ខេត្តស្វាយ៖ ឧបនាយករដ្ឋមន្ត្រី និងជាប្រធានប្រឹក្សាស្តារអភិវឌ្ឍន័វិស័យកសិកម្ម និងជនបទ ជំរុញឱ្យភាគីពាក់ព័ន្ធយកចិត្តទុកដាក់បញ្ហាបង្គន់អនាម័យ ជាពិសេសសាលានៅតំបន់ជនបទ ដើម្បីបំពេញតម្រូវការសិស្ស និងបង្កភាពងាយស្រួលដល់សិស្សស្រី។
លោក យឹម ឆៃលី ឧបនាយករដ្ឋមន្ត្រី និងជាប្រធានប្រឹក្សាស្តារអភិវឌ្ឍន័វិស័យកសិកម្ម និងជនបទ ជំរុញឱ្យភាគីពាក់ព័ន្ធ យកចិត្តទុកដាក់បញ្ហាបង្គន់អនាម័យ ជាពិសេសសាលានៅតំបន់ជនបទ ដើម្បីបំពេញតម្រូវការសិស្ស និងបង្កភាពងាយស្រួលដល់សិស្សស្រី ដោយលោកមើលឃើញថា សាលានៅតំបន់ខ្លះនៅតែខ្វះខាតបង្គន់អនាម័យសម្រាប់សិស្សប្រើប្រាស់។
ក្នុងពិធីដំណើរទស្សនៈកិច្ចជាន់ខ្ពស់ និងកិច្ចប្រជុំឆ្លុះបញ្ចាំង ស្តីពីការងារលើកកម្ពស់អនាម័យជនបទនៅខេត្តស្វាយរៀងកាលពីថ្ងៃទី២៥ ខែតុលា ឆ្នាំ២០១៧ លោក យឹម ឆៃលី បានថ្លែងថា បើទោះបីជានៅតាមសាលារៀនមួយចំនួនមានបង្គន់អនាម័យហើយក៏ដោយ ប៉ុន្តែបង្គន់ទាំងនោះសុទ្ធតែបិទទ្វារ ។លោកបន្ត កង្វះខាតនូវបង្គន់អនាម័យប្រើប្រាស់ អ្នកប្រឈមជាងគេគឺសិស្សស្រី។ លោកថា ម្យ៉ាងទៀត វាក៏បង្កឱ្តកើតជំងឺផ្សេងដល់សិស្សផងដែរ។
លោកជំរុញឱ្យក្រសួងអភិវឌ្ឍន៍ជនបទ ក្រសួងអប់រំ ក្រសួងសេដ្ឋកិច្ច និងអង្គការសង្គមស៊ីវិល ចូលរួមជួយធ្វើយ៉ាងណាឱ្យសិស្សស្រីងាយស្រួលក្នុងការប្រើប្រាស់ បង្គន់អនាម័យនៅតាមសាលារៀន។
លោក ជា ជាតិ រដ្ឋលេខាធិការក្រសួងអប់រំយុវជន និងកីឡា មានប្រសាសន៍ថា បញ្ហាដែលបង្គន់សង់ស្អាតតែបិទទ្វារ មិនអាចឱ្យសិស្សប្រើប្រាស់បានគឺបណ្តាលពីកង្វះទឹកប្រើប្រាស់។ លោកបន្តថា នៅសាលាខ្លះដោយសារសិស្សប្រើទឹកខ្ជះខ្ជាយ ដែលជាហេតុធ្វើឱ្យអ្នកគ្រប់គ្រងសាលាបង្ខំចិត្តចាក់សោរបិទទ្វារបង្គន់ ឈប់ឱ្យសិស្សប្រើប្រាស់។ លោក ទទូចឱ្យសាលានីមួយ ធ្វើអាងស្តុកទឹកមួយ សម្រាប់ការប្រើប្រាស់។
លោក ជា ជាតិ ៖«ថវិកាទឹកហ្នឹងវាតិច ដូច្នេះខ្ញុំបានចាប់អារម្មណ៍២ចំណុចក្នុងការដោះស្រាយទឹកនេះ សូម្បីដោះស្រាយកង្វល់របស់នាយកយើង គ្រូយើង សិស្សយើងនៅតាមសាលា គឺបញ្ហាប្រភពទឹក ។សូមឱ្យសាលានីមួយៗ ធ្វើស៊ីទែន អញ្ចឹងសូមឱ្យក្រសួងអភិវឌ្ឍជនបទ បើជួយសាលាសូមឱ្យជួយរឿងទឹកធំណាស់ គឺយើងធ្វើស៊ីទែនទឹកភ្លៀង បើសិនជានៅក្នុងសាលាណាមានអាងស្តុកទឹកភ្លៀង ភ្លៀងមកហូរបានច្រើន យកអាទឹកភ្លៀងហ្នឹងប្រើប្រាស់ក្នុងបង្គន់»។
ជំនប់ទី១ ឃុំពពែត ស្រុកស្វាយទាប ខេត្តស្វាយរៀង អ្នកស្រី សួស ធារី បានឱ្យដឹង នៅសាលារៀនក្នុងឃុំអ្នកស្រី មានបង្គន់អានាម័យតែបីប៉ុណ្ណោះ ខណៈសិស្សមានជិតមួយពាន់នាក់។ បង្គន់អនាម័យតែបីបន្ទប់នេះ មិនទាន់គ្រប់គ្រាន់សម្រាប់ការប្រើប្រាស់របស់សិស្សឡើយ ។
អ្នកស្រីអំពាវនាវដល់សប្បុរសជន និងរដ្ឋាភិបាល ជួយផ្តល់ថវិកាក្នុងការសាងសង់បង្គន់អនាម័យបន្ថែមទៀត ដើម្បីបំពេញតម្រូវការសិស្សនោះទីនោះ។
បញ្ហាអត់បង្គន់អនាម័យ នាំឱ្យកើតជំងឺឆ្លងតាមលាមក ដូចជាជំងឺអាសន្នរោគ ជំងឺរាគរួសជាដើម។
ជាមួយគ្នានេះ បញ្ហាអត់បង្គន់នៅតាមសាលារៀននេះ ក៏ជាមូលហេតុមួយបណ្តាលឱ្យសិស្សស្រី អាត្រាបោះបង់ការសិក្សាផងដែរ។
តាមក្រសួងអភិវឌ្ឍជនបទ នៅឆ្នាំ២០២៥ ក្រសួងនឹងជំរុញយ៉ាងណា ដើម្បីសម្រេចឱ្យការប្រើប្រាស់បង្គន់អនាម័យបាន១០០% ដោយត្រូវធ្វើឱ្យបានកំនើន៤៤០បង្គន់ក្នុងមួយសប្តាហ៍ ហើយរៀងរាល់សប្តាហ៍មានយ៉ាងហោចណាស់៣ឃុំសម្រេចបានអនាម័យ១០០%៕