ភ្នំពេញ៖ ប្រធាននាយកដ្ឋានឱសថ ចំណីអាហារ និងបរិក្ខាពេទ្យ និងគ្រឿងសំអាង នៃក្រសួងសុខាភិបាលបញ្ជាក់ថា នៅឆ្នាំ២០១៧នេះ ករណីពលរដ្ឋពុលចំណីអាហារ មានការថយចុះច្រើនបើធៀបនឹងឆ្នាំមុនៗ។
លោក លៀ ស៊ីណា រាយការណ៍៖
ក្រសួងសុខាភិបាលនៅថ្ងៃទី២0 ខែធ្នូ ម្សិលមិញ បានប្រគល់វិញ្ញាបនប័ត្រ បញ្ជាក់ពីអនាម័យដល់ម្ចាស់ភោជនីយដ្ឋាន និងអាហារដ្ឋាន ស្ដីពីគោលការណ៍អនុវត្ដអនាម័យល្អ ដលម្ចាស់ភោជនីយដ្ឋាន និងអាហារដ្ឋាន ដែលមកដល់ពេលនេះមានភោជនីយដ្ឋាន និងអាហារដ្ឋានប្រមាណជិត ២០០០ ដែលទទួលបាន វិញ្ញាបនប័ត្រនេះ ក្នុងចំណោមភោជនីយដ្ឋាន និងអាហារដ្ឋានប្រមាណ ៤០០០នៅកម្ពុជា។
លោកវេជ្ជបណ្ឌិត ហេង ប៊ុនគៀត ប្រធាននាយកដ្ឋានឱសថ ចំណីអាហារ និងបរិក្ខាពេទ្យ និងគ្រឿងសំអាង នៃក្រសួងសុខាភិបាល ដែលបានផ្ដល់បទសម្ភាសន៍ដល់អ្នកសារព័ត៌មានក្នុងពិធីនេះ បានឲ្យដឹងថាក្នុងឆ្នាំ២០១៧ ករណីដែលប្រជាពលរដ្ឋពុលអាហារ គឺបានថយចុះច្រើន ហើយបើគិតពីដើមខែមករា មកដល់ខែធ្នូនេះ ក្រសួងសុខាភិបាលទទួលបានរបាយការណ៍ ករណីពលរដ្ឋពុលចំណីអាហារត្រឹមតែ ០៩ករណីប៉ុណ្ណោះ ដែលកាលពីឆ្នាំ២០១៦ មានចំនួន ១៩ករណី និងឆ្នាំ២០១៥ មានចំនួន ៣៣ករណី។ អ្វីដែលនាំឲ្យករណីពលរដ្ឋអាហារ មានការថយចុះជាលំដាប់ដូចនេះ គឺពីព្រោះតែប្រជាពលរដ្ឋយល់ដឹងកាន់តែច្រើន ពីបញ្ហាអនាម័យចំណីអាហារ ហើយក៏ជាការរួមចំណែកពីប្រព័ន្ធផ្សព្វផ្សាយផងដែរ។
លោក ហេង ប៊ុនគៀត៖«ពីខែមករា រហូតមកដល់ខែធ្នូ ហ្នឹងហើយ ទើបមាន ០៩ករណីទេ គឺការថយចុះបញ្ជាក់ថា ប្រជាជនកម្ពុជាយើងមានការយល់ដឹងពីបញ្ហាអនាម័យខ្ពស់ជាងមុន អញ្ចឹងបានន័យថា ជាការរួមចំណែករបស់ស្ថានីយ វិទ្យុ និងទូរទស្សន៍ទាំងអស់ដែរ ដែលបានផ្សព្វផ្សាយទៅធ្វើឲ្យប្រជាពលរដ្ឋមានការយល់ដឹង»។
បន្ថែមពីនេះប្រធាននាយកដ្ឋាន បានបន្តថា ក្នុងពេលខាងមុខនេះ ក្រសួងសុខាភិបាលនឹងចេញសេចក្ដីប្រកាសមួយដើម្បីឲ្យប្រជាពលរដ្ឋដែលលក់ចំណីអាហារតាមផ្លូវ បង្កើនការរក្សាអនាម័យ ចំណីអាហារ របស់ខ្លួនឲ្យបានកាន់តែប្រសើរ ដោយមិនត្រូវលក់ដូរ នៅកន្លែងក្បែរមាត់លូ និង កន្លែងមានសំរាមកខ្វក់ ជាដើម។
លោកវេជ្ជបណ្ឌិត ហេង ប៊ុនគៀត បន្ថែមថា ក្រសួងសុខាភិបាលចង់ឲ្យប្រជាពលរដ្ឋគ្រប់រូបបរិភោគអាហារដែលមានអនាម័យ និងសុវត្ថិភាព ហើយត្រូវពិនិត្យមើលផ្លាកសញ្ញាស្ដីពីការទទួលស្គាល់អនាម័យចេញដោយក្រសួងសុខាភិបាល។ លោកបន្តថា ប្រសិនបើចូលបរិភោគអាហារ តាមភោជនីយដ្ឋាន និងអាហារដ្ឋាននានា គឺពលរដ្ឋត្រូវ ជ្រើសរើសកន្លែងលក់ដែលមានសុវត្ថិភាព ដូចជាមានការគ្រប ឬដាក់ក្នុងទូរកញ្ចក់ត្រឹមត្រូវ។ ចំណែកអ្នកលក់ចំណីអាហារ ត្រូវតែតែសម្អាតកន្លែងលក់ដូរ របស់ខ្លួនជាប្រចាំ ប្រើស្រោមដៃមុនចាប់កាន់សាច់ ឬបន្លែ ហើយជាពិសេសប្រសិនបើដៃមានរបួស ឬដំបៅ ត្រូវតែព្យាបាលឲ្យបានជាសិន ចាំវិលត្រឡប់មកលក់បន្ដ ដើម្បីបញ្ចៀសការឆ្លងមេរោគទៅកាន់អ្នកបរិភោគ។
លោក ហេង ប៊ុនគៀត៖«សុំបងប្អូនយើងពិសារអាហារនៅកន្លែងណា ដែលមានអនាម័យ ដែលចេះគ្របចេះអី ហើយដៃជើងមិនអាចប្រើចាប់ Direct ដោយផ្ទាល់ទេ យើងត្រូវមានពាក់ស្រោមដៃស្រោមអី ហើយចំណីអាហារត្រូវគ្របទុកឲ្យបានត្រឹមត្រូវក្នុងទូរកញ្ចក់ទូរអី ដើម្បីទាញយកមកយើងពាក់ស្រោមដៃ ដើម្បីកាត់បន្ថយការចម្លង»។
ទន្ទឹមគ្នានេះ ប្រធាននាយកដ្ឋានឱសថ ចំណីអាហារ និងបរិក្ខាពេទ្យ និងគ្រឿងសំអាង នៃក្រសួងសុខាភិបាល សុំឲ្យមានការចូលរួមពីគ្រប់មជ្ឈដ្ឋានទាំងអស់ គឺ រួមទាំងអាជីវករ ម្ចាស់ភោជនីយដ្ឋាន អាហារដ្ឋាន និងពលរដ្ឋគ្រប់រូប ក៏ដូចជា បណ្ដាប្រព័ន្ធផ្សព្វផ្សាយផងដែរ ដើម្បីឲ្យប្រជនទាំងអស់យល់ដឹងកាន់តែច្បាស់ ពីសុវត្ថិភាពចំណីអាហារនេះ និងមានការជឿជាក់លើរដ្ឋាភិបាល និងក្រសួងសុខាភិបាល៕
