ភ្នំពេញ ៖ ហិង្សាលើស្ដ្រីបានកើតឡើងស្ទើរគ្រប់រូបភាព ហើយមិនថមថយនោះទេ ដែលនាំឲ្យអង្គការសង្គមស៊ីវិលធ្វើការងារផ្នែកសិទ្ធិមនុស្សនៅកម្ពុជា មានការព្រួយបារម្ភ ចំពោះការរស់នៅប្រចាំថ្ងៃរបស់ស្ដ្រី។
ជុំវិញរឿងនេះ ក្រុមស្ដ្រី ជាមេឃុំ ចៅសង្កាត់ ជើងចាស់មួយចំនួន បានលើកឡើងថា ដើម្បីលុបបំបាត់សកម្មស្មោគគ្រោករំលោភបំពានលើស្ដ្រី ដូចនេះ គឺក្រុមមេឃុំ ចៅសង្កាត់ ត្រូវចុះជួបដោយផ្ទាល់ជាមួយពលរដ្ឋ និងបង្កើនការរឹតបន្ដឹង ការអនុវត្ដន៍ច្បាប់លើជនសជនល្មើសឲ្យធ្ងន់ធ្ងរបំផុត។
រយៈពេលត្រឹមតែ ប្រាំមួយខែដើមឆ្នាំ២០១៧ អំពើហិង្សាមានស្ថានភាពធ្ងន់ធ្ងរដូចជាករណី រំលោភសេពសន្ថវៈ ការជួញដូរមនុស្ស និងការជួញដូរកម្លាំងពលកម្ម ដោយបានកើតឡើងចំនួន ១៥៥ ករណី ក្នុងរយៈពេលដូចគ្នាកាលពីឆ្នាំ២០១៦ ដែលចំនួននេះបានបង្ហាញថា ហិង្សាលើស្ដ្រីមិនបានថយចុះនោះទេ។
តែយ៉ាងណាហិង្សាលើស្ដ្រី មិនមែនមានតែករណីទាំងនេះទេ ដោយគិតមកដល់ខែតុលា ឆ្នាំ២០១៧ អំពើហិង្សាលើស្ដ្រីបានកើតឡើងជាហូរហែ មានទាំងការចាប់រំលោភលើកុមារ ស្ដ្រីវ័យជំទង់ និងស្ដ្រីវ័យចំណាស់ ហើយរឹតតែធ្ងន់ធ្ងរទៀតនោះ គឺហិង្សាបានឈានដល់ការរំលោភសម្លាប់។
ព្រោះតែបញ្ហាទាំងអស់នេះហើយ ទើបធ្វើឲ្យក្រុមសង្គម ស៊ីវិលដែលធ្វើការងារលើកិច្ចការពារសិទ្ធិមនុស្ស និងអាណាព្យាបាល ក៏ដូចជាស្ដ្រីខ្លួនឯងផ្ទាល់សុទ្ធតែបង្ហាញក្ដីបារម្ភពីសុវត្ថិ ខណៈពួកគេត្រូវទៅរៀន ទៅស្រែ ឬក៏នៅចាំផ្ទះតែម្នាក់ឯង។ បញ្ហាញសង្គមមួយនេះ គឺជារឿងដែលត្រូវដោះស្រាយ និងរកយន្ដការដែលមានប្រសិទ្ធិភាពបំផុតដើម្បីទប់ស្កាត់ និងព្រមានឲ្យបានធ្ងន់ធ្ងរដើម្បីធ្វើជនល្មើសខ្លាចរអា និងមិនហ៊ានប្រព្រឹត្ដអំពើអមនុស្សធម៌ដូចនេះបន្ដទៀត។
អ្នកស្រី ហួន មើ មេឃុំ កោះកែវ ស្រុកល្វាឯម ខេត្ដកណ្ដាល មកពីគណបក្សសង្គ្រោះជាតិ ដែលបានកាន់តំណែងជាប់គ្នា ៣អាណត្ដិមកហើយនោះ បានប្រាប់វិទ្យុស្ដ្រីអេហ្វអឹម១០២ ថា អ្នកស្រីពិតជាមានការអាណិតដល់ស្ដ្រីរងគ្រោះ ហើយចាត់ទុកថា ទង្វើបង្ខំចាប់រំលោភលើស្ដ្រី គឺជាការប្រមាថយ៉ាងធ្ងន់ធ្ងរចំពោះស្ដ្រី។
មកដល់ពេលនេះអ្នកស្រី ហួន មើ បានគ្រប់គ្រងតំណែងជាក្បាលម៉ាស៊ិនដឹកនាំ ឃុំ កោះកែវ ជាង ១០ឆ្នាំមកហើយ ក៏ប៉ុន្ដែគឺគ្មានទេ អំពើចាប់រំលោភ ឬក៏អំពើហិង្សាក្នុងគ្រួសារ។ គ្មានហិង្សាដោយសារតែអ្នកស្រី បានចំណាយពេលស្ទើរទាំងស្រុងដើម្បីចុះមូលដ្ឋានដោយផ្ទាល់ ជួបប្រជាពលរដ្ឋ ដើម្បីផ្សព្វផ្សាយអប់រំដល់ស្ដ្រី និង បុរស ឲ្យចេះយោគយល់គ្នា និងផ្ដល់តម្លៃឲ្យគ្នាទៅវិញទៅមក។ លើសពីនេះអ្នកស្រី បានអនុវត្ដន៍ច្បាប់យ៉ាងតឹងរឹងបំផុត ចំពោះអ្នកប្រព្រឹត្ដហិង្សា ដើម្បីជាព្រមានដល់ជនដទៃទៀត។ អ្នកស្រី ហួន មើ ៖«អាហ្នឹងដោយសារមូលហេតុយើងធ្វើការអប់រំគាត់ ហើយយើងអនុវត្ដន៍ច្បាប់ម៉ឺងម៉ាត់ យើងអត់ថា ចោល អ្វីដែលយើងនិយាយចេញទៅគឺយើងធ្វើដើម្បីព្រមាន អាហ្នឹងប្រៀបដូចពាក្យចាស់លោកថា វ៉ៃមួយព្រមាន ១០ តែយើងអត់មានធ្វើអីគាត់ទេ (បុរស) គ្រាន់តែព្រមានលើផ្លូវច្បាប់»។
អ្នកស្រី ហួន មើ ទទូចថា ដើម្បីលុបបំបាត់អំពើហិង្សាលើស្ដ្រីបានលុះត្រា មេឃុំ ចៅសង្កាត់ គ្រប់រូប ពង្រឹងឆន្ទៈរបស់ខ្លួន ចំណាយពេលវេលាចុះជួបពលរដ្ឋឲ្យបានញឹកញាប់ ហើយជាពិសេសពង្រឹងការអនុវន៍ច្បាប់ដោយបានម៉ឺងម៉ាត់។
ដូចគ្នាដែរ ស្ដ្រីម្ចាស់តំណែងចៅសង្កាត់បឹងកេងកងទី០១ មកពីគណបក្សប្រជាជនកម្ពុជា ដែលគ្រប់គ្រងតំណែងអស់រយៈពេលជាង ១៥ឆ្នាំជាប់គ្នាមកហើយនោះ អ្នកស្រី ប្រាក់ ម៉ាលី ទទួលស្គាល់ការលើកឡើងរបស់ មេឃុំ កោះកែវ។ អ្នកស្រី ប្រាក់ ម៉ាលី បានឲ្យដឹងថា ការចុះជួបពលរដ្ឋ ឬក៏បើកជាវេទិកាសាធារណៈញឹកញាប់ គឺមានអត្ថប្រយោជន៍យ៉ាងខ្លាំង សម្រាប់ការបង្កើនភាពជិតស្និទរវាងមេឃុំ ចៅសង្កាត់ ឬក៏ក្រុមប្រឹក្សាឃុំ ជាមួយនិងពលរដ្ឋ។ ភាពស្និទស្នាលនិងការស្គាល់គ្នាបានច្រើនរវាងមេឃុំ ឬចៅសង្កាត់នេះ នឹងធ្វើជនរងគ្រោះដែលជាស្ដ្រីហ៊ានរត់មករកអន្ដរាគមន៍ពីមេឃុំ ឬចៅសង្កាត់របស់ពួគេ បើមានករណីរំលោភកើតឡើង។ អ្នកស្រី ប្រាក់ ម៉ាលី ៖«ចា កាលណាយើងចុះជួបទៅយើងស្គាល់ យើងបង្កើនភាពស្និទស្នាល យើងបង្កើនទំនាក់ទំនងល្អជាមួយគាត់ មានការអីគាត់ផ្ដល់ព័ត៌មានឲ្យយើងដឹងហើយ ហើយការចុះជួបញឹកញាប់ហ្នឹងហើយដែលធ្វើឲ្យការទំនាក់ទំនងឲ្យល្អជាមួយប្រជាពលរដ្ឋល្អ យើងបានដឹងព័ត៌មានផ្សេងៗជាមួយប្រជាពលរដ្ឋ»។
ជាងនេះអ្នកស្រីចៅសង្កាត់បឹងកេងកងទី០១ ក៏សំណូមពរដល់ស្ដ្រីគ្រប់រូបត្រូវបង្កើនភាពក្លាហ៊ានរបស់ខ្លួនផងដែរ ដើម្បីការខ្លួនពីការមើលងាយ ឬក៏ប៉ងអាក្រក់ពីបុរសមួយចំនួន។
ដើមឆ្នាំ២០១៧នេះ ករណីចាប់រំលោភស្ដ្រី ត្រូវបានសមាគមការពារសិទ្ធិមនុស្សអាដហុកបង្ហាញថា គឺមិនបានថយចុះនោះទេ។ បើតាមអ្នកស្រី ឆន សុគន្ធា ប្រធានផ្នែកស្ដ្រី និងកុមារ របស់សមាគមការពារសិទ្ធិមនុស្សអាដហុក បានឲ្យដឹងថា ការប្រើប្រាស់អំពើហិង្សាមានស្ថានភាព ធ្ងន់ធ្ងរ រំលោភសេពសន្ថវៈ ការជួញដូរមនុស្ស និងការជួញដូរកម្លាំងពលកម្ម មានចំនួន១៥៥ ករណី ក្នុងរយៈពេលប្រាំមួយខែដើមឆ្នាំ២០១៧ ដែលចំនួននេះ គឺមិនបានថយនោះទេបើធៀបទៅនឹងរយៈពេលដូចគ្នាកាលពីឆ្នាំ២០១៦។ ក្នុងចំណោមអំពើហិង្សាទាំង ១៥៥ករណីនេះ មានហិង្សាក្នុងគ្រួសារ ដែលមានស្ថានភាពធ្ងន់ធ្ងរមានចំនួន ២៣ករណី និងឈានដល់ស្លាប់ចំនួន ៥ករណី។ ចំណែកករណីរំលោភសេពសន្ថវៈទៅលើទារករហូតដល់អាយុ ១៨ឆ្នាំ និងស្ត្រីវ័យចំណាស់អាយុ ៥៥ឆ្នាំឡើងទៅ មានចំនួន ៧១ ករណី គឺប្រហាក់ប្រហែលទៅនឹងឆ្នាំ២០១៦ដែរ៕
