ដង។
លោក ផាន់ សាវ៉ុន ៖«យើងធ្វើការសិនវាអត់កើត ព្រោះគាត់និយាយវាពិបាកនឹងឲ្យយើងជឿ ដូចថ្ងៃមុនអញ្ចឹងគាត់និយាយថ្ងៃសៅរិ៍ ហើយដល់ថ្ងៃសៅរិ៍ គាត់និយាយដល់ថ្ងៃអង្គារិ ទៀតអញ្ចឹង»។
នៅពេលនេះក្រុមកម្មរ ដែលមានគ្នាប្រមាណ ៣៧០ នាក់ កំពុងស្ថិតនៅខាងមុខរោងចក្រ រង់ចាំមន្ដ្រីក្រសួងការងារដើម្បីចុះទៅរកដំណោះដោះស្រាយ ជុំវិញវិវាទប្រាក់ខែរបស់ពួកគេ។
វិទ្យុស្ដ្រីមិនអាចសុំការឆ្លើយតប ពីក្រសួងការងារបានទេនៅរហូតពេលនេះ ដោយទូរស័ព្ទហៅចូលក៏ប៉ុន្ដែពុំមានអ្នកទទួល។
គួរជម្រាបថា រោងចក្រកាត់ដេរសម្លៀកបំពាក់ ហ្វឺស ហ្គាវ័ន្ដ អឹមភើរែល មានបុគ្គលិកបម្រើការងារទាំងអស់ចំនួន ៣៧០នាក់ ហើយ ៩៥ភាគរយ ជាស្ដ្រី។ រោងចក្រមួយនេះ មានទីតាំងស្ថិតនៅភូមិព្រែកតាឡុង សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ។ ជារឿយៗរោងចក្រកាត់ដេរសម្លៀកបំពាក់ ហ្វឺស ហ្គា វ័ន្ដ អឹមភើរែល មួយនេះ តែងតែមានបញ្ហាបាតុកម្ម កូដកម្ម ជាញឹកញាប់ ជុំវិញលក្ខខ័ណ្ឌការងារ និងការបើកប្រាក់ខែមិនទៀតទាត់៕
