ភ្នំពេញ៖ តុលាការកំពូលនៅថ្ងៃពុធនេះ បានបើកសវនាការជំនុំជម្រះរឿងក្ដីរបស់លោក គឹម សុខ ដែលបានប្ដឹងជំទាស់ទៅនឹងការសម្រេចរបស់តុលាការក្រុងភ្នំពេញ និងសាលាឧទ្ធរណ៍ ពាក់ព័ន្ធនឹងសំណុំរឿងចោទគណបក្សប្រជាជនកម្ពុជាសម្លាប់លោកបណ្ឌិតកែមឡី។នេះបើតាមសេចក្ដីបង្គាប់ឱ្យចូលខ្លួនរបស់តុលាការកំពូលដែលបានផ្សព្វផ្សាយជាសាធារណៈនៅថ្ងៃទី ១០ ខែមករា ឆ្នាំ២០១៨នេះ។
តាមសេចក្ដីបង្គាប់នេះបញ្ជាក់ថា សវនាការជំនុំជម្រះរឿងក្ដីរបស់លោក គឹម សុខបានប្រព្រឹត្តទៅនៅម៉ោង ៨ព្រឹក នៅថ្ងៃទី ១០ ខែមករា ឆ្នាំ២០១៨នេះ ដែលដឹកនាំដោយលោកស្រី គិម សត្ថាវី ជាប្រធានក្រុមប្រឹក្សាជំនុំជម្រះ និង លោក ឈួន ចាន់ថា ជាតំណាងមហាអយ្យការ ។
លោក គឹម សុខ ត្រូវបានសាលាដំបូងរាជធានីភ្នំពេញ និង សាលាឧទ្ធរណ៍ សម្រេចដូចគ្នាឱ្យជាប់ពន្ធនាគារ ចំនួន ១៨ខែ ដោយពិន័យជាប្រាក់ចំនួន ៨លានរៀល និងសងសំណងជំងឺចិត្តដល់សម្តេច ហ៊ុន សែន នាយករដ្ឋមន្ត្រីកម្ពុជាដែលជាដើមបណ្ដឹងរដ្ឋប្បវេណី ចំនួន៨០០លានរៀល ក្រោមការចោទប្រកាន់ពីបទ«ញុះញង់ឱ្យប្រព្រឹត្តបទឧក្រិដ្ឋជាអាទិ៍ និង បទបរិហារកេរ្តិ៍ជាសាធារណៈ» តាមមាត្រា៤៩៤ មាត្រា៤៩៥ និង មាត្រា៣០៥ នៃក្រមព្រហ្មទណ្ឌ ។
បច្ចុប្បន្នលោក គឹម សុខ នៅជាប់បណ្តឹងមួយទៀត ដែលប្តឹងដោយសម្តេចហ៊ុន សែន ដូចគ្នា គឺពាក់ព័ន្ធនិងលោក គឹម សុខ ចោទប្រកាន់ថា រាជរដ្ឋាភិបាលកម្ពុជាបានបង្កើតប្រព័ន្ធសម្លាប់មនុស្ស រួចរកឃាតកមិនដែលឃើញ។
គួរជម្រាបដែរថា កាលពីថ្ងៃពុធ ទី ៥ កក្កដា ឆ្នាំ២០១៧ តុលាការកំពូលបានសម្រេចច្រានចោលបណ្តឹងសុំនៅក្រៅឃុំជាបណ្តោះអាសន្នរបស់លោក គឹម សុខ អ្នកឃ្លំាមើលបញ្ហាសង្គម និងនយោបាយដោយបារម្ភថាលោកអាចនឹងបង្កឲ្យមានបញ្ហាអសន្តិសុខសង្គម ក្នុងពេលដែលស្ថិតនៅក្នុងសេរីភាពជាបណ្តោះអាសន្ន។
លោក គឹម សុខ ត្រូវបានសម្តេចនាយករដ្ឋមន្រ្តីប្តឹងពីបទបរិហាកេរ្តិ៍ជាសាធារណៈ បន្ទាប់ពីលោក គឹម សុខ បានអត្ថាធិបាយនៅក្នុងប្រព័ន្ធផ្សព្វផ្សាយថា រដ្ឋអំណាចមានជាប់ពាក់ព័ន្ធជាមួយនឹការស្លាប់របស់លោកបណ្ឌិត កែម ឡី ។ អ្នកវិភាគបញ្ហាសង្គមដ៏ល្បីល្បាញរូបនេះត្រូវបាញ់សម្លាប់ កាលពីថ្ងៃទី ១០ កក្កដា ឆ្នំា ២០១៦ ក្នុងរាជធានីភ្នំពេញ។
លោក គឹម សុខ ត្រូវបានចាប់និងឃុំខ្លួន កាលពីថ្ងៃទី១៧ ខែកុម្ភៈ ក្រោមការចោទប្រកាន់ពីបទ ញុះញង់ឱ្យប្រព្រឹត្តិបទឧក្រិដ្ឋជាអាទិ៍ និងបរិហាកេរ្តិ៍ ជាសាធារណៈ។លោកបានប្តឹងទាស់ប្រឆាំងនឹងការឃុំខ្លួនរូបលោក ប៉ុន្តែទាំងសាលាដំបូងរាជធានៅភ្នំពេញនិងសាលាឧទ្ធរណ៍បានច្រានចោលបណ្តឹងសុំនៅក្រៅឃុំរបស់លោក៕
