ភ្នំពេញ ៖ គ.ជ.ប ចាត់ទុកថា ការវាយតម្លៃរបស់សង្គមស៊ីវិល ពីចំនួនប្រជាពលរដ្ឋទៅពីនិត្យឈ្មោះបោះឆ្នោតមានតិច និងខ្លះមិនទៅពិនិត្យឈ្មោះបោះឆ្នោតព្រោះបាក់ទឹកចិត្ដ គឺជាចរិតនយោបាយ ដែលខុសពីការពិត។ តែសង្គមស៊ីវិលថា នេះ គឺជាក្ដីកង្វល់របស់ពលរដ្ឋ។
លោក លៀ ស៊ីណា រាយការណ៍ ៖
គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប បានចេញសេចក្ដីប្រកាសព័ត៌មានមួយកាលពីថ្ងៃទី២៣ ធ្នូ ដែលប្រតិកម្មទៅនឹងការផ្សាយរបស់ វិទ្យុ អនឡាញ មួយដែលបានចុះផ្សាយអត្ថបទកាលពីថ្ងៃទី២១ ខែធ្នូ ឆ្នាំ២០១៧ ថា “សង្គមស៊ីវិលឃ្លាំមើលការបោះឆ្នោតរកឃើញថា មានពលរដ្ឋខ្លះបានបាក់ទឹកចិត្ដលែងទៅមើលឈ្មោះបោះឆ្នោត។ ចំណែកពលរដ្ឋខ្លះទៀតយល់ឃើញថា គ.ជ.ប គ្រាន់តែជាឧបករណ៍របស់បក្សកាន់អំណាច”។ គ.ជ.ប ចាត់ទុកថា ការលើកឡើងនេះគឺមានចរិតនយោបាយ និងខុសពីការពិត។
លោក សោម សូរីដា អគ្គលេខាធិការរង គ.ជ.ប និងជាប្រធានក្រុមប្រតិកម្មព័ត៌មានរបស់ គ.ជ.ប បានប្រាប់វិទ្យុស្ដ្រីនៅថ្ងៃទី២៤ ធ្នូនេះថា គណៈកម្មាធិការជាតិរៀបចំការបោះឆ្នោតមិនបានអាចទទួលយកបានទេ ចំពោះការផ្សព្វផ្សាយ និងការលើកឡើងដែលមានចរិតនយោបាយ ប្រាស់ចាកពីការពីតដូចនេះ។ ជាងនេះលោកយល់ឃើញថា ការចុះផ្សាយ និងលើកឡើងនោះ គឺមានបំណងធ្វើឲ្យប្រជាពលរដ្ឋមានការភ័ន្ដច្រឡំ និងមិនទុកចិត្ដលើឯករាជ្យភាពរបស់គណៈកម្មាធិការជាតិរៀបចំការបោះឆ្នោត ដែលជាស្ថាប័នមួយ ធ្វើការងារដោយឯករាជ្យស្របទៅតាមច្បាប់។
បន្ថែមពីនេះប្រធានប្រតិកម្មព័ត៌មានរបស់ គ.ជ.ប អះអាងថា ការលើកឡើងរបស់សង្គមស៊ីវិល ត្រឹមតែជាការយល់ឃើញមួយផ្នែកប៉ុណ្ណោះ ដែលគ្មានមូលដ្ឋានគ្រប់គ្រាន់ដើម្បីធ្វើការវាយតម្លៃទៅលើស្ថានភាពជាក់ស្ដែង ពីដំណើរការ ប្រជាពលរដ្ឋទៅពិនិត្យឈ្មោះបោះឆ្នោតនោះទេ។
លោក សោម សូរីដា៖«ការលើកឡើងនេះ គឺគ្រាន់តែជាការបំពុលបរិយាកាសមួយ ធ្វើឲ្យពលរដ្ឋបាត់ជំនឿទុកចិត្ដមកលើ គ.ជ.ប ប៉ុន្ដែយ៉ាងណាក៏ដោយ គ.ជ.ប មិននិយាយពីសមាសភាពថ្មីឬចាស់ទេ។ គ.ជ.ប គឺជាស្ថាប័នឯករាជ្យដែលអនុវត្ដតួនាទី និងភារកិច្ចរបស់ខ្លួន ស្របទៅតាមគោលការណ៍ដែលមានកំណត់ក្នុងរដ្ឋធម្មនុញ្ញ នៃព្រះរាជាណាចក្រកម្ពុជា មាត្រា ១៥០ថ្មី ២ នៅក្នុងជំពូកទី១៥ថ្មី ២»។
ជាងនេះប្រធានប្រតិកម្មព័ត៌មានរបស់ គ.ជ.ប រូបនេះបានបញ្ជាក់ថា បើគិតមកដល់ថ្ងៃទី២៣ ធ្នូនេះ មានប្រជាពលរដ្ឋប្រមាណជាង ២៦ម៉ឺននាក់ ដែលបានចូលទៅមើលឈ្មោះរបស់ពួកគេតាមរយៈ គេហទំព័រ របស់ គ.ជ.ប ដែលចំនួននេះ គឺខ្ពស់បើធៀបទៅ នឹងចំនួនប្រជាពលរដ្ឋដែលចុះឈ្មោះថ្មីជាង ៥៣ម៉ឺននាក់។ លោកបន្ដថា ចំនួននេះ គឺមិនទាន់រាប់បញ្ជូនចំនួនប្រជាពលរដ្ឋ ដែលទៅមើលឈ្មោះបោះឆ្នោតតាមសាលាឃុំ សង្កាត់ និងតាមទីប្រជុំជននៅទូទាំងប្រទេសនោះទេ។
ជុំវិញរឿងនេះ មន្ដ្រីកម្មវិធីជាន់ខ្ពស់ផ្នែកអង្កេត របស់អង្គការ ខុមហ្វ្រែល លោក កន សាវ៉ាង្ស មានប្រសាសន៍ថា អ្វីដែលមានការលើកឡើងពីក្ដីកង្វល់ និងការបាក់ទឹកចិត្ដរបស់ប្រជាពលរដ្ឋដែលមិនទៅមើលឈ្មោះបោះឆ្នោត នោះគឺជាការពិត ដែលវាមិនមែនជាការលើកឡើងតាមបែបចរិតនយោបាយអ្វីនោះទេ។ លោកបន្ដថា អ្វីដែលអង្គការសង្គមស៊ីវិលលើកឡើង ពាក់ព័ន្ធការបាក់ទឹកចិត្ដរបស់ពលរដ្ឋ មិនទៅពិនិត្យមើលឈ្មោះបោះឆ្នោតនោះ មិនមែនជាការដាក់កំហុសទៅលើ គ.ជ.ប នោះទេ ប៉ុន្ដែនេះគឺជាបញ្ហានយោបាយ។
មន្ដ្រីកម្មវិធីជាន់ខ្ពស់ផ្នែកអង្កេត របស់អង្គការ ខុមហ្វ្រែលបន្ថែមទៀតថា ដើម្បីធ្វើឲ្យស្ថានភាពមានការល្អប្រសើរ ហើយពលរដ្ឋមានទឹកចិត្ដទៅមើលឈ្មោះបោះឆ្នោត និងទៅចូលរួមបោះឆ្នោតនាពេលខាងមុខ គឺមានតែដំណោះស្រាយនយោបាយមួយប៉ុណ្ណោះ។
លោក កន សាវ៉ាង្ស៖«អញ្ចឹងទៅមុខទៀត គឺមានតែរឿងមួយគឺថា ស្ថានភាពនយោបាយ ធ្វើម៉េចឲ្យស្ថានភាពនយោបាយហ្នឹង ឲ្យវាវិលត្រឡប់មកឲ្យដូចដើមវិញ ឲ្យវាមានការចូលរួមពីសហគមន៍ជាតិ អន្ដរជាតិ ប្រព័ន្ធព័ត៌មានឯករាជ្យអីផ្សេងៗហ្នឹង ហើយអ្នកនយោបាយមួយចំនួនត្រូវធ្វើការដោះលែង ដល់អញ្ចឹងទៅ ហ្នឹងស្ថានភាពនយោបាយ ត្រឡប់មកភាពដើម នាំឲ្យមានការប្រកួតប្រជែងទៅ ហ្នឹងគឺជាសេចក្ដីទុកចិត្ដមួយ ដែលនាំឲ្យមានការចូលរួមពីប្រជាពលរដ្ឋក៏ដូចជាសហគមន៍ជាតិ អន្ដរជាតិ ហ្នឹងហើយដែលធ្វើឲ្យប្រជាពលរដ្ឋមានការទុកចិត្ដ ហើយបើអត់មានដំណោះស្រាយហ្នឹងទេ គឺបញ្ហានៅតែកើតមានឡើង»។
ប្រទេសកម្ពុជា នឹងមានការបោះឆ្នោតជ្រើសរើសតំណាងរាស្ដ្រនីតិកាលទី ០៦ នៅថ្ងៃទី២៩ ខែកក្កដា ឆ្នាំ២០១៨។ ប្រជាពលរដ្ឋខ្មែរគ្រប់រូបដើម្បីមានសិទ្ធិក្នុងការបោះឆ្នោតជ្រើសរើសតំណាងនាពេលខាងមុខបាន លុះត្រាតែបានចុះឈញមោះ និងមានឈ្មោះក្នុងបញ្ជីឈ្មោះបោះឆ្នោតថ្មីរបស់ គ.ជ.ប៕
