ភ្នំពេញ៖ បច្ចុប្បន្នមានការដាក់ផលិតផលឡេលាយជាច្រើនប្រភេទលក់នៅលើទីផ្សារក្នុងប្រទេសកម្ពុជា ជាពិសេសការលក់នៅក្នុងបណ្តាញសង្គមហ្វេសប៊ុកផ្ទាល់តែម្តង។ ការផ្សព្វផ្សាយលក់ផលិតផលឡេលាយទាំងនោះ សុទ្ធសឹងតែត្រូវបានអ្នកលក់អះអាងថា ពេលលាបទៅលើស្បែកនឹងឆាប់សក្នុងរយៈពេលដ៏ខ្លី ជួយកែខៃស្បែកឱ្យស្រស់ថ្លាភ្លឺរលោង ក៏ប៉ុន្តែឡេលាយទាំងអស់នោះគេមិនបានដឹងថា តើត្រូវបានគេលាយយ៉ាងដូចម្តេច និងមានប្រភពមកពីណាពិតប្រាកដឡើយ ហើយកំពុងបង្កគ្រោះថ្នាក់ធ្ងន់ធ្ងរដល់អាយុជីវិតអ្នកប្រើប្រាស់។
បើតាមការលើកឡើងរបស់ក្រសួងសុខាភិបាល បានឲ្យដឹងថា សព្វថ្ងៃនេះពពួកឡេលាយទាំងនោះមិនត្រូវបានផលិតតាមក្បួនខ្នាតត្រឹមត្រូវនោះទេ។ “វាគឺជាការច្នៃដោយអ្នកលក់ផ្ទាល់ ច្នៃដោយអ្នកលាយម្សៅ អ្នកលក់គ្រឿងសម្អាង ឬក៏អ្នកដែលផលិតផលិតផលក្លែងក្លាយ ដោយគាត់ធ្វើម៉េចឲ្យឃើញសលឿន ប៉ុន្តែគាត់មិនបានគិតពីផលវិបាករបស់អ្នកប្រើប្រាស់នោះទេ”។
ក្រសួងសុខាភិបាលក៏បានអំពាវនាវឲ្យប្រជាពលរដ្ឋឈប់ប្រើប្រាស់ឡេលាយ ឬផលិតផលដែលមិនមានប្រភពច្បាស់លាស់ និងច្បាប់អនុញ្ញាត្រឹមត្រូវនេះ ព្រោះឡេលាយមួយចំនួនដែលកំពុងតែចរាចរនៅលើទីផ្សារកម្ពុជាមានសារធាតុដែលអាចបង្កផលប៉ះពាល់ដល់សុខភាពអ្នកប្រើប្រាស់យ៉ាងធ្ងន់ធ្ងរ នាពេលអនាគត។
ពេលបច្ចុប្បន្ននេះ មានមនុស្សមួយចំនួនបានរងនូវផលប៉ះពាល់ទាំងធ្ងន់ទាំងស្រាលដោយសារការលាបផលិតផលខុសនឹងប្រភេទស្បែក ដោយអ្នកប្រើប្រាស់ខ្លះមានគ្រោះថ្នាក់ដល់ជីវិតក៏មានដែរ។
អ្នកជំនាញបានលើកឡើងថា សារធាតុដែលមាននៅក្នុងឡេលាយបង្កឱ្យមានបញ្ហាប្រតិកម្មលើស្បែក ដូចជាបណ្ដាលឱ្យកើតជារមាស់កន្ទួល ឬខូចស្បែក។ អ្នកខ្លះមានបញ្ហារមាស់ដល់ថ្នាក់អេះចេញឈាម និងឡើងកន្ទួលធំៗ ដែលឡេលាយអាចជ្រាបចូលដល់កោសិកាខាងក្នុងប៉ះទង្គិចដល់សុខភាពស្បែកនិងសុខភាពរាងកាយ។ ដូច្នេះអ្នកប្រើប្រាស់គួរប្រើផលិតផលដែលមានគុណភាពល្អ និងចុះបញ្ជីការត្រឹមត្រូវទទួលស្គាល់ដោយក្រសួងសុខាភិបាល ។
រដ្ឋមន្ត្រីក្រសួងសុខាភិបាល ឯកឧត្តម ម៉ម ប៊ុនហេង ស្នើឲ្យប្រជាពលរដ្ឋមានការប្រុងប្រយ័ត្នខ្ពស់ និងចៀសវាងការប្រើឡេលាយលាបស្បែក ដោយលើកឡើងថា៖ «មិនដែលណាទៅលាបឡេភ្លាមសភ្លាមមើលតែដាក់ទឹកក្តៅកោសជ្រូកអីញ្ចឹង យូរៗទៅខ្ទេចខ្ទីអស់ហើយ!សបានមួយភ្លែតហ្នឹង អាស៊ីត ហើយដាក់វត្ថុសម្រាប់ធ្វើឲ្យស្បែកសមួយភ្លែតទៅវាពុល ធ្វើឲ្យរលាកស្បែកថ្ងៃក្រោយទៅ»។
សូមជម្រាបថា បច្ចុប្បន្នក្រសួងសុខាភិបាលកំពុងបន្តយុទ្ធនាការបង្ក្រាបជារៀងរាល់ថ្ងៃ ចំពោះចរាចរឡេលាយសម្រាប់លាបស្បែកឲ្យស និងរៀបចំប្រព័ន្ធចុះបញ្ជីការតាមអនឡាញដើម្បីកំណត់ពីប្រភពនាំចូលឡេលាបស្បែកត្រឹមត្រូវផងដែរ។
ចំពោះស្ត្រីដែលចង់ប្រើប្រាស់ឡេដើម្បីជួយដល់សុខភាពស្បែក សូមជ្រើសរើសផលិតផលដែលមានស្លាកសញ្ញា ឈ្មោះផលិតផល និងប្រភពផលិតច្បាស់លាស់ ព្រមទាំងមានការទទួលពិនិត្យសារធាតុផ្សំត្រឹមត្រូវពីក្រសួងសុខភិបាលដើម្បីចៀសផុតពីបញ្ហាទាំងឡាយដូចដែលអ្នកជំនាញបានលើកឡើង៕
