ភ្នំពេញ៖ដើមឈើធំៗមានអាយុកាលរាប់រយឆ្នាំដែលគងលើផ្ទាំងសិលាប្រាសាទតាព្រហ្មទីតាំងនៅអង្គរវត្តខេត្តសៀមបានទាក់ទាញភ្ញៀវទេសចរជាតិនិងអន្តរជាតិរាប់រយនាក់ក្នុងមួយថ្ងៃៗ។តែដើមឈើដ៏ធំទាំងនោះកំពុងត្រូវការជួយសង្គ្រោះជាបន្ទាន់បើពុំនោះ អាចខូចខាតដល់ប្រាសាទទៀតផង។ដោយសារដូចនេះក្រុមជំនាញអាជ្ញាធរជាតិអប្សរានិងឥណ្ឌាប្រកាសថាគេកំពុងរកវិធីជួយសង្គ្រោះដើមឈើដ៏ធំនេះហើយ ។
ក្រុមជំនាញអាជ្ញាធរជាតិអប្សរានិងក្រុមជំនាញឥណ្ឌារៀបចំក្រាលក្តារលើឬសឈើនិងលើដីដើម្បីការពារហានិភ័យដើមឈើមួយដើមមានអាយុកាលរាប់រយឆ្នាំនៅក្នុងប្រាសាទតាព្រហ្មរងការខូចខាត។
យ៉ាងហោចណាស់ភ្ញៀវទេសចរប្រមាណ៥ពាន់នាក់មកទស្សនាប្រាសាទតាព្រហ្មជារៀងរាលថ្ងៃស្ថិតនៅក្នុងខេត្តសៀមរាបដែលមានដើមឈើធំៗដុះព័ទ្ធនឹងតួប្រាសាទលម្អយ៉ាងល្អប្រណិត។
កត្តានេះនាំឲ្យក្រុមជំនាញអាជ្ញាធរអប្សរានិងក្រុមជំនាញឥណ្ឌារៀបចំក្រាលក្តាការពារឬសឈើដុះព័ទ្ធនឹងតួប្រាសាទនេះ។នេះបើតាមទំព័រហ្វេសប៊ុករបស់អាជ្ញាធរអប្សរាបង្ហោះនៅថ្ងៃទី២៦ ខែធ្នូម្សិលមិញ។
លោក និន ចាន់សាមៀន ប្រធាននាយកដ្ឋានគ្រប់គ្រងព្រៃឈើ បរិស្ថាននិងទេសភាពវប្បធម៌ ឲ្យដឹងថាក្រុមការងាររបស់អាជ្ញាធរអប្សរានឹងរៀបចំក្រាលក្តារលើដីនិងលើឬសឈើដើម្បីការពារកុំឲ្យភ្ញៀវទេសចរជាន់ដីនាំឱ្យហាប់ដីប៉ះពាល់ដល់ឬសឈើ។
លោក ចាន់សាមៀន បញ្ចាក់ថាកាលណាដីហាប់ពេកអាចបណ្តាលឲ្យដើមឈើក្រិនដំបៅបង្ករជាជំងឺអាចបណ្តាលងាប់។លោកបន្ថែមថាការក្រាលក្តារនោះនឹងចោះប្រហោងតូចៗអនុគ្រោះ ដល់ការលូតលាស់និងការដកដង្ហើមរបស់ឬសឈើ។ពិសេសធានាសុវត្ថិភាពដល់ភ្ញៀវទេសចរផងដែរ។
ជាមួយគ្នានេះ លោក ហង់ ពៅ អគ្គនាយករងអាជ្ញាធរជាតិអប្សរា ឲ្យដឹងថា ការៀបចំក្រាលក្តារទាំងនោះនឹងជួយរក្សាជីវិតដើមឈើរហូតរាប់រយឆ្នាំទៀត ដើម្បីទាក់ទាញភ្ញៀវទេសចរមកទស្សនាប្រាសាទតាព្រហ្ម។
ប្រាសាទតាព្រហ្មខេត្តសៀមរាប
តាមគេហទំព័ររបស់អាជ្ញាធរជាតិអប្សរា ប្រាសាទតាព្រហ្មត្រូវបានគេស្គាល់ច្រើនថាជាប្រាសាទដើមឈើ ស្ថិតនៅក្នុងព្រៃមានកសិណទឹកព័ទ្ធជុំវិញពីរជាន់។ ប្រាសាទនេះមានទីតាំងស្ថិតនៅវង់តូច ទៅតាមផ្លូវទ្វារជ័យបន្ទាប់ពីប្រាសាទតាកែវប្រហែល១គីឡូម៉ែត្រ ហើយមានកំពែងជាប់នឹងកំពែងប្រាសាទបន្ទាយក្តីប៉ែកពាយ័ព្យ។
ប្រាសាទតាព្រហ្មកសាងឡើងក្នុងឆ្នាំ១១៨៦ ដោយព្រះបាទ ជ័យវរ្ម័នទី៧ គោរពដល់ព្រះពុទ្ធសាសនាមហាយាន ។បើតាមសិលាចារឹកនៃប្រាសាទនេះ គឺដើម្បីឧទ្ទិសដល់គុណព្រះមា តារបស់ព្រះអង្គ ក្រោមរូបភាពប្រាជ្ញាបារមីតា។
បើតាមអ្នកស្រុកហៅប្រាសាទនេះ ថា «តាព្រហ្ម» ឬ «បន្ទាយតាព្រហ្ម»។ ការហៅថា «បន្ទាយតាព្រហ្ម» គឺសំដៅទៅលើប្រាសាទនេះមានកំពែងព័ទ្ធជុំវិញ។ រីឯការហៅថា «តាព្រហ្ម» ជាឈ្មោះដែលនិយមហៅឥឡូវ ហើយតាមការយល់របស់អ្នកស្រុក គឺសំដៅលើតាព្រហ្មដែលមានមុខបួន។ ប៉ុន្តែទោះជាយ៉ាងណា ក៏ប្រាសាទនេះមានឈ្មោះដើមជាភាសាសំស្ក្រឹតមួយដែរថា រាជវិហារ។
បច្ចុប្បន្នប្រាសាទដែលមានអាយុកាលជាង៩០០ឆ្នាំក្នុងរមណីយដ្ឋានអង្គរមួយនេះ បានទាក់ទាញបេះដូងភ្ញៀវជាតិ និងអន្តរជាតិឱ្យស្ងើចសរសើរមិនដាច់ពីមាត់ថាជាប្រាសាទដ៏អស្ចារ្យដែលមានដើមឈើធំៗដុះខាងក្នុងនិងលើកំពូលប្រាសាទ ចាក់ឫសស្អេកស្កះចូលក្នុងគ្រឹះនិងជ្រៀតចូលតាមជញ្ជាំងគួរឱ្យទស្សនា៕
