ភ្នំពេញ៖ក្រោយពីគណបក្សសង្គ្រោះជាតិត្រូវបានរំលាយមជ្ឈដ្ឋានមួយចំនួនបានចោទជាសំណួរនិងមញ្ចេញមតិលើបណ្ដាញសង្គមថា បើគ្មានបក្សប្រឆាំងនេះចូលរួម ហើយថែមទាំងអាមេរិកនិងសហភាពអឺរ៉ុប លែងជួយគាំទ្រការបោះឆ្នោតទៀតនោះគឺគ្មានន័យអ្វីសម្រាប់ស្ថាប័នរៀបចំបោះឆ្នោតនៅកម្ពុជាគឺគណៈកម្មាធិការជាតិរៀបចំការបោះឆ្នោត គ.ជ.ប។ ដោយសាររឿងនេះ គ.ជ.ប បានធ្វើការបំភ្លឺទៅមជ្ឈដ្ឋានទាំងនោះ ។
គណៈកម្មាធិការជាតិរៀបចំការបោះឆ្នោត(គ.ជ.ប)បានឲ្យដឹងថាគ.ជ.ប ជាស្ថាប័នកំពូលរបស់ ជាតិនិងជារបស់ប្រជាពលរដ្ឋពោលគឺមិនមែនជារបស់គណបក្សនយោបាយឬបុគ្គលណាមួយឡើយ។នេះបើយោងតាមសេចក្តីបំភ្លឺរបស់គ.ជ.ប ចេញផ្សាយនៅថ្ងៃទី២១ ខែធ្នូនេះ។
សេចក្តីបំភ្លឺរបស់គ.ជ.បធ្វើឡើងស្របពេលរងការរិះគន់ពីសាធារណជនថាស្ថានប័នគ.ជ.ប គ្មានភាពឯករាជ្យ បន្ទាប់ពីអតីតគណបក្សប្រឆាំងធំជាងគេមួយត្រូវបានរំលាយ។
ទាក់ទងសេចក្តីបំភ្លឺរបស់គ.ជ.ប លោក សំ គន្ធាមី នាយកប្រតិបត្តិគណៈកម្មាធការអព្យាក្រឹត្យ និងយុត្តិធម៌ ដើម្បីការបោះឆ្នោតដោយសេរី ត្រឹមត្រូវនៅកម្ពុជាហៅកាត់ថានិកហ្វិកមានប្រសាសន៍ ថាអង្គការរបស់លោកនឹងធ្វើការឃ្លាំមើលស្ថាប័នគ.ជ.បចាប់ពីដំណើរបោះឆ្នោតរហូតដល់ក្រោយបោះឆ្នោតថាតើគ.ជ.បនឹងធ្វើបានតាមសេចក្តីបំភ្លឺបានកម្រិតណា។«បើតាមសេចក្តីបំភ្លឺរបស់គ.ជ.បយើងនឹងតាមដានសង្កេតមើលអនុវត្តន៍កាងារដើម្បីតើគាត់សេចក្តីប្រកាស សេចក្តីបំភ្លឺគាត់អនុវត្តន៍ទៅតាមគោលការណ៍ច្បាប់រៀបចំការបោះឆ្នោតទេហើយតាមសេចក្តីបំភ្លឺរបស់គាត់អត់។»
តែបែបនេះក្ដីគ.ជ.ប ឲ្យដឹងថាសាធារណជនមិនគួរធ្វើការវិនិច្ឆ័យថាគ.ជ.ប បាត់បង់ភាពឯករាជ្យភាពមុនលទ្ធផលបោះឆ្នោតនៅឆ្នាំ២០១៨នេះទេ។ គ.ជ.បថាដំណើរការបោះឆ្នោតនឹងប្រព្រឹត្តិទៅតាម ការគ្រោងទុក។
គួរបញ្ជាក់ថាសហរដ្ឋអាមេរិកនិងសហភាពអឺរ៉ុបប្រកាសថានឹងមិនទទួលស្គាល់លទ្ធផលបោះឆ្នោតក្នុងឆ្នាំ២០១៨នោះទេប្រសិនបើគណបក្សសង្គ្រោះជាតិអវត្តមានក្នុងការបោះឆ្នោតនេះ ។
យ៉ាងនេះក្ដី ប្រមុខរដ្ឋាភិបាលសម្ដេចហ៊ុនសែន អះអាងថា ទោះជាគ្មានការចូលរួមការបោះឆ្នោតដោយ គណបក្សសង្គ្រោះជាតិក្ដី ក៏មានគណបក្សរាប់សិបទៀតបានត្រឿមចូលរួមរួចទៅហើយ៕
