ភ្នំពេញ៖ក្រសួងមហាផ្ទៃចាប់ផ្តើមរឹបន្តឹងការអនុវត្តច្បាប់ចរាចរណ៍ផ្លូវគោកដោយដាក់ពង្រាយប៉ូលិសនៅមហាវិថីមួយចំនួននៅរាជធានីភ្នំពេញគឺចាប់សប្ដាហ៍ទីមួយនៃខែមករាឆ្នាំ២០១៨នេះហើយ។ ក្នុងយុទ្ធនាការនេះប៉ូលិសចរាចរណ៍មានវិធានការឃាត់ម៉ូតូទុកប្រសិនបើអ្នកជិះម៉ូតូមិនពាក់មួកសុវត្ថិភាព។
បន្ទាប់ពីសម្តេច ហ៊ុន សែនព្រមានដកតំណែងមន្ត្រីក្រោមឱវាទដែលមិនអាចដោះស្រាយបញ្ហាសណ្តាប់ធ្នាប់និងការកក់ស្ទះចរាចរណ៍នៅរង្វង់មូលវិមានឯករាជ្យហើយ ស្របពេលនេះ សម្តេច ស ខេង រដ្ឋមន្ត្រីក្រសួងមហាផ្ទៃក៏បានសម្តែងការព្រួយបារម្ភអំពីគ្រោះថ្នាក់ចរាចរណ៍បណ្តាលឱ្យមនុស្សស្លាប់កើនឡើងដោយបានណែនាំឱ្យប៉ូលិសចរាចរណ៍រឹតបន្តឹងច្បាប់ចរាចរណ៍ឱ្យម៉ត់ចត់។
ដោយអនុវត្តតាមប្រសាសន៍ថ្នាក់ដឹកនាំរាជរដ្ឋាភិបាល ប៉ូលិសចរាចរណ៍នៅព្រឹកថ្ងៃទី៥ ខែមករានេះ ចាប់ផ្តើមដាក់ប៉ុស្តិ៍ត្រួតពិនិត្យដើម្បីអប់រំអ្នកបើកបរម៉ូតូមិនពាក់មួកសុវត្ថិភាព កញ្ចក់និងធ្វើការផាកពិន័យចំពោះអ្នកមិនគោរពច្បាប់ដោយមានសិទ្ធិឃាត់ទុកម៉ូតូរបស់អ្នកបើកបរនោះទៀតផង។
លោក នេត សាវឿន អគ្គស្នងការនគរបាលជាតិបានឱ្យដឹងថាប៉ូលិសចរាចរណ៍ ចាប់ផ្តើមអនុវត្តរឹតបន្តឹងច្បាប់ចរាចរណ៍ផ្លូវគោកនៅទូទាំងប្រទេសចាប់ពីត្រីមាសទី១ដោយធ្វើការផ្សព្វផ្សាយអប់រំអ្នកដំណើរឱ្យពាក់មួកសុវត្ថិភាពនិងត្រីមាសទី២ចាប់ផ្តើមផាកពិន័យឃាត់ម៉ូតូបើអ្នកជិះមិនពាក់មួកសុវត្ថិភាពនៅទូទាំងប្រទេស។
«ជំហានទី១អប់រំជិះម៉ូតូអត់មួកដោយហៅប្រាប់ទាំងអស់គឺមិនឃាត់ម៉ូតូ មិនឃាត់ទុករបស់គេហៅប្រាប់ឲ្យទៅរកមួកការពារអាយុជីវិត។ ផុតពីត្រីមាសទី២ហើយមិនពាក់មួកសុវត្ថិភាពទៀតគឺប៉ូលិសធ្វើការឃាត់ទុកម៉ូតូរបស់អ្នកធ្វើដំណើរ។ ចូលជំហានទី៣ដាក់ឱសាទវាទហើយមានវិធានការបន្ថែមទៀត។បើទោះបីជាករណីគ្រោះថ្នាក់ចរាចរណ៍ថយចុះនៅឆ្នាំ២០១៧ប៉ុន្តែចំនួនអ្នកស្លាប់កើនឡើងរហូតដល់១៧៨០នាក់និងរងរបួសជាង៥ពាន់នាក់។»
លោក អ៊ា ចរិយា នាយកវិទ្យាស្ថានសុវត្ថិភាពចរាចរណ៍យល់ថាការរឹតបន្តឹងការអនុវត្តច្បាប់ចរាចរណ៍ផ្លូវគោកចំពោះអ្នកជិះម៉ូតូមិនពាក់មួកសុវត្ថិភាពនឹងមានប្រសិទ្ធភាពខ្ពស់ប្រសិនបើប៉ូលិសចរាចរណ៍អនុវត្តរយៈយូរអង្វែង។
លោក អ៊ា ចរិយា នាយកវិទ្យាស្ថានសុវត្ថិភាពចរាចរណ៍ចង់ឃើញរដ្ឋាភិបាលចាត់វិធានការក្តៅឱ្យរឹតបន្តឹងចំពោះអ្នកបើកបរក្នុងស្ថានភាពស្រវឹងនិងបើកបរហូសល្បឿនកំណត់ដែលជាមូលហេតុចម្បងបណ្តាលគ្រោះថ្នាក់ចររាចរណ៍និងបណ្តាលឲ្យមនុស្សស្លាប់ជាង៦០ភាគរយ។
លោក ចរិយា សង្កេតឃើញថាអាជ្ញាធរមិនទាន់មានការរឹតបន្តឹងខ្លាំងចំពោះអ្នកបើកបរក្នុងស្ថានភាពស្រវឹងនិងបើកបរហូសល្បឿនកំណត់នៅឡើយ។
«ចង់ឲ្យមានវិធានការក្តៅដូចគ្នានេះជាមូលហេតុដែលមានគ្រោះថ្នាក់ចរាចរណ៍ដូចជាការបើកបរហូសល្បឿនកំណត់និងបើកបរក្រោមឥទ្ធិពលនៃគ្រឿងស្រវឹងដែលជាមូលហេតុធ្វើឲ្យមានគ្រោះថ្នាក់ចរាចរណ៍ជាមូលហេតុទី១និងទី២ធ្វើឲ្យមនុស្សស្លាប់ជាង៦០ភាគរយដែលដោយសារការបើកបរហូសល្បឿនកំនត់និងបើកបរក្រោមឥទ្ធិពលគ្រឿងស្រវឹង។យើងសង្កេតឃើញកន្លងមកមិនទាន់មានការរឹតបន្តឹងច្បាប់តឹងរឹងទៅលើមូលហេតុទាំងពីរនេះទេ។»
របាយការណ៍នាយកដ្ឋាននគរបាលចរាចរណ៍និងសណ្ដាប់ធ្នាប់សាធារណៈបញ្ជាក់ថា នៅឆ្នាំ២០១៧ គ្រោះថ្នាក់ចរាចរណ៍ទូទាំងប្រទេសបានកើតឡើងចំនួន៣៥៣១ករណី បណ្ដាលឲ្យមនុស្សស្លាប់ចំនួន១៧៨០នាក់និងរងរបួសចំនួន៥៥៣៩នាក់។ខណៈដែលឆ្នាំ២០១៦ ករណីគ្រោះថ្នាក់ចរាចរណ៍បានកើតឡើងចំនួន៣៧០០លើកបណ្តាលឲ្យស្លាប់ ១៧១៧នាក់និងរងរបួស៦៦០៧នាក់។គ្រោះថ្នាក់ដល់អាយុវជីវិតច្រើនជាងគេគឺអ្នកដែលបើកបរម៉ូតូដោយមិនបានពាក់មួកការពារសុវត្ថិភាពជាង៧៨ភាគរយ។
យោងតាមរបាយការណ៍ដដែលនេះ អ្នកស្លាប់ដោយគ្រោះថ្នាក់ចរាចរណ៍មាននៅក្នុងខេត្ដចំនួន១៤ដែលមានដូចជា ខេត្ដកណ្ដាល ព្រះវិហារ កំពង់ចាម កំពត ស្ទឹងត្រែង សៀមរាប កំពង់ធំ ស្វាយរៀង ព្រះសីហនុ កោះកុង មណ្ឌលគិរី កំពង់ស្ពឺ ពោធិ៍សាត់ និងខេត្ដប៉ៃលិន។
លោក អ៊ា ចរិយា សង្កេតឃើញថាអរិយាបថអ្នកបើកបរម៉ូតូពាក់មួកសុវត្ថិភាពនៅរាជធានីភ្នំពេញមានអត្រាពី៥០ទៅ៦០ភាគរយនិងអ្នកជិះពីក្រោយមានអត្រាពាក់មួកក្រោម២០ភាគរយ ហើយអ្នកបើកបរនៅតាមបណ្តាខេត្តមានអត្រាទាបនៅឡើយ៕
