ភ្នំពេញ ៖ អាជ្ញាធររាជធានីភ្នំពេញ អះអាងពីការធានាសន្ដិសុខសុវត្ថិភាពជូនពលរដ្ឋ ក្នុងឱកាសព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក ដែលនឹងចាប់ផ្ដើមនៅដើមខែវិច្ឆិកា ឆ្នាំ២០១៧ខាងមុខនេះ។ ក្រៅពីការរក្សាសន្ដិសុខ សាលារាជធានីបានឲ្យដឹងថា បង្គន់សាធារណៈជាង ៤៦០ នឹងដាក់ឲ្យពលរដ្ឋប្រើប្រាស់ផងដែរ។
ព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក សម្រាប់ឆ្នាំ២០១៧នេះ នឹងចាប់ផ្ដើមពីថ្ងៃទី០២ ដល់ថ្ងៃទី០៤ ខែវិច្ឆិកា។ រយៈពេលបីថ្ងៃនេះសាលារាជធានីភ្នំពេញ អះអាងថា អាជ្ញាធរបានត្រៀមរួចជាស្រេច នូវកងកម្លាំង ដើម្បីរក្សាសន្ដិសុខ ជូនប្រជាពលរដ្ឋដែលមកចូលរួមក្នុងព្រះរាជពិធីបុណ្យនេះ។
លោក ម៉េត មាសភក្ដី អ្នកនាំពាក្យសាលារាជធានីភ្នំពេញ បានប្រាប់វិទ្យុស្ដ្រីនៅថ្ងៃទី២៤ ខែតុលា នេះថា សាលារាជធានីភ្នំពេញ រំពឹងថា រយៈពេលបីថ្ងៃក្នុងព្រះរាជពិធីបុណ្យអុំទូក នឹងមានពលរដ្ឋចូលរួមច្រើន ព្រោះតែពិធីនេះគឺខុសពីពិធីបុណ្យជាតិផ្សេងៗ ដែលពលរដ្ឋតែងតែចាកចេញពីរាជធានី ឬខេត្ដ ទៅតាមបណ្ដាខេត្ដនានា។ រហូតមកដល់ថ្ងៃនេះ សាលារាជធានីភ្នំពេញបានរៀបចំរួចហើយ នូវកងកម្លាំងរក្សាសន្ដិសុខជួនពលរដ្ឋ។ លោក ម៉េត មាសភក្ដី ៖«សូមឲ្យសាធារណៈជន ក៏ដូចជាបងប្អូនប្រជាពលរដ្ឋរបស់យើងទុកចិត្ដ (ព្រោះគណៈអភិបាលរាជធានីភ្នំពេញយើងបាន) គិតគូអំពីបញ្ហានេះរួចរាល់ហើយសម្រាប់បងប្អូនរបស់យើង»។
ក្រៅពីការត្រៀមកងកម្លាំងរក្សាសន្ដិសុខ សាលារាជធានីភ្នំពេញក៏បានរៀបចំរួចហើយដែរ នូវការដាក់បន្ថែមធុង និងកញ្ឆេ ដើម្បីដាក់សំរាម ប្រមាណជាង ២ពាន់ ក្នុងខណ្ឌសំខាន់ៗចំនួន ៥ រួមមាន ខណ្ឌដូនពេញ ខណ្ឌចំការមន ខណ្ឌ ៧មករា ខណ្ឌទួលគោក និងខណ្ឌជ្រោយចង្វារ។
បន្ថែមពីនេះលោក ឲ្យដឹងទៀតថា សាលារាជធានីភ្នំពេញក៏បានរៀបចំបង្គន់អនាម័យជាង ៤៦០ ដើម្បីសម្រួលដល់ប្រជាពលរដ្ឋដែលមកទស្សនាក្នុងព្រះរាជពិធីបុណ្យអុំទូកឆ្នាំនេះ។ លោក ម៉េត មាសភក្ដី ៖«ទាំងបង្គន់ ចល័ត ទាំងបង្គន់អចល័ត យើងបានរៀបចំនៅគោលដៅធំៗប្រមាណជាង ២០ ជិត ៣០ ហើយក្នុងហ្នឹងមានបង្គន់ប្រមាណជាង ៤៦០ បង្គន់»។
យ៉ាងណាអ្នកនាំពាក្យសាលារាជធានីភ្នំពេញ សង្ឃឹមថា ពលរដ្ឋដែលចូលរួមពិធីបុណ្យអុំទូកនេះ នឹងចូលរួមទាំងអស់គ្នាក្នុងការរក្សាអនាម័យ ក្រោយពេលបរិភោគចំណីអាហារ រួច នឹងដាក់សំរាមចូលក្នុងធុង ឬកញ្ឆេ ដើម្បីសម្រួលដល់ក្រុមសំអាត ដែលមិនបានឈប់នាឱកាសពិធីបុណ្យជាតិនេះ។
ព្រះរាជពិធីបុណ្យអុំទូកឆ្នាំ ២០១៧នេះ ស្ថានភាពទឹកគឺមានលក្ខណៈល្អប្រសើរជាងបណ្ដាឆ្នាំកន្លងទៅ នេះបើយោងតាមការឲ្យពីអ្នកនាំពាក្យក្រសួងធនធានទឹក។
លោក ចាន់ យុត្ថា អ្នកនាំពាក្យក្រសួងធនធានទឹក មានប្រសាសន៍ថា យោតាមការព្យាករណ៍ ក្នុងឱកាសព្រះរាជពិធីបុណ្យបុណ្យអុំទូកខាងមុខ ស្ថានភាពទឹកទន្លេ គឺមានលក្ខណៈល្អប្រសើរជាងឆ្នាំមុនៗ ដែលមិនបង្កជាការរាំងស្ទះដល់ដំណើរការប្រារព្ធពិធីនេះឡើយ បើទោះបីជានឹងមានភ្លៀងធ្លាក់ខ្លះៗក្ដី។ លោក ចាន់ យុត្ថា ៖«ទាក់ទងជាមួយពិធីបុណ្យទឹកនៅស្ថានីយ៍ចតុមុក កន្លែងប្រារព្ធពិធីមានស្ថានភាពល្អប្រសើរជាងបណ្ដាឆ្នាំកន្លងទៅ តាមការព្យាករណ៍គឺទឹកអាចមានកម្ពស់ក្នុងរង្វង់ពី ៧ម៉ែត្រ ១៥ ទៅ ៧ម៉ែត្រ ២០ បានន័យថា ខ្ពស់ជាង ៧ម៉ែត្រ បន្ដិចបន្ដួច»។
កម្ពុជា ធ្លាប់បានផ្អាកការរៀបចំព្រះរាជពិធីបុណ្យអុំទូករយៈពេល ៣ឆ្នាំជាប់ៗគ្នា កាលពីឆ្នាំ២០១១ ដល់ឆ្នាំ២០១៣។ កាលពីឆ្នាំ ២០១១ កម្ពុជាផ្អាកព្រះរាជពិធីបុណ្យអុំទូក ដោយសារតែទឹកធំ ជន់លិចស្ទើរគ្រប់បណ្តាខេត្ត ខណៈឆ្នាំ២០១២ ប្រទេសកម្ពុជា ត្រូវកាន់ទុក្ខថ្វាយអតីតព្រះមហាក្សត្រ សម្តេច នរោត្ដម សីហនុ ព្រះមហាវីរក្សត្រ ខ្មែរ ដែលទ្រង់សោយទិវង្គត ចំណែកឆ្នាំ២០១៣ ការផ្អាកព្រះរាជពិធីបុណ្យអុំទូក ព្រោះតែស្ថានភាពនយោបាយ នៅមានភាពវឹកវរ ក្រោយការបោះឆ្នោត៕