ភ្នំពេញ ៖ ក្រសួងការងារ និងបណ្ដុះបណ្ដាលវិជ្ជាជីវៈ កាលពីថ្ងៃទី១១ ខែធ្នូ ម្សិលមិញ បានចាប់ផ្ដើមដំណើរការថ្ងៃដំបូងនៃការបើកវគ្គបណ្ដុះបណ្ដាលស្ដីពីមូលដ្ឋានគ្រឹះ និងសុវត្ថិភាពឡចំហាយ ក្នុងគោលបំណងទប់ស្កាត់គ្រោះថ្នាក់នៃការផ្ទុះឡចំហាយនាពេលអនាគត។ ករណីនេះ តំណាងសហជីព ចង់ឃើញក្រសួងការងារ ពង្រឹងការអនុវត្ដការងាររបស់ក្រុមអធិការកិច្ចរបស់ក្រសួង ជុំវិញការការពារសុវត្ថិភាពរបស់កម្មករ កម្មការិនី ព្រោះកន្លងមក ការផ្ទុះឡចំហាយបានបណ្ដាលឲ្យកម្មករមានគ្រោះថ្នាក់ដល់ស្លាប់ទៀតផង។
លោក លៀ ស៊ីណា រាយការណ៍៖
វគ្គបណ្ដុះបណ្ដាលនេះ រៀបចំឡើងរយៈពេល ៣ថ្ងៃ ដែលមានការចូលរួមពីក្រុមមន្ដ្រីរបស់ក្រសួងការងារ មន្ដ្រីស្ថាប័នពាក់ព័ន្ធ ក៏ដូចជាអង្គការវិជ្ជាជីវៈផ្សេងៗ ដែលមានអ្នកជំនាញក្រសួងការងាររបស់ប្រទេសសឹង្ហបុរី មកធ្វើបទបង្ហាញ ស្ដីពីបច្ចេកទេសក្នុងការគ្រប់គ្រង និងប្រើប្រាស់ឡចំហាយប្រកបដោយសុវត្ថិភាព។
រដ្ឋមន្ដ្រីក្រសួងការងារ លោក អ៊ិត សំហេង បានថ្លែងក្នុងវគ្គបណ្ដុះបណ្ដាលនេះ ដោយសុំឲ្យមន្ដ្រីក្រោមឱវាទក្រសួងការងារទាំងអស់ ផ្ដោតការយកចិត្ដទុកដាក់ឲ្យខ្លាំងបំផុតចំពោះសុវត្ថិភាព ឡចំហាយ នៅតាមរោងចក្រ ដែលធ្លាប់មាន ឬមិនធ្លាប់មាន ការផ្ទុះកន្លងមក។ លោករដ្ឋមន្ដ្រីក្រសួងការងារ បានបន្ដថា ដោយសារតែកន្លងមកមានការផ្ទុះឡចំហាយ ដែលនាំឲ្យមានគ្រោះថ្នាក់ដល់កម្មករ កម្មការិនី ទើបក្រសួងការងាររៀបចំជាវគ្គបណ្ដុះបណ្ដាលនេះឡើង ដោយរំពឹងថា នឹងអាចបញ្ឈប់គ្រោះថ្នាក់នេះមិនឲ្យកើតមានឡើងម្ដងទៀត។
លោក អ៊ិត សំហេង ៖«ប្រព័ន្ធសុវត្ថិភាពឡចំហាយនេះ គឺជារឿងចំបាច់ណាស់ហើយកន្លងទៅយើងឃើញថា មានករណីផ្ទុះឡចំហាយនេះគឺកើតឡើង អញ្ចឹងហើយបានជាក្រសួងការងារ និងបណ្ដុះបណ្ដាលវិជ្ជាជីវៈបានរៀបចំយន្ដការ ក៏ដូចជា រៀបចំនូវការណែនាំ ដើម្បីនឹងទប់ស្កាត់ ហើយនិងធានាការប្រើប្រាស់ឡចំហាយនេះដោយសុវត្ថិភាព និងទប់ស្កាត់គ្រោះថ្នាក់ដែលកើតឡើងជាយថាហេតុ»។
តែយ៉ាងណាតំណាងសហជីពហាក់មិនមានជំនឿលើយន្ដការរបស់ក្រសួងការងារច្រើននោះទេ ដោយលើកឡើងថា មានត្រឹមតែការបណ្ដុះបណ្ដាល បើគ្មានសកម្មភាព គឺមិនអាចជួយដោះស្រាយបញ្ហាដដែលៗ ជុំវិញគ្រោះថ្នាក់នៃការផ្ទុះឡចំហាយ ក្នុងរោងចក្រនេះឡើយ។
លោក ម៉ាន់ សេងហាក់ អនុប្រធានសហជីពសេរីកម្មករបានលើកឡើងថា រហូតមកដល់ពេលនេះលោកឮត្រឹមតែពាក្យប្ដេជ្ញារបស់មន្ដ្រីជាន់ខ្ពស់ នៃក្រសួងការងារតែប៉ុណ្ណោះ ជុំវិញការទប់ស្កាត់គ្រោះថ្នាក់នៃការផ្ទុះឡចំហាយក្នុងរោងចក្រនេះ។ លោកបន្ដថា អ្វីដែលក្រសួងគួរបង្ហាញឲ្យកម្មករ កម្មការិនីបានឃើញ គឺសកម្មភាពជាក់ស្ដែង របស់មន្ដ្រីអធិការកិច្ចក្រសួងការងារ ជុំវិញការចុះត្រួតពិនិត្យបច្ចេកទេសតាមរោងចក្រនីមួយៗ។
លោក ម៉ាន់ សេងហាក់៖«ទាក់ទងរឿងចំហាយផ្ទុះនេះ ទាល់តែផ្ទុះហើយបានគាត់បង្កើតជាក្រុមការងារ ក៏ប៉ុន្ដែមុននឹងផ្ទុះអត់មានបង្កើតក្រុមការងារដើម្បីទប់ស្កាត់ទេ ទាល់តែផ្ទុះហើយមានឧបទ្ទវហេតុហើយបានរៀបចំបង្កើតក្រុមការងារ វាមានប្រសិទ្ធភាពអី វាអត់ដដែលហ្នឹង»។
ករណីឆេះរោងចក្រកាត់ដេរសម្លៀកបំពាក់ ដោយសារតែការផ្ទុះឡចំហាយ គិតមកដល់ពេលនេះគឺមាន ៧៦ករណី នៅក្នុងឆ្នាំ២០១៧នេះ។ ក្នុងចំណោមករណីទាំងអស់នេះ យ៉ាងហោចណាស់បានបណ្ដាលឲ្យបុរស ស្ដ្រី ស្លាប់បាត់បង់ជីវិត ចំនួន ២នាក់ ក្នុងចំណោមបុរស ស្ដ្រី ផ្សេងទៀត ចំនួន ១៧នាក់ដែលរងរបួសធ្ងន់ និងស្រាល។
ជានិច្ចកាលស្ដ្រី តែងតែក្លាយជារងគ្រោះច្រើនជាងបុរស ប្រសិនមានករណីផ្ទុះឡចំហាយ ឬក៏ឆេះរោងចក្រកាត់ដេរសម្លៀកបំពាក់បានកើតឡើង ពីព្រោះតែវិស័យឧស្សាហកម្មកាត់ដេរសម្លៀកបំពាក់កម្ពុជា ដែលមានកម្មករសរុបប្រមាណជាង ៨០ម៉ឺននាក់នោះ គឺមានស្ដ្រីរហូតទៅដល់ជាង ៧០ម៉ឺននាក់ទៅហើយ ហើយម្យ៉ាងស្ដ្រី គឺជនដែលងាយរងគ្រោះបំផុតស្ទើរគ្រប់កាលៈទេសៈ ដោយសារតែធម្មជាតិរបស់ស្ដ្រី គឺជាសភាវៈដែលខ្សោយកម្លាំង៕
