ភ្នំពេញ៖អតីតបុគ្គលិកវិទ្យុអាស៊ីសេរី(RFA)ច្រានចោលការផលិតអត្ថបទព័ត៌មានពីប្រទេសកម្ពុជាផ្ញើទៅការិយាល័យព័ត៌មាននៅក្រុងវ៉ាស៊ីនតោនសហរដ្ឋអាមេរិក។
អតីតបុគ្គលិកវិទ្យុអាស៊ីសេរី(RFA)លោក អ៊ួន ឈិន និង លោក យាង សុជាមេតា បានច្រានចោលករណីចោទថាបានផ្តល់អត្ថបទព័ត៌មាននៅការិយាល័យវិទ្យុអាស៊ីសេរីនៅសហរដ្ឋអាមេរិកចាប់តាំងពីវិទ្យុអាស៊ីសេរីប្រកាសបិទការិយាល័យនៅកម្ពុជានៅថ្ងៃទី១២ ខែកញ្ញា ឆ្នាំ ២០១៧។
អតីតបុគ្គលិកវិទ្យុអាស៊ីសេរីទាំងពីរនាក់នេះ ច្រានចោលដូចនេះ ធ្វើឡើងនៅពេលអាជ្ញាធរនាំអ្នកទាំងពីរមកឆែកឆេរនៅបន្ទប់ថតសំឡេងឬបន្ទប់ស្ទូតយូនៅផ្ទះសំណាក់ម៉ារ៉ាឌីជាប់ស្ពានស្ទឹងមានជ័យ ខណ្ឌមានជ័យ។
លោក យាង សុជាមេតា«ខ្ញុំអត់បានធ្វើខុសអ្វីទេ ខ្ញុំអត់បានបោះព័ត៌មានទៅក្រៅប្រទេសទេ»។លោក អ៊ួន ឈិន«គេចោទបងថាបម្រើវិទ្យុអាស៊ីសេរី»។
នៅក្នុងកំណត់ហេតុអាជ្ញាធរត្រូវបានបង្ហោះនៅលើបណ្តាញសង្គមបានឲ្យដឹងថាអតីតបុគ្គលិកវិទ្យុអាស៊ីសេរី(RFA)លោក អ៊ួន ឈិន ផ្តល់ចម្លើយថាការជួលបន្ទប់ផ្ទះសំណាក់ម៉ារ៉ាឌី នៅជាន់ទី៧ ដើម្បីបើកការ៉ាអូឃេ(KTV)ថតវីឌីអូនៃកម្មវិធីអាពាហ៍ពិពាហ៍និងកម្មវិធីបុណ្យផ្សេង។ក្នុងកំណត់ហេតុបញ្ជាក់ថាបន្ទប់ថតសំឡេងនេះមិនទាន់ដំណើរការនៅឡើយ។
កំណត់ហេតុនេះធ្វើឡើងបន្ទាប់រដ្ឋបាលខ័ណ្ឌមានជ័យបានឆែកឆេរនិងឃាត់ខ្លួនអតីតបុគ្គលិកវិទ្យុអាស៊ីសេរីដោយសង្ស័យថាផលិតព័ត៌មានដោយខុសច្បាប់។បច្ចុប្បន្នអតីតអ្នកសារព័ត៌មានទាំងពីរកំពុងសាកសួរនៅអគ្គស្នងការនគរបាលជាតិ។
អាជ្ញាធរសម្រេចបញ្ឈប់សកម្មភាពអាជីវកម្មទាំងស្រុករហូតដល់មានច្បាប់អនុញ្ញាត្រឹមត្រូវពីក្រសួងពាណិជ្ជកម្ម ក្រសួងព័ត៌មាន និងក្រសួងវប្បធម៌និងវិចិត្រសិល្បៈ។
លោកសាស្ត្រចារ្យផ្នែកសារព័ត៌មាន លោក ឆាយ សុផល បានសរសេរនៅលើសង្គមហ្វេសប៊ុកដោយអំពាវនាវឲ្យអាជ្ញាធរមានសមត្ថកិច្ចនិងមន្ត្រីអនុវត្តច្បាប់ត្រូវចាត់វិធានការណ៍មកអ្នកសារព័ត៌មានឲ្យស្របតាមច្បាប់ស្តីពីរបបសារព័ត៌មានជាជាងពីការចោទប្រកាន់ដោយប្រើក្រមព្រហ្មទណ្ឌប៉ុន្តែលើកលែងតែបទឧក្រិដ្ឋដែលនាំឲ្យការបំពេញការងាររបស់អ្នកសារព័ត៌មានរងការរំខាននិងធ្លាក់ចុះ។
លោក ឆាយ សុផល ក៏បានអំពាវនាវដល់អ្នកសារព័ត៌មានត្រូវបំពេញការងារតាមច្បាប់និងវិជ្ជាជីវៈ។
«សូមសហការីព័ត៌មានទាំងអស់មេត្តាបំពេញការងារដោយស្របច្បាប់ គឺត្រូវចុះបញ្ជីអង្គភាព និងជាបុគ្គល (បើករណីជាFreelance journalists) នៅឯក្រសួងព័ត៌មាន។ អ្នកសារព័ត៌មានមិនមែនធ្វើការលួចលាក់ដូចក្រុមភ្នាក់ងារសម្ងាត់ ឬចារកម្មនោះទេ។ បើទោះជាយើងធ្វើព័ត៌មានស៊ើបអង្កេតក៏ដោយ ក៏យើងត្រូវចុះឈ្មោះនៅក្រសួងព័ត៌មានដែរ ដើម្បីស្របច្បាប់ផង និងបានបណ្ណព័ត៌មានពីក្រសួងផង។ សូមសំណាងល្អកើតមានដល់សហការីទាំងអស់គ្នា»។
តែយ៉ាងណាក៏ វិទ្យុស្ត្រីមិនអាចសុំការឆ្លើយតបពីអគ្គស្នងការនគបាលរាជធានីភ្នំពេញបានទេ ដោយពុំមានការលើកទូរស័ព្ទ។
