ភ្នំពេញ៖ នាយករដ្ឋមន្រ្តីកម្ពុជាសម្តេច ហ៊ុន សែន បានប្រកាសនឹងបង្កើតធនាគារសហគ្រាសធុនតូច ដើម្បីផ្តល់កម្ចីទៅម្ចាស់អាជីវកម្ម ឬម្ចាស់សហគ្រាសដែលមានបំណងចង់បង្កើតផលិតផលប្រើប្រាស់ក្នុងស្រុក កាត់បន្ថយការនាំចូលពីបរទេស និងបង្កើនការងារក្នុងស្រុកដល់ពលរដ្ឋ។ ក្នុងរឿងនេះអ្នកវិភាគមានសុទិដ្ឋិនិយមចំពោះគំនិតរបស់ប្រមុខរដ្ឋាភិបាល តែថាគំនិតនេះគួរមានតាំងពី ១០ឆ្នាំមុនមកម្ល៉េះ។
ថ្លែងក្នុងជំនួបសំណេះសំណាលជាមួយកម្មករកម្មការិនីជាង ១ម៉ឺននាក់ នៅរោងចក្រតំបន់ទួលពង្រ ខណ្ឌពោធិ៍សែនជ័យ នៅថ្ងៃទី២០ ធ្នូនេះ នាយករដ្ឋមន្រ្តីសម្តេច ហ៊ុន សែន លើកឡើងថានៅពេលខាងមុខកម្ពុជានឹងបង្កើតឱ្យមានធនាគារសហគ្រាសធុនតូចមួយទៀត គឺ ដើម្បីឈានទៅផ្តល់កម្ចីឥណទានដល់ម្ចាស់អាជីវកម្ម និងម្ចាស់គ្រាសទាំងឡាយណាដែលមានគំនិតចង់បង្កើតសហគ្រាស ឬអាជីវកម្មខ្នាតតូច និងមធ្យមដែលនេះជាការជំរុញការបង្កើនផលិតផលប្រើប្រាស់ក្នុងស្រុក។
សម្តេច ហ៊ុន សែន មានសុទិដ្ឋិនិយមចំពោះការបង្កើតធនគារសហគ្រាសធុនតូចនេះថា នៅពេលកម្ពុជាមានការគាំទ្រឱ្យមានសហគ្រាសខ្នាតតូចកាន់តែច្រើនតាមរយៈកម្ចីឥណទាននេះ គឺកម្ពុជានឹងអាចបង្កើនផលិតផលប្រើប្រាស់ក្នុងស្រុកបានច្រើន ឈានទៅកាត់បន្ថយការនាំចូលទំនិញប្រើប្រាស់ពីបរទេស ពិសេសជាងនោះប្រជាជនក្នុងស្រុកនឹងមានការងារធ្វើគ្រប់គ្រាន់ផងដែរ។
សម្រាប់នាយករដ្ឋមន្រ្តីការបង្កើតសហគ្រាស ឬអាជីវកម្មខ្នាតតូចឱ្យបានច្រើន គឺជាយុទ្ធសាស្រ្តសេដ្ឋកិច្ចមួយ រុញកម្ពុជាចេញពីចរន្តសេដ្ឋកិច្ចដែលខ្ចីដង្ហើមគេដក ដោយបច្ចុប្បន្ននេះទំនិញប្រើប្រាស់ភាគច្រើនគឺនាំចូលពីបរទេស។
សម្តេច ហ៊ុន សែន៖«ខ្ញុំចង់បញ្ចេញសារទៅកាន់ម្ចាស់សហគ្រាសធុនតូច និងមធ្យមទាំងឡាយឱ្យបានដឹងថា រដ្ឋាភិបាលឈានទៅបង្កើតឱ្យមានធនាគារសម្រាប់សហគ្រាសធុនតូច និងមធ្យមដែលមានដើមទុន ១០០លានដុល្លារអាមេរិក ។យើងមិនចង់ ឱ្យ ផលប៉ះពាល់ទាំងឡាយដែលកើតចេញពីនេះពីនោះមកដល់យើងធ្ងន់ហួសនោះទេ ដែលប្រៀបដូចជាគេដាក់អុកស៊ីសែន គេដកអុកស៊ីសែនគឺងាប់ យើងមិនអាចក្លាយខ្លួនជាអ្នកទទួលអុកស៊ីពីគេនោះទេ»។
ជាការកត់សម្គាល់ ការបង្កើនធនាគារសម្រាប់ផ្តល់កម្ចីដល់ម្ចាស់សហគ្រាសធន់តូចនេះ កើតឡើងស្របពេលដែលសហរដ្ឋ អាមេរិក និងសហភាពអឺរ៉ុបកំពុងពិនិត្យពិចារណារឹតបណ្តឹងលើពន្ធនាំចូលទំនិញពីកម្ពុជា បន្ទាប់សហគមន៍អន្តរជាតិទាំងពីរនេះបានចោទរដ្ឋាភិបាលថាធ្វើឱ្យស្ថានភាពប្រជាធិបតេយ្យ និងសិទ្ធិមនុស្សធ្ងន់ចុះយ៉ាងធ្ងន់ធ្ងរក្រោយការរំលាយគណបក្សសង្គ្រោះជាតិ ការបិទសិទ្ធិនយោបាយសមាជិកបក្សប្រឆាំង ការបិទប្រព័ន្ធផ្សាព្វផ្សាយ និងអង្គការសង្គមស៊ីមួយចំនួនដែលមាននិន្នាការទិចទានចំណុចអវិជ្ជមានរបស់រដ្ឋាភិបាល។
ការប្រកាសបង្កើនធនគារដែលមានទន់ជាង ១០០លានដុល្លារសម្រាប់ផ្តល់កម្ចីសហគ្រាសធន់តូចនេះ ក៏ធ្វើឡើងស្របពេលដែលអ្នកវិភាគនយោបាយ សេដ្ឋកិច្ច និងអ្នកតាមដានសង្គមព្យាករណ៍ថា ប្រសិនបើសហភាពអឺរ៉ុបដែលជាទីផ្សារផលិលសម្លៀកបំពាក់ធំជាងគេរបស់កម្ពុជារឹតបណ្តឹងពន្ធ ឬបិទកូតានាំចូលសម្លៀកបំពាក់មែននោះ នោះថៅកែនឹងបិទរោងចក្រ ហើយកម្មករនឹងអត់ការធ្វើផងដែរ។
កាលពីថ្ងៃទី០៤ ធ្នូ រដ្ឋមន្ត្រីក្រសួងពាណិជ្ជកម្មផ្ញើលិខិតរាយការណ៍ទៅកាន់នាយករដ្ឋមន្រ្តីសម្តេច ហ៊ុន សែន ពីការខាតបង់ប្រាក់ចំណូលលើពន្ធអាករប្រមាណ ៦៧៦លានដុល្លារប្រសិនបើសហភាពអឺរ៉ុបព្យួរសម្បទានពន្ធគយនាំចូលទំនិញពីកម្ពុជាមែននោះ។ ក្នុងលិខិតដដែល លោក ប៉ាន សូរស័ក្កិ បានស្នើដោយជូនជាយោបល់ដល់សម្តេច ហ៊ុន សែន ថា កម្ពុជាក្នុងស្ថានភាពនេះ ត្រូវធ្វើយ៉ាងណាបញ្ចុះបញ្ចូលបណ្តាប្រ ទេសសហភាពអឺរ៉ុបឱ្យបាន ដើម្បីទប់ស្កាត់ការសម្រេចព្យួរសម្បទានពន្ធគយណាមួយជាយថាហេតុ ។
ជុំវិញរឿងនេះលោកបណ្ឌិត មាស នី អ្នកសិក្សាពីការអភិវឌ្ឍន៍សង្គមគាំទ្រចំពោះគំនិតផ្តួចផ្តើមដែលចង់ពង្រីកសហគ្រាសធន់តូចឱ្យបានច្រើននេះ ។ តែយ៉ាងណាលោកថា គំនិតនេះរដ្ឋាភិបាលគួរបង្កើតឡើងតាំងពី១០ឆ្នាំមុនមកម្ល៉េះ។
លោកបណ្ឌិត មាស នី បន្តថា ការបង្កើតធនាគារសម្រាប់សហគ្រាសខ្នាតតូចនេះអាចនឹងប្រឈមមុខនឹងបញ្ហាពីរធំៗ គឺ៖ទី មួយគឺបញ្ហាហូរចូលទំនិញប្រើប្រាស់ពីបរទេសច្រើនលើសលប់ដែលអាចបង្កហានីភ័យដល់ម្ចាស់សហគ្រាសដែលចង់បង្កើតសហគ្រាស ឬសិប្បកម្មក្នុងស្រុកពេលទទួលបានកម្ចីនេះ។ ទី២ គឺរដ្ឋាភិបាលអាចប្រឈមនឹងការខាតបង់ នៅពេលម្ចាស់សហគ្រាសមិនសងមកធនាគារវិញ ព្រោះកម្ពុជាធ្លាប់មានបទពិសោធន៍ជូរចត់កាលពីប៉ុន្មានទសវត្សមុន ដែលពលរដ្ឋខ្ចីប្រាក់រដ្ឋហើយមិនសងវិញនោះ។
លោកបណ្ឌិត មាស នី៖«ប៉ុន្តែខ្ញុំគាំទ្រ អ្វីដែលជាការលើកឡើងរបស់សម្តេចនាយកដែលគ្រាន់ថា គាត់ទុកពេលយូរពេក យើងមិនបានគិតពីដើមមក ដល់ពេលស្ថានភាពធ្ងន់ធ្ងរហើយ បានយើងគិតយើងអាចហួសពេល ក៏ប៉ុន្តែអ្នកនយោបាយគេថាមិនយឹតពេលនោះទេ តែសម្រាប់ខ្ញុំ ខ្ញុំមើលឃើញថារដ្ឋាភិបាលគួរគិតពី១០ឆ្នាំមុន ហើយបើគិតពី១០ឆ្នាំមុន ខ្ញុំថាគណបក្សប្រជាជនមិនបាត់បង់ប្រជាប្រិយភាពដូចរយៈពេលបោះឆ្នោតកន្លងមកនោះទេ»។
តាមលោកបណ្ឌិត មាស នី ទំនិញប្រើប្រាស់ក្នុងជីវភាពរស់នៅ និងគ្រឿងឧបភោគបរិភោគជាង៩០%គឺសុទ្ធសឹងតែជាផលិត ផលនាំចូលពីបរទេសពិសេស ថៃ និង វៀតណាម។
កាលពីពេលថ្មីៗក្នុងវេទិកាជួបជុំជាមួយម្ចាស់អាជីវកម្មធ្វើឡើងនៅក្រុងភ្នំពេញលោក ឌី សុវណ្ណ អគ្គនាយករងនៅក្រសួងសេដ្ឋ កិច្ច និងហិរញ្ញវត្ថុ បានឲ្យដឹងថា បច្ចុប្បន្នកម្ពុជាមានអាជីវកម្មខ្នាតតូចឬ(SME) ប្រហែល ៥៦ម៉ឺនកន្លែងកំពុងប្រតិបត្តិការនៅក្នុងប្រទេសកម្ពុជា។សហគ្រាសខ្នាតតូចនេះបានផ្ដល់ការងារ ៧០ ភាគរយដល់ប្រជាជនក្នុងសុ្រក។ ប៉ុន្តែតួលេខនោះ មានតែ ១០ ភាគរយប៉ុណ្ណោះត្រូវបានផ្ដល់ហិរញ្ញប្បទានផ្លូវការពីគ្រឹះស្ថានធនាគារ។
រីឯលោកស្រី ជា សិរិ អគ្គនាយកធនាគារជាតិនៃកម្ពុជាដែលត្រូវបានស្រង់មកចុះផ្សាយដោយសារព័ត៌មានមួយកាលពីពេលថ្មីៗនេះថា ការចំណាយខ្ពស់នៃការអនុលោមតាមបទប្បញ្ញត្តិ កង្វះគោលនយោបាយរបស់រដ្ឋាភិបាល ទាក់ទិននឹងអាជីវកម្មខ្នាតតូច សិទ្ធិទទួលបានការផ្ដល់ហិរញ្ញប្បទាននៅមានកម្រិត និងផលិតភាពមានកម្រិតទាប ខណៈព័ត៌មានទីផ្សារនៅមានកម្រិតគគឺ ជាបញ្ហារ៉ាំរ៉ៃមួយសម្រាប់ អាជីវកម្មខ្នាតតូច ឬSME៕
