ភ្នំពេញ៖កូនដំរីព្រៃឈ្មោលមួយក្បាលអាយុប្រមាណ១ឆ្នាំបានងាប់ដោយសារការជាប់ផុងពាក់កណ្តាលខ្លួននៅក្នុងរណ្តៅស្ថិតនៅក្នុងភូមិអូរអាម ឃុំស្រែខ្ទុម ស្រុកកែវ សីមា ខេត្តមណ្ឌលគិរីដែនជម្រកសត្វព្រៃកែវ សីមា។
សត្វដំរីព្រៃ ស្ថិតក្នុងបញ្ជីក្រហមរបស់អង្គការ IUCN ជាប្រភេទសត្វងាយរងគ្រោះជិតផុតពូជនៅលើសកលលោក។
តាមការប៉ាន់ស្មានដំរីព្រៃមានចំនួនចន្លោះ ២៥០ទៅ៥០០ក្បាលរស់នៅក្នុងប្រទេសកម្ពុជា ក្នុងនោះដំរីព្រៃប្រហែល ១១៥ក្បាលកំពុងរស់នៅក្នុងដែនជម្រកសត្វព្រៃកែវ សីមា។
លោក គាន់ សេដ្ឋា ទីប្រឹក្សាបច្ចេកទេសអង្គការអភិរក្សសត្វព្រៃ(WCS)ប្រចាំដែនជម្រកសត្វព្រៃកែវ សីមា ឲ្យដឹងនៅក្នុងសេចក្តីប្រកាសព័ត៌មានចេញផ្សាយនៅថ្ងៃទី៩ ខែមករានេះដោយបង្ហាញការសោកស្តាយចំពោះការស្លាប់កូនដំរីនិងមិនអាចជួយសង្គ្រោះកូនដំរីមិនទាន់ពេលវេលាព្រោះស្ថិតនៅក្នុងព្រៃជ្រៅនិងពុំទទួលព័ត៌មានទាន់ពេល។
លោកបន្ថែមថាកូនដំរីព្រៃប្រហែលជាជាប់ផុងច្រើនថ្ងៃហើយបានងាប់ប្រហែលនៅថ្ងៃទី៧ ខែមករាមកម្លេះ។លោក គាន់ សេដ្ឋា ៖«សត្វដំរីព្រៃនៅកម្ពុជាកំពុងប្រឈមនឹងហានិភ័យខ្ពស់ដោយសារការបាត់បង់ទីជម្រកនិងការដាក់អន្ទាក់ជាដើម។ដើម្បីថែរក្សាប្រភេទសត្វដ៏កម្រឲ្យនៅគង់វង្សត្រូវថែរក្សាទីជម្រកធម្មជាតិនិងទាមទារឲ្យមានការចូលរួមការពារគ្រប់ភាគីពាក់ព័ន្ធជាមួយអាជ្ញាធរមូលដ្ឋាន ប្រជាសហគមន៍និងអង្គការអភិរក្ស»។
កាលពីថ្ងៃទី២៥ ខែមិថុនា ឆ្នាំ២០១៧ ដំរីមួយហ្វូងមានចំនួន ១១ក្បាល បានធ្លាក់ចូលក្នុងរណ្ដៅនៅក្នុងភូមិអូរអាម ឃុំស្រែខ្ទម នៃដែនជម្រកសត្វព្រៃកែវសីមា ខេត្ដមណ្ឌលគិរី ។
កាលពីថ្ងៃពុធ ទី២១ ខែមិថុនា ឆ្នាំ២០១៧ សត្វដំរីមួយក្បាលបានងាប់ ក្រោយពីវាបានធ្លាក់ចូលទៅក្នុងរណ្ដៅដីដែលគេជីកសម្រាប់ធ្វើបង្គន់ក្នុងខេត្ដក្រចេះនិងដំរីជំទង់មួយក្បាលទៀតបានងាប់ដោយសារយកខ្លួនទៅត្រដុសនឹងបង្គោលភ្លើងបណ្ដាលឲ្យឆក់ខ្សែភ្លើងងាប់ភ្លាមៗស្ថិតនៅក្នុងឃុំអូរបាក់រទេះ ស្រុកកំពង់សិលា ខេត្តព្រះសីហនុ។កាលពីពាក់កណ្តាលឆ្នាំ ២០១៦ កូនដំរីមួយក្បាលបានជាប់អន្ទាក់រហូតដល់ងាប់ក្នុងខេត្ដមណ្ឌលគិរី៕
