របាយការណ៍របស់អគ្គនាយកដ្ឋានកៅស៊ូ បានបង្ហាញថា រយៈពេល ១០ខែ ចាប់ពីខែមករា ដល់ខែតុលា ឆ្នាំ២០១៧ កម្ពុជាប្រមូលផលជ័រកៅស៊ូបានចំនួន ១៣ម៉ឺន ៧២៨តោន ដែលចំនួននេះបានកើនឡើង ៣ម៉ឺន ៨៧០តោន ស្មើនឹង ៣១% បើធៀបរយៈពេលដូចគ្នាទៅនឹងឆ្នាំមុន។
តាមរបាយការណ៍ដដែលនេះ តម្លៃលក់ជ័រកៅស៊ូមធ្យមក្នុងរយៈពេល ១០ខែ នៃឆ្នាំ២០១៧នេះ ទទួលបានថវិកា ជាង ២រយលានដុល្លារ ( ២១៦,៣៥៤,៨៤០) ក្នុងតម្លៃលក់ជ័រកៅស៊ូ ១៦៥៥ ដុល្លារ ក្នុងមួយតោន ដែលនាំអោយចំនួនននេះ បានកើនឡើង ៥៣៣ ដុល្លារ ក្នុងមួយតោន ស្មើនឹង ៤៨% បើធៀបនឹងរយៈពេលដូចគ្នាកាលពីឆ្នាំមុន។
ជាមួយគ្នានេះ តម្លៃលក់ជ័រកៅស៊ូមធ្យមប្រចាំខែគឺ ១៥៣៤ ដុល្លារ ក្នុងមួយតោន បានថយចុះចំនួន ៦៣ ដុល្លារក្នុងមួយតោន ស្មើនឹង ៣,៩៦% ធៀបនឹងខែកញ្ញា ឆ្នាំ២០១៧ ប៉ុន្ដែបានកើនឡើងចំនួន ២២៦ដុល្លារ ក្នុងមួយតោន ស្មើនឹង ១៧% ធៀបនឹងខែតុលា ឆ្នាំ២០១៦។
នៅក្នុងរបាយការណ៍នេះក៏បានបញ្ជាក់ដែរថា នៅខែតុលា ឆ្នាំ ២០១៧នេះ ស្ថានភាពការងារដាំដុះ ការថែទាំកូនកៅស៊ូថ្ម ការងារអាជីវកម្ម ផលិតកម្ម និងធុរកិច្ចទាំងកៅស៊ូគ្រួសារ និងកៅស៊ូកសិឧស្សាហកម្មមានសកម្មភាពផុលផុឡើងវិញគួរឲ្យកត់សម្គាល់ ។ កត្តាវិជ្ជមាននេះ គឺអាស្រ័យដោយតម្លៃកៅស៊ូធម្មជាតិបានងើបឡើងវិញបន្ថិចចាប់ពីខែមិថុនា ឆ្នាំ២០១៧ ហើយក៏គួបផ្សុះនឹងស្ថានភាពរបាយទឹកភ្លៀងធ្លាក់រាយប៉ាយបានល្អស្ទើរគ្រប់បណ្ដាខេត្តផងដែរ៕
