ភ្នំពេញ ៖ ក្រសួងព័ត៌មាន សហការជាមួយ The Asia Foundation នៅថ្ងៃទី៣០ វិច្ឆិកានេះ បានរៀបចំសិក្ខាសាលាមួយដើម្បីផ្សព្វផ្សាយឲ្យកាន់តែទូលំទូលាយជុំវិញ ក្រមប្រតិបត្ដិស្ដីពីការរាយការណ៍ករណីហិង្សាលើស្ដ្រី។ សិក្ខាសាលានេះរៀបចំឡើងរយៈពេលពេញមួយថ្ងៃនៅសណ្ឋាគារ កាប៉ូឌីយ៉ាណា រាជធានីភ្នំពេញ។
លោក លៀ ស៊ីណា រាយការណ៍៖
លោក អ៊ុក គឹមសេង អ្នកនាំពាក្យក្រសួងព័ត៌មានមានប្រសាសន៍ថា គោលបំណងនៃការសិក្ខាសាលានេះ គឺចង់ផ្សព្វផ្សាយឲ្យបានកាន់តែទូលាយ និង រម្លឹកដល់អ្នកអត្ថាធិប្បាយ ក៏ដូចជាអ្នកសរសេរអត្ថបទ ជុំវិញហិង្សាលើស្ដ្រីឲ្យកាន់តែយល់ថែមទៀត អំពីរូបភាពមួយចំនួនដែលនាំឲ្យមានហិង្សាលើស្ត្រី។
លោកបន្ដថា បើទោះជាក្រមប្រតិបត្ដិស្ដីពីការរាយការណ៍ករណីហិង្សាលើស្រី ផ្សព្វផ្សាយកាលពីខែកក្ដដា កន្លងទៅនេះក្ដី ក៏ប៉ុន្ដែលោកមើលឃើញថា អ្នកធ្វើអត្ថាធិប្បាយមួយចំនួន នៅតែប្រើប្រាស់ពាក្យសម្ដី ដែលហាក់ជាការចំអក និងលេងសើចលើស្ដ្រី ដែលរងគ្រោះដោយហិង្សាទៅវិញ។ ត្រង់ចំណុចនេះលោកសង្កត់ធ្ងន់ថា ស្ដ្រីនឹងក្លាយជាជនរងគ្រោះទ្វេដង ដោយការរងហិង្សាម្ដង ហើយមួយទៀតដោយការរាយការណ៍របស់អ្នកអត្ថាធិប្បាយ។
លោក អ៊ុក គឹមសេង៖«ជួនកាលពួកគាត់ធ្វើទៅហ្នឹង ចង់ជួយអ្នករង់គ្រោះ តែការនិយាយ ការរាយការណ៍របស់គាត់ហ្នឹង កាន់តែធ្វើឲ្យអ្នករងគ្រោះ រងគ្រោះទ្វេដង»។
តាមអ្នកនាំពាក្យក្រសួងព័ត៌មាន វិធានការរបស់ក្រសួងព័ត៌មាន សម្រាប់អ្នករាយការណ៍ដែលប្រាស់ចាកពីក្រមប្រតិបត្ដិនេះ គឺក្រសួងមានត្រឹមវិធានការអប់រំតែប៉ុណ្ណោះ ដើម្បីឲ្យពួកគេបញ្ឈប់សកម្មភាពនោះជាបន្ដទៀត។ តែយ៉ាងណាលោកបញ្ជាក់ថា ក្នុងករណីដែលអ្នករាយការណ៍ព័ត៌មាន ខុសពីការពិត គឺជនរងគ្រោះមានសិទ្ធិប្ដឹងអ្នកអត្ថាធិបប្បាយ ឬអ្នកសរសេរអត្ថបទទៅតាមផ្លូវច្បាប់។ បន្ថែមលើនេះលោក អ៊ុក គឹមសេង សំណូមពរដល់អ្នកសរសេរអត្ថបទ ឬអ្នកអត្ថាធិប្បាយ មិនត្រូវដាក់កំហុសលើស្ដ្រីបន្ដទៀតឡើយ ខណៈនាងត្រូវរងគ្រោះដោយហិង្សា ឬក៏ការបង្ខំរំលោភ។
លោក អ៊ុក គឹមសេង៖«អញ្ចឹងគ្រាន់តែចង់ឲ្យយល់ថា បើហេតុការណ៍មួយកើតឡើងលើស្ដ្រី ក្នុងករណីណាមួយនោះ ហើយវាបំពានលើច្បាប់ គឺជារឿងខុសច្បាប់ ហើយមិនមែនដោយសារនាងដើរម្នាក់ឯង ឬគាត់ស្លៀកពាក់ស៊ិចស៊ីពេក ឬស្អីៗពេក ដាច់ខាតគឺអត់មានទេ អញ្ចឹងត្រូវយល់កន្លែងហ្នឹង»។
រហូតមកដល់ពេលនេះ ក្រុមសង្គមស៊ីវិលដែលធ្វើការងារលើការលើកស្ទួយសិទ្ធិស្ដ្រីមើលឃើញថា សង្គមខ្មែរនៅតែបន្ដដាក់កំហុសលើស្ដ្រី ក្រោយពេលមានករណីហិង្សា ឬករណីបង្ខំរំលោភកើតឡើង។ នាយិកាប្រតិបត្ដិអង្គការចំនួនពីរ ដែលមានជាអាទិ៍លោកស្រី ធីតា ឃឹះ នាយិកាអង្គការសីលការ លោកស្រី រស់ សុភាព នាយិកាអង្គការយេនឌ័រ និងអភិវឌ្ឍន៍ដើម្បីកម្ពុជា បង្ហាញអារម្មណ៍សោកស្ដាយ ដោយសារតែពាក្យដៀលត្មេះលើស្ដ្រីនៅបន្ត លាន់ឮ ស្ទើរគ្រប់ពេលក្រោយពេល មានករណីបង្ខំរំលោភសេពសន្ថវៈបានកើតឡើង។
នាយិកាប្រតិបត្ដិអង្គការទាំងពីររូបនេះ ស្នើឲ្យពលរដ្ឋគ្រប់រូបបញ្ឈប់ការដាក់កំហុសលើស្ដ្រីរងគ្រោះបន្ដទៀត ព្រោះ ស្ដ្រីមិនមែនជាដើមហេតុនាំឲ្យបុរសចង់ប្រព្រឹត្ដហិង្សាលើនាងនោះទេ។ តែនេះគឺជាអត្ដចរិតរបស់បុរសផ្ទាល់ដែលបានចាត់ទុកការប្រមាថលើស្ដ្រី ដោយការប្រើហិង្សា ឬការបង្ខំរំលោភជាការលេងសើច។
ក្រមប្រតិបត្ដិប្រព័ន្ធផ្សព្វផ្សាយត្រង់មាត្រា ១៤ និងមាត្រា ១៥ បានហាមឃាត់មិនឲ្យអ្នកសារព័ត៌មាន បោះពុម្ភផ្សព្វផ្សាយនូវអ្វីដែលបង្កផលប៉ះពាល់ដល់ប្រពៃណីល្អរបស់សង្គមជាតិ ឬផ្សាយនូវដំណឹង រូបគំនូរ ឬរូបថត ដែលអាចប៉ះពាល់ដល់ស្ដ្រី ជាជនរងគ្រោះ ឬ បង្កការរាំងស្ទះដល់ដំណើរការស៊ើបអង្កេតរបស់តុលាការឡើង បើមិនដូច្នេះ នឹងត្រូវពិន័យជាប្រាក់ពី ១លានរៀល ដល់ ៥លានរៀល៕
