ព័ត៌មានក្នុងប្រទេស

រដ្ឋមន្ដ្រីក្រសួងការងារ សន្យាការពារពលករ ពលការិនី ខ្មែរធ្វើការនៅក្រៅប្រទេស

ភ្នំពេញ៖ រដ្ឋមន្ដ្រីក្រសួងការងារ ជំរុញឲ្យទីភ្នាក់ងារជ្រើសរើសពលករទាំងអស់ ត្រូវការពារពលករ ពលការិនីខ្មែរ ធ្វើការក្រៅប្រទេស បើទោះជាស្របច្បាប់ ឬមិនស្របច្បាប់ក៏ដោយ។ តែសង្គមស៊ីវិលនៅតែព្រួយបារម្ភពីសុវត្ថិភាពពលករក្រៅប្រទេស ពិសេសគឺស្ដ្រី ដែលងាយប្រឈមការរំលោភបំពានផ្សេងៗ។

លោក លៀ ស៊ីណា រាយការណ៍៖

រដ្ឋមន្ដ្រីក្រសួងការងារ និងបណ្ដុះបណ្ដាលវិជ្ជាជីវៈលោក អ៊ិត សំហេង បានថ្លែងក្នុងឱកាសខួប ១០ឆ្នាំ នៃសមាគមជ្រើសរើសពលករកម្ពុជា កាលពីថ្ងៃសុក្រ ទី១៥ ខែធ្នូ ដោយបានបង្ហាញការប្ដេជ្ញា និងជំរុញ ដល់ភាគីពាក់ព័ន្ធទាំងអស់ ដែលបានចុះបញ្ជីស្របច្បាប់ បញ្ជូនពលករទៅធ្វើការងារក្រៅប្រទេស ត្រូវបង្កើនការយកចិត្ដទុកដាក់ជួយការពារផលប្រយោជន៍របស់ពលករទាំងអស់ មិនថា ពួកគេទៅដោយស្របច្បាប់ ឬក៏មិនស្របច្បាប់នោះទេ ព្រោះពួកគេសុទ្ធតែបានចូលរួមចំណែកយ៉ាងសំខាន់ក្នុងការជួយធ្វើឲ្យសេដ្ឋកិច្ចជាតិមានការរីកចម្រើន។

លោក អ៊ិត សំហេង៖«អញ្ចឹងទេ នៅពេលដែលគេទៅស្របច្បាប់ យើងត្រូវជួយការពារសិទ្ធិនិងផលប្រយោជន៍របស់គេ បើមានគ្រោះថ្នាក់ត្រូវតែជួយធ្វើយ៉ាងណាផ្ដល់សេវាធ្វើយ៉ាងម៉េច ឲ្យពួកគេទទួលបានផលប្រយោជន៍ស្របទៅតាមច្បាប់នៃប្រទេសដែលទទួល បើមិនទាន់ស្របច្បាប់យើងត្រូវតែជួយគេឲ្យស្របច្បាប់»។

បន្ថែមពីនេះរដ្ឋមន្ដ្រីក្រសួងការងារបានបន្ដថា មានពលករខ្មែរ កំពុងធ្វើការងារនៅក្រៅប្រទេសប្រមាណ ១លាន ២សែននាក់ ដែលពួកគេបានផ្ញើប្រាក់ត្រឡប់មកគ្រួសារប្រមាណជា ៣៨០០លានដុល្លារ ក្នុងមួយឆ្នាំៗ។

ថ្លែងក្នុងពិធីនេះដែរ លោកស្រី អ៊ឹង សៀឫទ្ធី ប្រធានសមាគមជ្រើសរើសពលករកម្ពុជា ហៅកាត់ថា(អាក្រា) មានប្រសាសន៍ថា សមាគម បានអនុវត្ដការងារតាំងតែពីឆ្នាំ២០០៧មក ដើម្បីធ្វើការបញ្ជូនពលករទៅធ្វើការងារក្រៅប្រទេស ដែលអនុឡោមតាមច្បាប់របស់ប្រទេសកម្ពុជា។ លោកស្រីបន្ដថា ចាប់តាំងពីឆ្នាំ២០១៤ ក្រោមជំនួយរបស់អង្គការ ILO សមាគមបានធ្វើការងារមួយចំនួនដើម្បីផ្សព្វផ្សាយដល់ប្រជាពលរដ្ឋ ឲ្យបានយល់កាន់តែច្បាស់ពីការធ្វើចំណាកស្រុកប្រកបដោយសុវត្ថិភាព ដែលក្នុងនោះរួមមាន ការចូលរួមធ្វើជាវាគ្មិនតាមរយៈវិទ្យុ និងទូរទស្សន៍នានា ហើយជាពិសេស គឺបានចុះទៅផ្សព្វផ្សាយនៅតំបន់ដាច់ស្រយាលមួយចំនួនដែលមានដូចជាខេត្ដកំពង់ចាម ព្រៃវែង សៀមរាប បាត់ដំបង និងបន្ទាយមានជ័យជាដើម។

លោកស្រី អ៊ឹង សៀឫទ្ធី៖«សហការជាមួយក្រសួងស្ថាប័នពាក់ព័ន្ធ ដើម្បីចូលរួមជាវាគ្មិនក្នុងការផ្សព្វផ្សាយការធ្វើចំណាកស្រុកប្រកបដោយសុវត្ថិភាព នៅតាមបណ្ដាខេត្ដស្រុក និងតំបន់ដាច់ស្រយាលដែលរួមមានខេត្ដកំពង់ចាម ព្រៃវែង សៀមរាប បាត់ដំបង និងបន្ទាយមានជ័យជាដើម បង្កើនកិច្ចសហប្រតិបត្ដិការណ៍និងការចុះអនុស្សរណៈយោគយល់គ្នាជាមួយសមាគមបរទេស ស្ដីពីការគ្រប់គ្រង និងការពារសិទ្ធិរបស់ពលករ»។

បើទោះជាមានការប្ដេជ្ញាពីរដ្ឋមន្ដ្រីក្រសួងការងារ ក្នុងការការពារពលករចំណាស្រុក ក៏ដូចជាការចុះធ្វើសកម្មភាពពីសមាគមជ្រើសរើសពលករក្ដី ក៏ប៉ុន្ដែអង្គការសម្ព័ន្ធខ្មែរជំរឿន និងការពារសិទ្ធិមនុស្ស លីកាដូ នៅតែមានក្ដីព្រួយបារម្ភពីសុវត្ថិភាពលករចំណាកស្រុកទៅក្រៅប្រទេស ដែលងាយប្រឈមនឹងការធ្វើទុក្ខបុកម្នេញពីថៅកែ ជាពិសេសគឺស្ដ្រី ដែលជាជនងាយរងគ្រោះបំផុត ខណៈចេញទៅធ្វើការងារចំណាកស្រុក។

លោក អំ សំអាត មន្ដ្រីស៊ើបអង្កេតជាន់ខ្ពស់អង្គការ លីកាដូ មានប្រសាសន៍ថា បើទោះបីជាទីភ្នាក់ងារបញ្ជូនពលករធានាអះអាងក៏ដោយ តែបើផ្អែកតាមបទពិសោធន៍កន្លងមក អង្គការលីកាដូ មើលឃើញថា ពលករភាគច្រើនគឺតែងតែរងការធ្វើបាបពីក្រុមថៅកែ ហើយពិសេសគឺស្ដ្រី ដែលងាយប្រឈមបញ្ហាបំផុត ក្នុងការចេញទៅធ្វើការងារចំណាកស្រុក។

លោក អំ សំអាត៖«បើនិយាយពីមុនមកគឺយើងឃើញថា ស្ដ្រី ប្រឈមច្រើនជាងបុរសពីមុនមកនៅម៉ាឡេស៊ីអី គឺស្ដ្រីមានច្រើន បុរសក៏មានរងទុក្ខដែរ ប៉ុន្ដែបុរសបើយើងឃើញភាគច្រើនគឺរងទុក្ខ តែផ្នែកនេសាទអីហ្នឹងទទួលច្រើន បើទាក់ទងនឹងពលករអីគាត់ភាគច្រើនប្រឈមគ្រោះថ្នាក់ការងារ ឬក៏អាចប្រឈមដែរ តែភាគតិចជាងស្ដ្រី»។

លោក អំ សំអាត យល់ថា ដើម្បីការពារពលករ ចំណាកស្រុកទៅក្រៅប្រទេស ឲ្យគេចផុតពីការធ្វើទុក្ខបុកម្នេញផ្សេងៗ រដ្ឋាភិបាលគួរតែពិនិត្យមើលល័ក្ខខ័ណ្ឌ នៃអនុស្សរណៈយោគយល់គ្នារវាងប្រទេសទាំងពីរឲ្យបានច្បាស់ ស្ដីពីវិធានការ និងយន្ដការច្បាស់លាស់ ដើម្បីជួយពលករ។ លោកទទូចថា ក្រសួងគួររៀបចំវិធានការជាក់លាក់ជាមួយភ្នាក់ងារបញ្ជូនពលករទៅក្រៅប្រទេស ឲ្យទទួលខុសត្រូវចំពោះមុខច្បាប់ករណីបញ្ជូនពលករទៅ មានបញ្ហារំលោភសិទ្ធិ ឬក៏ត្រូវបានធ្វើបាបពីថៅកែ និងចុងក្រោយក្រសួងការងារគួរ តែមានផែនការច្បាស់លាស់ដើម្បីចុះទៅដល់កន្លែងដោយផ្ទាល់ ដែលពលករខ្មែរកំពុងធ្វើការងារ។

គួរជម្រាបថា មកដលពេលនេះ កម្ពុជាមានទីភ្នាក់ងារជ្រើសរើសពលករទៅធ្វើការក្រៅប្រទេសទាំងអស់មានចំនួន ៨៥អង្គភាព ប៉ុន្ដែក្នុងនោះមានតែ ៤៧អង្គភាពប៉ុណ្ណោះ ដែលបានចុះបញ្ជីជាសមាជិកសមាគមទីភ្នាក់ងារជ្រើសរើសពលករកម្ពុជា៕

Post Views: 273