ភ្នំពេញ ៖ រដ្ឋមន្ដ្រីក្រសួងការងារព្រមានចាត់វិធានការផ្លូវច្បាប់ ទៅលើរោងចក្រដែលកម្មករ កម្មការិនី ដួលសន្លប់។ ការព្រមាននេះ បន្ទាប់ពីមានករណីកម្មករ កម្មការិនី ដួលសន្លប់ជាបន្តបន្ទាប់ នៅរយៈពេលប៉ុន្មានខែចុងក្រោយនេះ ជាពិសេស ករណីរោងចក្រមួយនៅខេត្តតាកែវ ដែលកម្មការិនីជាច្រើននាក់បានដួលសន្លប់កាលពីដើមខែធ្នូនេះ។ ជុំវិញរឿងនេះ សហជីពមួយចំនួន គាំទ្រ ដោយសង្ឃឹមថា ក្រសួងការងារនឹងធ្វើសកម្មភាពម៉ឺងម៉ាត់ និង ជាក់ស្ដែង។
លោក លៀ ស៊ីណា រាយការណ៍៖
រដ្ឋមន្ដ្រីក្រសួងការងារនៅថ្ងៃព្រហស្បតិ៍ទី៧ ធ្នូនេះ បានដាក់កំរិតធ្ងន់ៗទៅលើរោងចក្រដែលអាចប្រឈមនឹងការផាកពិន័យ ឬចាត់វិធានការទៅតាមផ្លូវច្បាប់ បើមានករណីកម្មករ កម្មការិនី សន្លប់ច្រើនក្នុងរោងចក្រនោះ។ ការព្រមាននេះគឺបន្ទាប់ពីមានករណីកម្មករ កម្មការិនី ដួលសន្លប់ប្រមាណជិត ២០០នាក់ នៅស្រុកបាទី ខេត្ដតាកែវកាលពីថ្ងៃទី០៦ ខែធ្នូ ។
លោក អ៊ិត សំហេង រដ្ឋមន្ដ្រីក្រសួងការងារ មានប្រសាសន៍ដូចនេះ ខណៈលោកផ្ដល់បទសម្ភាសន៍ដល់អ្នកសារព័ត៌មានក្នុងកម្មវិធី សិក្ខាសាលាប្រកាសសៀវភៅគោលការណ៍ណែនាំ ស្ដីអំពី ការរៀបចំ គិលានដ្ឋាន សហគ្រាស់ គ្រឹះស្ថាន នៅទន្លេបាក់២ រាជធានីភ្នំពេញ។
លោករដ្ឋមន្ដ្រីមានប្រសាសន៍ថា លោកមានការសោកស្ដាយករណី ដែលមានកម្មករ ដួលសន្លប់នៅស្រុកបាទី ខេត្ដតាកែវ កាលពីថ្ងៃម្សិលមិញ ហើយលោកនឹងមិនបណ្ដោយឲ្យមានករណីនេះកើតឡើងបន្ដទៀតឡើយ។ ជុំវិញរឿងនេះ លោកនឹងរៀបចំឲ្យមានក្រុមអធិការកិច្ចមួយ ដើម្បីត្រួតពិនិត្យបច្ចេកទេស និងអនាម័យ តាមរោងចក្រ ធ្វើការអង្កេតមុនពេលដែលអនុញ្ញាតិឲ្យក្រុមកម្មករ កម្មការិនី ចូលធ្វើការ។
លោកសង្កត់ធ្ងន់ថា ប្រសិនបើមានក្រុមការងារត្រួតពិនិត្យបច្ចេកទេសពិនិត្យហើយ នៅតែមានកម្មករ ដួលសន្លប់ទៀត ម្ចាស់រោងចក្រ និងក្រុមត្រួតពិនិត្យបច្ចេកទេស នឹងត្រូវទទួលខុសត្រូវចំពោះមុខច្បាប់។ លោក អ៊ិត សំហេង ៖«ក្រសួងនឹងចាត់ការម៉ឺងម៉ាត់តាមច្បាប់ ចំពោះកន្លែងណាដែលបណ្ដោយឲ្យមានកបញ្ហាសន្លប់ ហើយសហគ្រាស រោងចក្រ នឹងទទួលខុសត្រូវ ហើយបន្ទាប់ពីនោះក្រុមអធិការរកិច្ចក៏នឹងត្រូវទទួលខុសត្រូវរឿងនេះដែរ នៅកន្លែងណាដែលមានរឿងកើតឡើង»។
បន្ថែមលើនេះរដ្ឋមន្ដ្រីក្រសួងការងារ បានបញ្ជាក់ថា ក្រសួងនឹងរៀបចំច្បាប់ដាច់ដោយឡែកមួយ ស្ដីអំពីអនាម័យ និងសុវត្ថិភាពការងារ នៅគ្រប់គ្រឹះស្ថានការងារទាំងអស់ ដើម្បីការពារកម្មករ កុំឲ្យពួកគេជួបបញ្ហាដូចនេះបន្ដទៀត។
ទាក់ទិនប្រសាសន៍របស់រដ្ឋមន្ដ្រីក្រសួងការងារដូចនេះ ប្រធានសភាពការងារកម្ពុជា លោក អាត់ ធន់ សាទរដែលក្រសួងមានគម្រោងពង្រឹងការអនុវត្ដច្បាប់ដើម្បីការពារសុខភាពកម្មករ កម្មការិនី។ តែយ៉ាងណាលោកបញ្ជាក់ថា កម្មករ កម្មការិនី នឹងបានផលប្រយោជន៍ប្រសិនក្រសួង នឹងធ្វើការងារនេះប្រកបដោយឆន្ទៈពិតប្រាកដ។
លោក អាត់ ធន់ ៖«ប្រសិនជាធ្វើការបានម៉ឺងម៉ាត់កម្មករ អាចបានរួចផុត ហើយផាសុភាពក៏ល្អដែរ ប៉ុន្ដែបើមានមន្ដ្រីមួយចំនួនធ្វើឲ្យតែបាន ឬក៏ទៅទៅខ្លាចមិនហ៊ានចូលរោងចក្រមានអ្នកធំកាង ឬក៏មន្ដ្រីហ្នឹងជាប់ទីប្រឹក្សាក្រុមហ៊ុនអីមិនហ៊ានធ្វើរបាយការណ៍ គឺវាអត់ចេញទេ តែបើធ្វើម៉ឺងម៉ាត់ខ្ញុំគិតថា វានឹងអាចចេញ »។
គួរជម្រាបថា កាលពីថ្ងៃទី០៦ ខែធ្នូ កម្មករ កម្មការិនី រោងចក្រកាត់ដេរសម្លៀកបំពាក់ “ជេឌី អេន តូយូស៊ីមា ខូអិលធីឌី” ស្ថិតក្នុងឃុំ ពត់ស ស្រុកបាទី ខេត្ដតាកែវ ប្រមាណជិត ២០០នាក់ បានដួលសន្លប់។ តាមការសន្និដ្ឋានជាបឋមរបស់អធិការស្រុក គឺបណ្ដាលមកពីក្លិនថ្នាំជ្រលក់ក្រណាត់ និងថ្នាំកសិកម្ម ដែលកសិករបាញ់ស្មៅនៅក្បែររោងចក្រនោះ។
មកដល់ថ្ងៃទី០៧ ខែធ្នូ នេះ កម្មករ កម្មការិនី ទាំងនោះបានចេញពីមន្ទីពេទ្យមួយចំនួនធំហើយ និងនៅមួយចំនួនទៀតសម្រាកបន្ដក្នុងមន្ទីរពេទ្យបង្អែកខេត្ដ។
រោងចក្រកាត់ដេរសម្លៀកបំពាក់ “ជេឌី អេន តូយូស៊ីមា ខូអិលធីឌី” មានកម្មករសរុបប្រមាណ ៣២៧១នាក់ ក្នុងចំណោមកម្មករទាំងអស់នេះ មានស្ដ្រីចំនួន ៣១២០នាក់។ លោកអធិការស្រុកបាទី បញ្ជាក់ថា ភាគីក្រុមហ៊ុន អនុញ្ញាតិឲ្យពួកគេសម្រាករហូតដល់ថ្ងៃចន្ទ សប្ដាហ៍ក្រោយទើបចូលធ្វើការវិញ៕