ភ្នំពេញ៖ចៅសង្កាត់អូចារនិងចៅសង្កាត់ទួលតាឯកនៃគណបក្សសង្គ្រោះជាតិនៅ ខេត្តបាត់ដំបងត្រូវបានរារាំងនិងដកហូតយកត្រាខណៈពួកគេ បានទៅធ្វើការនៅព្រឹកថ្ងៃសុក្រទី១៧វិចិ្ឆកានេះ។ ករណីនេះ គ.ជ.បឲ្យដឹងថាក្រុមប្រឹក្សាឃុំសង្កាត់របស់គណបក្សសង្គ្រោះជាតិអាចបំពេញតួនាទីជាធម្មតារហូតមានការតែងតាំងក្រុមប្រឹក្សាឃុំសង្កាត់ថ្មីជាផ្លូវការ។
«ចាប់ពីថ្ងៃនេះគឺប្អូនត្រូវបានអស់សិទ្ធិជាចៅសង្កាត់មិនអាចប្រើប្រាស់ត្រាបានទេ។ប៉ុន្តែបើប្អូនជាប់ចុះហត្ថលេខាពីមុនមកបានចុះបញ្ជីមក មានលេខមុនភ្លេចវាយត្រា អាចវាយត្រាបាន។»នេះគឺជាពន្យល់របស់អាជ្ញាធរថ្នាក់ស្រុកម្នាក់នៃខេត្តបាត់ដំបង។
ការណែនាំដែលមើលទៅមានការតវានឹងគ្នានេះ ត្រូវបាន កញ្ញា ស៊ិនចាន់រ៉ូហ្សេត បង្ហោះវិដេអូឃ្លីបជាសាធារណៈ គឺមួយថ្ងៃបន្ទាប់ពីតុលាការកំពូលប្រកាសរំលាយគណបក្សសង្គ្រោះជាតិ។
ក្នុងវិដេអូឃ្លីបនេះ ឃើញមន្ត្រីថ្នាក់ស្រុក បានទាមទារត្រាដើម្បីបិទបញ្ជីនិងប្រាប់អំពីតួនាទីជាចៅសង្កាត់ដែលនឹងអស់សុពលភាពចាប់ពីពេលនេះតទៅ។
ក្នុងវីដេអូឃ្លីបនេះ កញ្ញា ស៊ិនចាន់រ៉ូហ្សេតកាន់ក្បាល់ព្រះកេសព្រះបាទជ័យវរ្ម័នទី៧ហើរដើរចេញពីសាលាឃុំទាំងអាឡោះអាល័យ។ទោះបីយ៉ាងណាកញ្ញាទាមទារឲ្យបង្ហាញលិខិតប្រកាសផ្ទេរតំណែងជាផ្លូវការពីក្រសួងមហាផ្ទៃ។«មុននឹងបញ្ឈប់សកម្មភាពរដ្ឋបាលពួកខ្ញុំសូមបង្ហាញលិខិតផ្លូវការមក។»
ជាមួយគ្នានេះ ចៅសង្កាត់ទួលតាឯកក្រុងបាត់ដំបងត្រូវបានអាជ្ញាធរទាមទារឲ្យបិទបញ្ជីនិងផ្ទេរភារកិច្ចទៅឲ្យចៅសង្កាត់រងទី២មកពីគណបក្សប្រជាជនកម្ពុជាជាបណ្តោះអាសន្ន។
លោក ឯម សុផាត សមាជិកគណៈកម្មាធិការជាតិរៀបចំការបោះឆ្នោត(គ.ជ.ប)បានឲ្យដឹងថា ក្រមប្រឹក្សាឃុំសង្កាត់ទាំងអស់អាចបំពេញតួនាទីរបស់ខ្លួនជាធម្មតារហូតមានការប្រកាសតាំងចៅសង្កាត់ថ្មីពីក្រសួងមហាផ្ទៃ។លោកបានបញ្ជាក់ដូចនេះ នៅឯទីស្ដីការគ.ជ.ប។
«មេឃុំក្រុមប្រឹក្សាជំទប់មកពីគណបក្សសង្រ្គោះជាតិនៅរហូតមកដល់ពេលនេះគឺគាត់នៅតែមេឃុំចៅសង្កាត់នៅក្នុងដំណែងនៅឡើយនោះណាតែមានប្រកាសរបស់ក្រសួងមហាផ្ទៃថ្មី។»
ដូចគ្នានេះដែរលោក កន សាវាង្ស មន្ត្រីជាន់ខ្ពស់នៃកម្មវិធីអង្កេតរបស់អង្គការខុមហ្វ្រែល ឲ្យដឹងថាក្រុមប្រឹក្សាឃុំសង្កាត់អាចបំពេញតួនាទីជាធម្មតារហូតមានការប្រកាសផ្ទេរតំណែងក្រុម ជាផ្លូវការពីអ្នកពាក់ព័ន្ធ។
«មានតែស្ថាប័នគ.ជ.បទេដែលងាចបន្តសម្រេចថាតើគណបក្សហ្នឹងបេក្ខភាពថ្មី ការបែកចែកថ្មី ការអស់សពុលភាព»។
គណបក្សសង្គ្រោះជាតិមានសមាជិកក្រុមប្រឹក្សាឃុំសង្កាត់៥០០៧នាក់ទៅទូទាំងប្រទេសដែលកើតចេញពីការបោះឆ្នោតក្រុមប្រឹក្សាឃុំសង្កាត់កាលពីថ្ងៃទី៤ ខែមិថុនាឆ្នាំ ២០១៧៕
