ភ្នំពេញ៖រដ្ឋាភិបាលប្រកាសលើកពេលការបោះឆ្នោតជ្រើសតាំងសមាជិកព្រឹទ្ធសភានីតិកាលពីទី៤ទៅ នៅខែកុម្ភៈ ឆ្នាំ ២០១៨។ ការលើកពេលនេះ ត្រូវបានចោទសួរអំពីដំណើរការនីតិវិធីស៊ើបអង្កេតក្នុងសំណុំរឿងលោក កឹម សុខា ប្រធានគណបក្សសង្គ្រោះជាតិដែលអាចធ្វើឱ្យបក្សប្រឆាំងនេះបាត់បង់ឱកាសចូលរួមដណ្ដើមយកអាសនៈសមាជិកព្រឹទ្ធសភា។
នៅក្នុងសេចក្តីសម្រេចចុះហត្ថលេខាដោយសម្តេច ហ៊ុន សែន នៅថ្ងៃទី២៧ ខែតុលានេះ បានលើកពេលការបោះឆ្នោតជ្រើសតាំងសមាជិកព្រឹទ្ធសភានីតិកាលទី៤នៃព្រឹទ្ធសភារហូតដល់ថ្ងៃអាទិត្យ ទី២៥ ខែកុម្ភៈ ឆ្នាំ ២០១៨។
មុនដំណើរការឆ្ពោះទៅរកការបោះឆ្នោតព្រឹទ្ធសភា លោក កឹម សុខា ប្រធានគណបក្សប្រឆាំងត្រូវបានចាប់ និងឃុំខ្លួនដោយរងការចោទប្រកាន់អំពើក្បត់ជាតិឃុបឃិតជាជនបរទេសដើម្បីផ្តួលរលំរដ្ឋាភិបាល។
ចាប់តាំងពីការចាប់ខ្លួនមេបក្សប្រឆាំងកាលពីថ្ងៃទី៣ ខែកញ្ញា រហូតមកពេលនេះ តុលាការកំពូលកំពុង ដំណើរការស៊ើបអង្កេតក្នុងសំណុំរឿងនេះនៅឡើយ។
ការលើកពេលការបោះឆ្នោតជ្រើសតាំងសមាជិកព្រឹទ្ធសភានេះ អ្នកនាំពាក្យគណបក្សប្រជាជនកម្ពុជា លោក សុខ ឥសាន្ត មិនបានដឹកអំពីមូលហេតុទេ។ប៉ុន្តែលោកយល់ថាការលើកពេលនេះនឹងអាចជួយសម្រួលឲ្យគណបក្សនយោបាយមានពេលវេលាគ្រប់គ្រាន់សម្រាប់រៀបចំបេក្ខជនរបស់ខ្លួន។
«ខ្ញុំអត់ដឹកទេ ប្រហែលទុកឲ្យគណបក្សដទៃៗប្រុងប្រៀបរៀបចំខ្លួនដើម្បីប្រកួតប្រជែងលើទីលានប្រជាធិបេត្យនៃការបោះឆ្នោតនាពេលមុខ ត្រៀមខ្លួនឲ្យបានទាំងអស់កុំឲ្យតក់ក្រហល់ពេក។»
ការណ៍នេះនាំឲ្យរដ្ឋាភិបាលសម្រេចនិរាករណ៍សេចក្តីសម្រេចកាលពីឆ្នាំ២០១៧ដែលគ្រោងនឹងបោះឆ្នោត ជ្រើសតាំងសមាជិកព្រឹទ្ធសភានៅថ្ងៃទី១៤ ខែមករា។
តាមសេចក្ដិជូនដំណឹងរបស់ គណៈកម្មាធិការរៀបចំការបោះឆ្នោត គឺរហូតមកដល់ពេលនេះ មានតែគណបក្សប្រជាជនកម្ពុជាមួយទេបានទៅចុះបញ្ជីឈ្មោះ គណបក្សសម្រាប់ការប្រកួតប្រជែងយកអាសនៈសមាជិកព្រឹទ្ធសភា ដែលមាន ពាក់កណ្ដាលនៃអាសនៈសភា។
ទាក់ទិន ការលើកពេលបោះឆ្នោតព្រឹទ្ធសភានេះ វិទ្យុស្ត្រីមិនអាច សុំការឆ្លើយការយល់ឃើញពីអ្នកនាំពាក្យ គណៈកម្មាធិជាតិរៀបចំការបោះឆ្នោត បានទេ ដោយពុំលើកទូរស័ព្ទ។
តែបែបនេះក្ដី លោក សំ គន្ធាមី នាយកប្រតិបត្តិអង្គការនិចហ្វិចយល់ថាការលើកពេលការបោះឆ្នោតជ្រើសតាំងសមាជិកព្រឹទ្ធសភារហូតដល់ថ្ងៃទី២៥ ខែកុម្ភៈអាចនឹងជួយសម្រួលដល់គណៈកម្មាធិការជាតិរៀបចំការបោះឆ្នោត មានពេលវេលាគ្រប់គ្រាន់សម្រាប់រៀបចំការបោះឆ្នោត។
«ការពន្យាពេលតាមនីតិវិធីបោះឆ្នោតគ.ជ.បគាត់មានពេលវេលាគ្រប់គ្រាប់រៀបចំការបោះឆ្នោតព្រឺទ្ធសភា មិនប្រផុចញុចពេក ហើយគណបក្សនយោបាយលោកអាចមានធ្វើការចុះបញ្ជីបេក្ខជន ចុះឈ្មោះអង្គរបោះឆ្នោតបានតាមសម្រួល។»
សូមបញ្ជាក់ថា កាលពីថ្ងៃទី២៥ ខែតុលានេះ ការធ្វើវិសោធនកម្មច្បាប់ស្តីពីច្បាប់ទាក់ទងការបោះឆ្នោតចំនួន៤ត្រូវបានព្រះមហាក្សត្រឡាយព្រះហត្ថលេខាផ្តល់សុពលភាព បន្ទាប់ពីព្រះអង្គរយាងត្រឡប់ពី ព្យាបាលព្រះរោគពីប្រទេសចិន។
ច្បាប់ទាំងនោះរួមមាន ការបោះឆ្នោតជ្រើសតាំងតំណាងរាស្ត្រ និងជ្រើសតាំងព្រឹទ្ធសភា និងវិសោធនកម្មច្បាប់ស្តីពីការបោះឆ្នោតក្រុមប្រឹក្សាឃុំ/សង្កាត់ និងច្បាប់បោះឆ្នោតជ្រើសតាំងក្រុមប្រឹក្សា រាជធានី ខេត្ត ក្រុង ស្រុក ខណ្ឌ។ក្នុងច្បាប់នេះចែងអំពីការដកអាសនៈពីគណបក្សនយបាយត្រូវបានរំលាយ ចែកទៅឲ្យគណបក្សគ្មានអាសនៈ។ សមាជិកព្រឹទ្ធសភាមាន ៦២រូប ៣រូបមកពីព្រះបរមរាជវាំង និង៣រូបចាត់ពីរដ្ឋសភា ហើយក្រៅពីនេះ ជ្រើសតាំងតាមរយអង្គបោះឆ្នោត ជាសមាជិកក្រុមប្រឹក្សាឃុំសង្កាត់៕
