ភ្នំពេញ៖ក្រសួងសុខាភិបាលប្រកាសឲ្យប្រជាពលរដ្ឋមានការប្រុងប្រយ័ត្នខ្ពស់អំពីជំងឺផ្តាសាយបក្សីH5N1ផ្ទុះឡើងជាថ្មីនៅខេត្តកំពង់ចាម។
យោងតាមទំព័រហ្វេសប៊ុករបស់នាយកដ្ឋានប្រយុទ្ធប្រឆាំងជំងឺឆ្លងបង្ហោះនៅថ្ងៃទី១០ធ្នូ បានឲ្យដឹងថាជំងឺផ្តាសាយបក្សីH5N1បានផ្ទុះឡើងមួយករណីស្ថិតនៅភូមិកោះស្វាយ ឃុំត្រពាំងព្រះ ស្រុកព្រៃឈរ ខេត្តកំពង់ចាម។ទោះបីយ៉ាងណានាយកដ្ឋានប្រយុទ្ធប្រឆាំងជំងឺឆ្លងថាករណីនេះមិនទាន់ឆ្លងមកលើមនុស្សទេ។
នាយកដ្ឋានប្រយុទ្ធប្រឆាំងជំងឺឆ្លងរបស់ក្រសួងសុខាភិបាលបញ្ជាក់ថាមន្ត្រីជំនាញកំពុងតាមដានយ៉ាងយកចិត្តទុកដាក់បំផុត។ករណីនេះក្រសួងសុខាភិបាលអំពាវនាវដល់ប្រជាជនរដ្ឋប្រុងប្រយ័ត្នខ្ពស់ដោយមិនត្រូវយកសត្វមាន់ ទា ឬបក្សីឈឺឬងាប់មកបរិភោគនិងលក់បន្តទេ។
ចាប់ពីឆ្នាំ២០០៥ដល់ឆ្នាំ២០១៤ករណីឆ្លងជំងឺផ្តាសាយបក្សីH5N1ឆ្លងពីសត្វបក្សីទៅមនុស្ស ចំនួន៥៦ករណីក្នុងនោះ៣៧ករណីបណ្តាលឲ្យស្លាប់។នេះបើតាមរបាយការណ៍នាយកដ្ឋានប្រយុទ្ធប្រឆាំងជំងឺឆ្លង។
ជំងឺផ្តាសាយបក្សីH5N1មានរោគសញ្ញាគ្រុនក្តៅលើសពី៣៨អង្សារសេ ក្អកឈឺក ដកដង្ហើម ហត់ បន្ទាប់ពីមានប្រវត្តិប៉ះពាល់ផ្ទាល់ជាមួយបក្សីឈឺឬងាប់កំឡុងពេល៧ថ្ងៃមុនចេញរោគសញ្ញា។បើមានករណីសង្ស័យត្រូវបញ្ចូនអ្នកជំងឺទៅមណ្ឌលសុខភាពឬមន្ទីរពេទ្យជិតបំផុតដើម្បីទទួលបានការព្យាបាល៕
