វ៉ាស៊ិនតោន ៖ ក្រសួងកសិកម្ម នៃប្រទេសវៀតណាមបានបញ្ជាក់ថា ក្នុងដំណើរទស្សនកិច្ចរបស់ប្រធានាធិបតី ដូណាល់ត្រាំ ដែលបានទៅចូលរួមនៅក្នុងកិច្ចប្រជុំនៃប្រទេសហប្រតិបត្ដិការអាស៊ីប៉ាស៊ីហ្វិក ហៅកាត់ថា អេប៉ិក កាលពីថ្ងៃទី១១ វិច្ឆិកា បានព្រមព្រៀងគ្នា ជាច្រើនលើវិស័យពាណិជ្ជកម្ម ដែលក្នុងនោះ អាមេរិកបានសម្រេចឲ្យមានការនាំចូលផ្លែស្វាយពីប្រទេសវៀតណាមរាប់សិបតោនក្នុងមួយឆ្នាំៗ។
សារព័ត៌មានវៀតណាម ត្រយទ្រីញ៉ូ បានចុះផ្សាយថា កិច្ចព្រមព្រៀងនេះ បានធ្វើឡើងនៅអំឡុងលោក ដូណាល់ត្រាំ ទៅកាន់ប្រទេសវៀតណាម ហើយក្នុងនោះ ក្រុមប្រឹក្សាពាណិជ្ជកម្មនៃប្រទេសទាំងពីរ បានសម្រេចបើកនាំចូលមុខទំនិញ ផលិតផលផ្លែឈើង ពីប្រទេសវៀតណាមមួយមុខទៀត គឺផ្លែស្វាយ ដែលកន្លងមក សហរដ្ឋអាមេរិក បាននាំចូលផ្លែឈើជាច្រើនប្រភេទពីវៀតណាម មានចំនួន ៥មុខមកហើយ។
សារព័ត៌មានវៀតណាមដដែលនេះ បានបញ្ជាក់ទៀតថា ទំហំពាណិជ្ជកម្មនៃប្រទេសទាំងពីរ រយៈពេល ២២ឆ្នាំមកនេះ គឺចាប់ពីតាំងប្រទេសទាំងពីរបានសាងទំនាក់ទំនងការទូតជាមួយគ្នាឡើងវិញ គឺមានទឹកប្រាក់ប្រមាណ ៥២ពាន់លានដុល្លារអាមេរិក។ ទំនិញដែលនាំចូលទៅសហរដ្ឋអមេរិកពីវៀតណាមមាន ដូចជា វាយនភណ្ឌ ស្បែកជើង ផលិកផលកសិកម្ម និងស្បៀងសមុទ្រ ហើយការនាំទំនិញពីអាមេរិកទៅវៀតណាមវិញរួមមាន គ្រឿងអេឡិកចត្រូនិច កុំព្យូទ័រ ទូរស័ព្ទ និងគ្រឿងយន្ដកសិកម្ម៕
