ភ្នំពេញ ៖ សត្វអង្កត់ខ្មៅ ដែលជាប្រភេទសត្វដ៏កម្រនៅក្នុងតំបន់អាស៊ី និងជាសត្វដែលជិតរងគ្រោះជាសាកល បានញាស់កូនចំនួន ០៣ក្បាល ក្នុងដែនជម្រកសត្វព្រៃគូលែ ព្រហ្មទេព នៃខេត្ដព្រះវិហារ។ នេះយោងតាមការឲ្យដឹងពី អង្គការសមាគមអភិរក្សសត្វព្រៃហៅកាត់ថា WCS នៅថ្ងៃទី០៨ ខែធ្នូ ឆ្នាំ២០១៧នេះ។
លោក លៀ ស៊ីណា រាយការណ៍ ៖
កូនសត្វស្លាប អង្កត់ខ្មៅ ចំនួន ០៣ក្បាលនេះបានញាស់ បន្ទាប់ពីទទួលបានការការពារពីសំណាក់សមាជិកសហគមន៍ អស់រយៈពេល ០៥សប្ដាហ៍ នៅក្នុងដែនជម្រកសត្វព្រៃគូលែន ព្រហ្មទេព នៃតំបន់ខ្ពស់រាបភាគខាងជើងប្រទេសកម្ពុជា។
លោក រស់ វ៉ាន់ មន្ដ្រីឧទ្យានុរក្សរបស់ក្រសួងបរិស្ថាន និងជាប្រធានក្រុមស្រាវជ្រាវប្រចាំដែនជម្រកសត្វព្រៃគូលែន ព្រហ្មទេព របស់អង្គការសមាគមអភិរក្សសត្វព្រៃ WCS ប្រចាំខេត្តព្រះវិហារ បានប្រាប់វិទ្យុស្ដ្រីថា សត្វអង្កត់ខ្មៅ ជាប្រភេទសត្វស្លាបដ៏កម្រ ដែលវាមានវត្ដមាននៅកម្ពុជាតិចតូចប៉ុណ្ណោះ។ លោកបន្ដថា ការការពារប្រភេទសត្វនេះ គឺបានធ្វើជាង ៥ឆ្នាំមកហើយ ប៉ុន្ដែចំនួនសំបុករបស់សត្វអង្កត់ខ្មៅនេះ លោកសង្កេតឃើញថា នៅតែមានចំនួនតិចតូច។
លោក រស់ វ៉ាន់ បន្ដថា សត្វស្លាបអង្កត់ខ្មៅនេះ គឺមាននៅប្រទេសដទៃៗទៀត ប៉ុន្ដែវាមិនច្រើននោះទេ ដោយឡែកសម្រាប់កម្ពុជា សត្វអង្កត់ខ្មៅ គឺជាប្រភេទសត្វដ៏កម្រ លោកមានការព្រួយបារម្ភថា ប្រសិនបើពលរដ្ឋ ពិសេសប្រជាសហគមន៍មិនចូលរួមថែរក្សាសត្វប្រភេទកម្រនេះទេ វានឹងឈានទៅដល់ការផុតពូជនាពេលអនាគត់។
លោក រស់ វ៉ាន ៖«សត្វអង្កត់ខ្មៅហ្នឹងលើសាកលលោកវាមិនមែនជាសត្វកម្រប៉ុន្មានទេ ក៏ប៉ុន្ដែដោយឡែកនៅប្រទេសកម្ពុជា គឺជាសត្វកម្រមួយ វាមានចំនួនតិច ហើយរដូវពងកូនរបស់វាក៏មានចំនួនតិចណាស់ដែរ ហើយអញ្ចឹងប្រសិនជាមានការគំរាមកំហែងដល់ទីជម្រក ឬក៏កន្លែងវារកស៊ី និងពងកូន វាអាចនឹងផុតពូជទៅថ្ងៃអនាគត់ អញ្ចឹងបានចង់ឲ្យប្រជាពលរដ្ឋយើងជួយការពារ ជួយថែរក្សា»។
លើសពីនេះលោកអំពាវនាវដល់ប្រជាពលរដ្ឋ ទាំងអស់ឲ្យផ្ដល់ព័ត៌មានដល់ក្រុមអភិរក្សសត្វព្រៃ ប្រសិនជាបានឃើញ ឬជួបសត្វព្រៃកម្រស្ថិតក្នុងប្រទេសកម្ពុជា ពិសេសក្នុងតំបន់អភិរក្សដែលក្រសួងបរិស្ថានបានសហការជាមួយក្រុមអង្គការអភិរក្សសត្វព្រៃ ដើម្បីរួមគ្នាថែរក្សាការពារជីវិតសត្វព្រៃទាំងអស់នោះ។
លោក រស់ វ៉ាន ៖ «ប្រសិនជាប្រជាពលរដ្ឋ ឬក៏បងប្អូនណាបានឃើញសំបុក ឃើញអីហ្នឹង គួរតែរាយការណ៍មកជាបន្ទាន់ដល់អង្គការ អភិរក្សសត្វព្រៃហ្នឹងហើយយើងនឹងផ្ដល់ជាប្រាក់ឧបត្ថមដើម្បីយាមការពារសត្វហ្នឹងឲ្យបានញាស់ ឲ្យបានចេះហើរជោគជ័យអញ្ចឹងទៅ»។
សត្វអង្កត់ខ្មៅ (ឬហៅម្យ៉ាងទៀតថា ដំបងក្រញូង) គឺជាសត្វស្លាបដ៏កម្រមួយប្រភេទ នៅក្នុងតំបន់អាស៊ី និងស្ថិតនៅក្នុងបញ្ជីក្រហមរបស់អង្គការ IUCN ជាប្រភេទសត្វស្លាបជិតរងគ្រោះជាសាកល។ តាមការប៉ាន់ប្រមាណ សត្វអង្កត់ខ្មៅលើសាកលមានចំនួនចន្លោះពី ១៥.០០០ក្បាល ទៅ ៣៥.០០០ក្បាល ហើយភាគច្រើន នៃចំនួនសត្វអង្កត់ខ្មៅទាំងអស់នេះមានរស់នៅក្នុងប្រទេសអូស្ដ្រាលី។ សត្វអង្កត់ខ្មៅ ត្រូវបានក្រុមអ្នកអភិរក្សសត្វព្រៃ បញ្ជាក់ថា វាមានមិនដល់ ១០គូរនោះទេ ដែលរស់នៅក្នុងតំបន់អាស៊ី ហើយគឺមានតែប្រទេសកម្ពុជា តែមួយគត់ ដែលមានសត្វប្រភេទនេះកំពុងរស់នៅ៕
