ព្យុងយ៉ាង ៖ កូរ៉េខាងជើងបានចេញសេចក្ដីថ្លែងការណ៍ភ្លាមៗ នៅថ្ងៃទី០៣ ធ្នូនេះ ដោយទាមទារឲ្យសហរដ្ឋអាមេរិក បញ្ឈប់ជាបន្ទាន់នូវគម្រោងធ្វើសមយុទ្ធ នៅថ្ងៃទី៤ ធ្នូ នៅលើឧបទ្វីបកូរ៉េ ដែលទីក្រុងព្យុងយ៉ាងចាត់ទុកថា នេះជាសកម្មភាព នៃការបង្កសង្គ្រាមយ៉ាងពិតប្រាកដ។
សេចក្ដីថ្លែងការណ៍ របស់ក្រសួងការបរទេសកូរ៉េខាងជើង បានបញ្ជាក់ទៀតថា ការពិតកូរ៉េខាងជើងគ្មានខ្លាចការធ្វើសង្គ្រាមជាមួយអាមេរិកបន្ដិចណាទេ តែអ្វីដែលសំខាន់ គឺសន្ដិភាពលើឧបទ្វីកូរ៉េ ដែលអាមេរិកត្រូវតែបញ្ឈប់ទាំងអស់រាល់សកម្មភាពយោធាលើតំបន់នេះ។
ស្របពេលនេះដែរ ក្រុងព្យុងយ៉ាងបានអះអាងថា ការបាញ់សាកល្បងកាំជ្រួចកាលពីព្រឹកព្រលឹមថ្ងៃពុធ កន្លងទៅនេះ គឺជាជោគជ័យមួយដែលអាចបញ្ជាក់បានថា កូរ៉េខាងអាចបាញ់កាំជ្រួចបំពាក់ដោយអាវុធនុយក្លែអ៊ែ ទៅកាន់សហរដ្ឋអាមេរិកបានទាំងស្រុង។ ស្របពេលនេះ ក្រុងព្យុងយ៉ាងក៏បានធ្វើពិធីអបអរសាទរយ៉ាងសម្បើម ដោយប្រកាសថា នេះជាជោគជ័យ ជាប្រវត្ដិសាស្ដ្រ នៃការរត់ប្រណាំសម្ភាវុធដ៏ទំនើបនាដំណាក់កាលចុងក្រោយនេះ។
យ៉ាងណាក៏ដោយសេតវិមាន បានព្រមានថា បើសង្គ្រាមផ្ទុះឡើង គឺអាមេរិក នឹងកម្ទេចក្រុងព្យុងយ៉ាងឲ្យក្លាយជាផេះតែម្ដង អាមេរិកអះអាងថា ខ្លួនមិនឲ្យមានការគំរាមកំហែង ដោយអាវុធនុយក្លែអ៊ែជាដាច់ខាត។
ប្រភពព័ត៌មាន របស់គេហទំព័រ សាន់ដេរ អ៊ិចប្រេស បានចុះផ្សាយថា សហរដ្ឋអាមេរិកត្រៀមធ្វើសង្គ្រាមនុយក្លែអ៊ែវាយប្រហារកូរ៉េខាងជើងរួចរាល់អស់ហើយ ខណៈរដ្ឋ ហាវៃ របស់ប្រទេសនេះ បានដាក់របាំងការពារ អាវុធនុយក្លែអ៊ែរបស់កូរ៉េខាងជើងរួចរាល់អស់ហើយដែរ៕
