ហ្ស៊ិមបាវ៉េ ៖ បន្ទាប់ពីចាក់ចេញ ពីកងទ័ពដោយសារតែអាយុចូលនិវត្តន៍ អតីតឧត្តមសេនីយ៍ កូស្ដាន ទីណូជីវ៉េនហ្កា ត្រូវបានតែងតាំងជាអនុប្រធានាធិបតីថ្មី ដែលប្រធានាធិបតី គឺ លោក អ៊ីមម៉ាសុន ម៉ាណាត់កាវ៉ា។
ការតែងតាំងអតីតឧត្តមសេនីយ៍រូបនេះ ធ្វើជាអនុប្រធានាធិបតី គឺធ្វើឡើងមួយសប្ដាហ៍ តែប៉ុណ្ណោះ បន្ទាប់ពីលោកចូលនិវត្តន៍ពីស្ថាប័នយោធា។ លោក ជីវ៉េនហ្កា បានដឹកនាំធ្វើរដ្ឋ ប្រហារទំលាក់ប្រធានាធិបតី មូហ្កាបេ កាលពីថ្ងៃ១៥ វិច្ឆិកា ២០១៧ ហើយក្រោយមកលោកបានរៀបចំផ្ទេរអំណាចរបស់លោកមូហ្កាបេ ឲ្យទៅប្រធានាធិបតី ម៉ាណាត់កាវ៉ា។
ការតែងតាំងឧត្តមសេនីយ៍រូបនេះ ត្រូវបានគេមើលឃើញថា ដើម្បីតបស្នងគុណដែលលោកបានបញ្ចប់ការកាន់អំណាចរយៈពេល៣៧ឆ្នាំ របស់លោក រ៉ូបឺត មូហ្កាបេ។ ដំណើរការ នៃការទំលាក់លោក រ៉ូបឺត មូហ្កាបេ ពីអំណាចកាលពីពេលកន្លងទៅនោះ ត្រូវបានសារពត៌មានមួយចំនួនចុះផ្សាយថា ប្រទេស ចិន នៅពីក្រោយ អំពើរដ្ឋប្រហារនោះ មូលហេតុដែលមានការផ្សព្វផ្សាយដូចនេះ ពីព្រោះតែមុនរដ្ឋប្រហារផ្ទុះឡើង លោកឧត្តមសេនីយ៍ ជីវ៉េហ្កា បានទៅធ្វើទស្សនកិច្ចនៅប្រទេសចិន ហើយរំលងតែប៉ុន្មានថ្ងៃប៉ុណ្ណោះ ក្រោយពេលលោកត្រឡប់មកវិញ ស្រាប់តែមានរដ្ឋប្រហារនេះកើតឡើងតែម្ដង។ ក៏ប៉ុន្ដែដំណឹងលេចឮនេះ ត្រូវបានទីក្រុងប៉េកាំង ចេញមុខបដិសេធចោល ដោយអះអាងថា ខ្លួនមិនបានជាប់ពាក់ព័ន្ធអ្វីទាំងអស់ករណីរដ្ឋប្រហារនៅហ្ស៊ិមបាវ៉េ៕
