ភ្នំពេញ៖ប្រទេសកម្ពុជានឹងមានឧទ្យានកម្សាន្តស្តង់ដាអន្តរជាតិដោយចំណាយប្រាក់៦០លានដុល្លារអាមេរិកវិនិយោគដោយក្រុមហ៊ុនប៉ែងហួតគ្រុប(The Peng Houth Group)។នេះបើយោងតាមគេហទំព័រGloble Amusements & Play។
គេហទំព័រនេះបានស្រង់សំដីលោកឧញ្ញ៉ា ថៃ ម៉េងលី នាយកប្រតិបត្តិក្រុមហ៊ុនប៉ែងហួតគ្រុបបានឲ្យដឹងថាឧទ្យានកម្សាន្តនេះសាងសង់លើផ្ទៃដីទំហំ៨ហិចតាស្ថិតនៅក្នុងបុរីប៉េងហួតបឹងស្នោ រាជធានីភ្នំពេញ។
លោកឧញ្ញ៉ាបន្ថែមថានៅក្នុងឧទ្យានកម្សាន្តក្រុមហ៊ុនបានសាងសង់សាលសន្និសីទនិងអគារសម្រាប់រៀបចំពិធីរៀបអាពាហ៍ពិពាហ៍ដោយមានរចនាបទអឺរ៉ុបនិងដាំដើមឈើធំៗលក្ខណៈធម្មជាតិនិងផ្លូវដើរតាមដងស្ទឹង។ក្រុមហ៊ុននេះគ្រោងសង់ស្ពានចំនួនបីឆ្លងស្ទឹងនេះ។
លោកឧញ្ញ៉ា ថៃ ម៉េងលី«ទាក់ទងនឹងការគ្រប់គ្រងតំបន់នេះយើងនឹងបែងចែកឧទ្យានកម្សាន្តទៅតាមរចនាបទខុសៗគ្នាដូចរចនាបទអឺរ៉ុប ស្កុតឡេននិងរចនាបទអាឡឺម៉ងយុគកណ្តាលដែលរចនាបទនេះចាប់សតវត្សទី៥ដល់ទី១៥។»
លោកឧញ្ញ៉ាបញ្ជាក់ថា«តំបន់ទី២សង់ផ្ទះតាមរចនាបទប៉ូឡូចនិងបារាំង។តំបន់ទី៣សង់ស្ទឹងតាមស្តង់ដា អ៊ីតាលី។អគារសាងសង់នៅជាប់ស្ទឹងនឹងមានភោជនីដ្ឋានពហុជាតិសាសន៍ដែលមានមុខម្ហូបអាហារអឺរ៉ុប ចិន ជប៉ុន ខ្មែរនិងប្រទេសមួយចំនួនទៀត។»
លោកឧញ្ញ៉ាបង្ហាញភាពជឿជាក់ថាគម្រោងឧទ្យានកម្សាន្តប្រកបដោយភាពច្នៃប្រឌិតដើម្បីសម្លឹងការឈ្នះពាន់រង្វាន់អន្តរជាតិចំនួនពីរ។ក្រុមហ៊ុនរបស់លោកឧញ្ញ៉ាកំពុងសម្លឹងលទ្ធភាពឈ្នះបានពាន់រង្វាន់រចនាបទឧទ្យានល្អបំផុតលំដាប់ផ្កាយ៥និងពាន់រង្វាន់អភិវឌ្ឍន៍ល្អបំផុតនៅកម្ពុជានៃពាន់រង្វាន់អចលនទ្រព្យអន្តរជាតិដែលមានមូលដ្ឋាននៅប្រទេសអង់គ្លេស។
លោកឧញ្ញ៉ាថាគម្រោងនេះស្វាគមន៍អ្នកដែលមានបំណងទទួលទានម្ហូបអាហារមានអនាម័យនិងផ្តល់នូវកន្លែងប្រកបដោយបរិយាកាលល្អស្អាត កន្លែងសម្រាកនិងភោជនីយដ្ឋានក្នុងបុរីប៉េងហួត។ ម្យ៉ាងទៀតក្រុមហ៊ុនចង់ចូលរួមចំណែកក្នុងអភិវឌ្ឍទីក្រុងផ្តល់នូវគម្រោងស្អាតសម្រាប់ភ្ញៀវទេសចរជាតិនិងអន្តរជាតិមិនធ្លាប់មានពីមុនមកនៅកម្ពុជា៕
