ភ្នំពេញ ៖ តុលាការកំពូលបានសម្រេចរំលាយគណបក្សសង្គ្រោះជាតិ និង ហាមធ្វើសកម្មភាពនយោបាយ ៥ឆ្នាំ របស់ថ្នាក់ដឹកនាំគណបក្សនេះចំនួន ១១៨ រូប។ សវនាការពេញមួយថ្ងៃនេះ ប្រព្រឹត្តទៅក្រោមការការពារយ៉ាងរឹងមាំពី កងកម្លាំងប្រដាប់អាវុធ ដែលបានដាក់រាយរនាំងដែកបិទជិតជុំវិញបរិវេណតុលាការ។
ជុំវិញការការដាក់ពង្រាយកងកម្លាំងសមត្ថកិច្ច និងការដាក់បារ៉ាសបិទដូចនេះ ត្រូវបានស្នងការរងនគរបាលរាជធានីភ្នំពេញ លោក ស៊ឹម វុទ្ធី បានផ្តល់បទសម្ភាសខ្លីឱ្យវិទ្យុស្ត្រីដឹងនារសៀលថ្ងៃទី១៦ ខែវិច្ឆិកា ឆ្នាំ២០១៧នេះថា ការដាក់ពង្រាយកងកម្លាំងសមត្ថកិច្ចនេះ គឺជាការពារសន្តិសុខក្នុងថ្ងៃដែលតុលាការកំពូលបើកសវនាការរឿងក្តីរំលាយគណបក្សសង្គ្រោះជាតិ។
ទាក់ទងនឹងការរៀបចំកងកម្លាំង សមត្ថកិច្ចនេះលោកសង្កត់ធ្ងន់ថា នឹងដាក់ពង្រាយការពារសន្តិសុខរហូតដល់តុលាការកំពូលបញ្ចប់ការកាត់ក្តីរឿងបក្សសង្គ្រោះជាតិនេះ។
ខណៈសន្តិសុខបានរឹតបន្តឹងជាខ្លាំងនៅខាងក្រៅបរិវេណតុលាការកំពូល ចំណែកឯនៅបន្ទប់សវនាការតុលាការកំពូលវិញគឺនៅម៉ោងជាង ៥រសៀល ចៅក្រមទាំង ៩រូប បានសម្រេចរំលាយគណបក្សសង្គ្រោះជាតិដោយបិទផ្លូវតវ៉ា។ នេះគឺជាការកាត់ក្ដីសំណុំរឿង នយោបាយជាប្រវតិ្តសាស្ត្រ លើកទីមួយនៃការរំលាយគណបក្សប្រឆាំងធំជាងគេ នៅកម្ពុជា នៅមុន ការបោះឆ្នោតជ្រើសតាំងតំណាងរាស្ត្រនៅឆ្នាំ ២០១៨ ចូលមកដល់។
ដើមចមដែល ក្រុមមេធាវីរាជរដ្ឋាភិបាលយកមកសំអាង គឺករណីចោទ «អំពើក្បត់ជាតិ» ប្រឆាំង លោក កឹម សុខា ប្រធានគណបក្សសង្គ្រោះជាតិកំពុងជាប់ឃុំនៅក្នុងពន្ធនាគារ ត្រពាំងថ្លុង នៅខេត្ត ត្បូងឃ្មុំ ។
បើតាមអំណាចរបស់សាលដីកាតុលាការកំពូល រំលាយគណបក្សសង្គ្រោះជាតិ នាំឱ្យ គណបក្សនេះត្រូវបាត់បង់អាសនៈក្នុងរដ្ឋសភាចំនួន ៥៥ មេឃុំនិងចៅសង្កាត់ចំនួន ៤៨៩ អាសនៈ និង ក្រុមប្រឹក្សាឃុំ-សង្កាត់ចំនួន ៥០០៧ អាសនៈ។ តែជាមួយគ្នានេះ សមាជិកក្រុមប្រឹក្សាឃុំមួយចំនួន បានចុះចូលនឹងបក្សកាន់អំណាច តាមការអំពាវនាវរបស់ប្រមុខរដ្ឋាភិបាល។
ជាការកត់សម្គាល់មុន រំលាយគណបក្សប្រឆាំងនេះ ប្រមុខរដ្ឋាភិបាលសម្ដេច ហ៊ុន សែន បាន ភ្នាល់ដាក់ជីវិត ហើយក្រោយមក សម្ដេចប្រកាសជាថ្មីថា ភ្នាល់មួយសងមួយរយ បើគណបក្សសង្គ្រោះជាតិមិនត្រូវបានរំលាយដោយអំណាចតុលាការកំពូល៕
