ភ្នំពេញ ៖ សត្វមាន់ចំនួន ០៣ក្បាល ត្រូបានវិទ្យាស្ថានជាតិស្រាវជ្រាវសុខភាពសត្វ បង្ហាញលទ្ធផលថា មានផ្ទុកជំងឺផ្ដាសាយបក្សី ក្នុងអនុក្រុម A1 (H5N1) កាលពីថ្ងៃទី០៩ ខែមករា។ តែយ៉ាងណាអ្នកនាំពាក្យក្រសួងសុខាភិបាលអះអាងថា មកដល់ថ្ងៃទី១៣ មករានេះ អាជ្ញាធរមិនទាន់រកឃើញមានមនុស្សណាម្នាក់ឆ្លងវីរុសនេះនៅឡើយទេ។
លោក លៀ ស៊ីណា រាយការណ៍៖
លទ្ធផលវិភាគរបស់វិទ្យាស្ថានជាតិ ស្រាវជ្រាវសុខភាពសត្វ និងផលិតកម្មសត្វ នៃអគ្គនាយកដ្ឋានសុខភាពសត្វ និងផលិតកម្មសត្វ ដែលបានធ្វើវិភាគមេរោគផ្ដាសាយបក្សី លើសំណាកសត្វមាន់ចំនួន ០៣ក្បាល ពីភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ត្រូវបានរកឃើញថា សត្វមាន់នោះមានផ្ទុកជំងឺផ្ដាសាយបក្សីដែលបង្កដោយវីរុសក្នុងអនុក្រុម A1 (H5N1)។
តាមប្រសាសន៍របស់លោកវេជ្ជបណ្ឌិត លី សូវណ្ណ អ្នកនាំពាក្យក្រសួងសុខាភិបាល ដែលបានផ្ដល់បទសម្ភាសន៍ឲ្យវិទ្យុស្ដ្រីអេហ្វអឹម១០២ នៅថ្ងៃទី១៣ មករា នេះ ឲ្យដឹងថា ពិតជាមានករណីមាន់ផ្ទុកជំងឺផ្ដាសាយបក្សី កើតឡើងនៅរាជធានីភ្នំពេញពិតមែន។ តែយ៉ាងណាលោកវេជ្ជបណ្ឌិតបញ្ជាក់ថា ក្រោយទទួលលទ្ធផលពិសោធន៍ភ្លាម ក្រុមគ្រួពេទជំនាញទាំងខាងព្យាបាលសត្វ និងមនុស្ស បានចុះទៅដល់កន្លែងភ្លាមៗ ដើម្បីធ្វើការបាញ់ថ្នាំសម្លាប់មេរោគ និងពិនិត្យតាមដានសុខភាពមនុស្ស ថា តើមានឆ្លងជំងឺផ្ដាសាយបក្ដីឬយ៉ាងណា។ លោកវេជ្ជបណ្ឌិត លី សូវណ្ណ បន្ដថា រហូតមកដល់រសៀលថ្ងៃទី១៣ មករានេះ មិនទាន់មានលទ្ធផលណាមួយបង្ហាញថា មានមនុស្សឆ្លងជំងឺផ្ដាសាយបក្សីនៅឡើយទេ។
លោកវេជ្ជបណ្ឌិត លី សូវណ្ណ ៖«បាទខាងពេទ្យសត្វ បានធ្វើបំផ្លាញ និងសម្អាតទីងតាំងហើយ ហើយខាងពេទ្យមនុស្សក៏បានតាមដានសុខភាពប្រជាពលរដ្ឋនៅទីនោះ រហូតដល់ម៉ោងខ្ញុំនិយាយនេះ (ម៉ោង ១៤៖៤០នាទី) ពុំទាន់រកឃើញថា មានឆ្លងទៅលើមនុស្សនៅឡើយទេ។ តែយ៉ាងណាយើងនៅតែបន្ដតាមដានសុខភាពរបស់គាត់រយៈ២អាទិត្យទៀត ក្រោយពីសម្អាតនោះ»។
សត្វមាន់ដែលឆ្លងជំងឺផ្ដាសាយបក្សីនាពេលនេះ ត្រូវបានសង្ស័យថា ទំនងឆ្លងពីមាន់នាំចូលពីតំបន់ដែលធ្លាប់មានផ្ទុះជំងឺផ្ដាសាយបក្សី។ យ៉ាងណាការរកឃើញសត្វមាន់ឆ្លងជំងឺផ្ដាសាយបក្សីនៅភូមិភ្នំពេញថ្មី រាជធានីភ្នំពេញនាពេលនេះ គឺជាទីតាំងទី០៤ ហើយ ដែលសត្វមាន់បានកើតជំងឺផ្ដាសាយបក្សីពីរ ទីតាំង ស្ថិតនៅខេត្ដកំពង់ចាម និង១ ទីតាំងទៀតស្ថិតនៅខេត្ដកំពង់ធំ។
ជាមួយគ្នានេះ លោកវេជ្ជបណ្ឌិត លី សូវណ្ណ សំណូមពរដល់ប្រជាពលរដ្ឋគ្រប់រូប ត្រូវបង្កើនការប្រុងប្រយ័ត្ន ដើម្បីកុំឲ្យឆ្លងជំងឺផ្ដាសាយបក្សី។ លោកបន្ដថា នេះគឺជារដូវកាលអាកាសធាតុចុះត្រជាក់ និងជារដូវដែលសម្បូរពិធីបុណ្យ ដូច្នេះគឺនឹងមានការដឹកនជញ្ជូនសត្វមាន់ ទា ច្រើន ដែលងាយនឹងបង្កឲ្យឆ្លងជំងឺផ្ដាសាយបក្សី។ លោកសំណូមពរដល់ពលរដ្ឋ នៅពេលដែលឃើញសត្វមាន់ ឬទា ឈឺងាប់ជាបន្ដបន្ទាប់ សូមកុំយកមកបរិភោគ ឬលក់បន្ដ ហើយត្រូវផ្ដល់ព័ត៌មានទៅកាន់អាជ្ញាធរដែលនៅជិតបំផុត ឬហៅទូរស័ព្ទទៅកាន់លេខ ១១៥ ដើម្បីរាយការណ៍ករណីជំងឺរាត្បាត។
លោក វេជ្ជបណ្ឌិត លី សូវណ្ណ ៖«ទោះជាយ៉ាងណាក៏ដោយ ប្រជាពលរដ្ឋត្រូវប្រុងប្រយ័ត្នបន្ដទៀត ព្រោះរដូវនេះជារដូវត្រជាក់ ហើយនឹងជារដូវដែលមានពិធីច្រើនដូច្នេះការដឹកជញ្ជូនមាន់ ទា ច្រើន។ ដូច្នេះឱកាសនៃការឆ្លងគឺអាចកើតមាន ដូច្នេះសូមបងប្អូន បើឃើញមាន់ ទា ឈឺងាប់ក្នុងភូមិ សូមកុំយកមកបរិភោគ ឬមួយលក់បន្ដ ដើម្បីកុំឲ្យជំងឺហ្នឹងដែលកើតមានហើយ ហើយរាលដាលដល់តំបន់ដទៃទៀត»។
អ្នកដែលមានរោគសញ្ញាគ្រុនក្ដៅ លើសពី ៣៨.៥អង្សារសេ និងមានរោគសញ្ញា ក្អក ឬឈឺក ឬក៏ដកដង្ហើមហត់ ហើយមានប្រវត្ដិ ធ្លាប់ប៉ះពាល់ជាមួយសត្វបក្សី ឈឺ ឬងាប់ ក្នុងអំឡុងពេល ៧ថ្ងៃ មុនពេលចេញរោគសញ្ញា គឺចាត់ទុកថា ជាករណីសង្ស័យឆ្លងជំងឺផ្ដាសាយបក្សី។ ពលរដ្ឋត្រូវរួតរះ បញ្ជូនអ្នកជំងឺ ទៅកាន់មណ្ឌលសុខភាព ឬមន្ទីរពេទ្យ ដែលនៅជិតបំផុតដើម្បីធ្វើការតាមដាន និងព្យាបាល ។
គួរជម្រាបថា ចាប់តាំងពីឆ្នាំ២០០៥ ដល់ឆ្នាំ ២០១៤ ក្នុងប្រទេសកម្ពុជា ជំងឺផ្ដាសាយបក្សីបានឆ្លងពីសត្វបក្សីមកមនុស្សចំនួន ៥៦ករណី ដែលក្នុងនោះមាន ៣៧ករណីបានស្លាប់ នេះបើយោងតាមរបាយការណ៍របស់នាយកដ្ឋានប្រយុទ្ធនឹងជំងឺឆ្លង។ នៅក្នុងឆ្នាំ ២០១៣ មានករណីមនុស្សឆ្លងជំងឺផ្ដាសាយបក្សីចំនួន ២៦ករណី ហើយបង្កឲ្យស្លាប់ ១៤ករណី និងនៅក្នុងឆ្នាំ២០១៤ មានករណីមនុស្សឆ្លងជំងឺផ្ដាសាយបក្សីចំនួន ៩ករណី និងបានបង្កឲ្យស្លាប់ចំនួន ៤ករណី៕
