អនុរដ្ឋមន្ត្រីក្រសួងការបរទេសចិន លោក Kong Xuanyou បានប្រាប់អ្នកសារព័ត៌មានថា លោកនាយកមន្ត្រី Li Keqiang នឹងធ្វើទស្សនកិច្ចជាផ្លូវនៅកម្ពុជា រយៈពេល ២ថ្ងៃ គឺពីថ្ងៃទី ១០ ដល់ថ្ងៃទី ១១ មករា ដែលជាការរម្លឹកខួប៦០ឆ្នាំនៃចំណងការទូតរវាងប្រទេសទាំង ២។
លោកអនុរដ្ឋមន្ត្រីបានបន្ថែមថា លោកនាយករដ្ឋមន្ត្រីLi Keqiang នឹងចូលគាល់ព្រះមហាក្សត្រ ព្រះបាទនរោត្តមសីហមុនីនិងសមភាគី សម្ដេចហ៊ុនសែន។ លោកបញ្ជាក់ថា លោក Li និង សម្ដេចហ៊ុន នឹងដោះដូរយោបល់នឹងគ្នាអំពីទំនាក់ទំនងភាគី បញ្ហាតំបន់ និងអន្តរជាតិ។ លោកអនុរដ្ឋមន្ត្រី អះអាងថា«ចំណងទាក់ទង ចិន-កម្ពុជា បានក្លាយជាគំរូមួយនៃតំបន់»។
ជាមួយគ្នានេះអ្នកនាំពាក្យក្រសួងការបរទេសចិន ទីភ្នាក់ងារសារព័ត៌មានចិនស៊ីនហួរ បានរាយការណ៍ថា Geng Shuang បានហៅ កម្ពុជា-ចិន គឺ«ជា មិត្តជិតខាងល្អ មិត្តល្អ ដៃគូល្អ បងប្អូនល្អ បាននាំមកនូវផលប្រយោជន៍ដល់ប្រទេស ប្រជាជន ទាំងពីរជាការរួមចំណែកដើម្បីសន្តិភាព និងការអភិវឌ្ឍ សម្រាប់តំបន់និងពិភពលោក»។
នៅក្នុងបទសម្ភាសន៍មួយកាលពីសប្ដាហ៍មុនជាមួយវិទ្យុស្ត្រីអ្នកនាំពាក្យបក្សកាន់អំណាចនៃគណបក្ស ប្រជាជនកម្ពុជាលោក សុខ ឥសាន្ត បានសាទរការមកធ្វើទស្សនកិច្ចរបស់នាយករដ្ឋមន្ត្រីចិន ដោយលោកគិតថាទំនាក់ទំនង ៦០ឆ្នាំ រវាងចិននិងកម្ពុជា គឺ កេរ្តិតំណែលពីសម្ដេច ព្រះបាទនរោត្តមសីហនុ។
នៅក្នុងកិច្ចប្រជុំអាស៊ានបូកចិន កាលពីឆ្នាំ ២០១២ ដែលកម្ពុជា ធ្វើជាម្ចាស់ផ្ទះនៃកិច្ចប្រជុំនៅពេលនោះ កម្ពុជាត្រូវបានអ្នកសង្កេតការណ៍មើលឃើញថាកម្ពុជា បានធ្វើភាគីចិនសប្បាយចិត្តជាខ្លាំង ដែលសេចក្ដីថ្លែងការណ៍រួមស្ដីពីជម្លោះសមុទ្រចិនខាងត្បូងចេញមិនរួចដែលសមាជិកអាស៊ានចោទកម្ពុជាលម្អៀងចិន តែភាគីកម្ពុជា បដិសេធដោយចាត់ទុកការចោទប្រកាន់នេះគ្មានមូលដ្ឋានឡើយ។
នៅក្នុងដំណើរទស្សនកិច្ចផ្លូវរដ្ឋ កាលពីឆ្នាំ ២០១៦ ប្រធានាធិបតីចិន ស៊ីជិនភីង បានផ្ដល់ជំនួយ ២៣៧ លានដុល្លារដល់កម្ពុជា ហើយចិនក៏បានសម្រេចលុបបំណុលពីកម្ពុជា ៩០លានដុល្លារអាមេរិកជាជំហានដំបូងនាំឱ្យកម្ពុជាសាទរចិនយ៉ាងខ្លាំង៕
