ភ្នំពេញ៖របាយការណ៍ថ្មីមួយរបស់ធនាគារពិភពលោក(World Bank)ចេញផ្សាយកាលពីថ្ងៃចន្ទទី៤ធ្នូបានឲ្យដឹងថាប្រទេសកម្ពុជាបានចាកផុតពីភាពក្រីក្រតោកយ៉ាកក្នុងកម្រិតទាមប៉ុន្តែជនវណ្ណៈកណ្តាលមានទំហំតូចនៅឡើយ។
យោងតាមរបាយការណ៍ថ្មីមួយផ្សព្វផ្សាយនៅថ្ងៃទី៤ ខែធ្នូ របស់ធនាគារពិភពលោកបញ្ជាក់ថាបណ្តាប្រទេសជាសមាជិកអាស៊ានគឺមានកម្ពុជា ឥណ្ឌូនេស៊ី ហ្វ៊ីលីពីនត្រូវបានចាត់ទុកជាក្រុមប្រទេស«ចាកផុតពីភាពក្រីក្រតោកយ៉ាកកម្រិតទាប»តែជនវណ្ណៈកណ្តាលមានទំហំតូចនៅឡើយ។
ប្រទេសឡាវនិងប៉ាពូញ៉ូហ្គីណេបានចាកផុតពីភាពក្រីក្រតោងយ៉ាកកម្រិតខ្ពស់ដែលប្រទេសនេះអាចនឹងកាត់បន្ថយភាពក្រីក្រឆាប់រហ័សតាមរយៈការវិនិយោគវិស័យអប់រំជាមូលដ្ឋាននិងការលើកកម្ពស់បរិយាប័ន្នផ្នែកហិរញ្ញវត្ថុនិងពង្រឹងជំនួយនិងភាពធន់នៃសង្គម។
តាមរបាយការណ៍ធនាគារពិភពលោកដែលមានចំណងជើងថា«ផលចំណេញពីភាពចម្រុងចម្រើនបច្ចុប្បន្ន អព្ភូតហេតុតំបន់អាស៊ីបូព៌ាសម្រាប់សតវត្សរ៍ទី២១»គឺប្រទេសក្នុងតំបន់អាស៊ីបូព៌ានិងប៉ាហ្វីហ្វ៊ិចក្នុងនោះមានកម្ពុជាចាំបាច់ត្រូវផ្តោតលើគោលនយោបាយដែលមានស្រាប់ក្នុងវិស័យទេចរណ៍ នេសាទ និងតាមរយៈអានុភាពឱកាសការធ្វើចំណាកស្រុកពលកម្មនិងការវិនិយោគបានជួយកាត់បន្ថយនិងទប់ស្កាត់គ្រោះមហន្តរាយ។
កំណើនសេដ្ឋកិច្ចកម្ពុជាគេរំពឹងថាមានភាពរឹងមាំគឺ៦.៩ភាគរយនៅឆ្នាំ២០១៨ ខណៈកំណើនសេដ្ឋកិច្ចមាន៧ភាគរយនៅឆ្នាំ២០១៧។កំណើនសេដ្ឋកិច្ចនេះជួយកាត់បន្ថយភាពក្រីក្រក្នុងអត្រា៤៧.៨ភាគរយនៅឆ្នាំ២០០៧ មកត្រឹម១៣.៥ភាគរយនៅឆ្នាំ២០១៤។
បើតាមរបាយការណ៍ធនាគារពិភពលោក តំបន់អាស៊ីបូព៌ានិងប៉ាស៊ីហ្វ៊ិកបានប្រែក្លាយពីប្រទេសក្រីក្រនៅក្នុងទសវត្សរ៍ឆ្នាំ១៩៨០ទៅជាប្រទេសមានចំណូលមធ្យមក្នុងទិដ្ឋភាពវណ្ណៈសេដ្ឋកិច្ចចម្រុះ។គិតចាប់ពីឆ្នាំ២០០២មកត្រឹមឆ្នាំ២០១៥ជិត២/៣នៃប្រជាជនក្នុងតំបន់រស់នៅក្នុងស្ថានភាពសេដ្ឋកិច្ចមានសន្តិសុខឬជនវណ្ណៈកណ្តាលកើនឡើង២០ភាគរយ។
ជនក្រីក្រតោកយ៉ាកឬជនក្រីក្រល្មមធ្លាក់ចុះសន្ធឹកសន្ធាប់ជិតពាក់កណ្តាលនៃប្រជាជនសរុបក្នុងឆ្នាំ២០០២មកនៅត្រឹម១/៨បន្តិចក្នុងឆ្នាំ២០១៥។ទោះបីយ៉ាងណាបុគ្គលងាយរងគ្រោះធ្លាក់ ចូលទៅក្នុងភាពក្រីក្រវិញគឺអ្នកដែលមានចំណូលពី៣.១០ដុល្លារ ទៅ៥.១០ដុល្លារក្នុងមួយថ្ងៃប្រហែល១/៤នៃប្រជាជនសរុប។
លោកស្រី វិចតូរៀ ក្វាក្វា អនុប្រធានធនាគារពិភពលោកប្រចាំតំបន់អាស៊ីបូព៌ានិងប៉ាស៊ីហ្វ៊ិក ឲ្យដឹងថាប្រជាជនជិតមួយពាន់លាននាក់បានចាកផុតពីភាពក្រីក្រតោកយ៉ាកគឺជាសមិទ្ធផលប្រវត្តិសាស្ត្រ។ទោះបីយ៉ាងណាលោកស្រីណែនាំថាដើម្បីរក្សាកំណើនសេដ្ឋកិច្ចក្នុងតំបន់នេះគឺចាំបាច់ត្រូវ ដោះស្រាយបញ្ហាប្រឈមនិងលុបបំបាត់ទាំងស្រុងពីភាពក្រីក្រតោកយ៉ាកដោយពង្រីកទស្សនៈវិស័យសម្រាប់បង្កើនចល័តភាពផ្នែកសេដ្ឋកិច្ចនិងធានាឲ្យដល់សន្តិសុខផ្នែកសេដ្ឋកិច្ចដល់មនុស្ស គ្រប់រូប៕
