ភ្នំពេញ ៖ តំណាងរដ្ឋាភិបាលស៊ុយអ៊ែតបានអះអាងថា ខ្លួននឹងពិចារណាឡើងវិញអំពីទំនាក់ទំនងជាមួយកម្ពុជា ប្រសិបើគណបក្សប្រឆាំងដ៏ធំមួយត្រូវបានរំលាយ។ តែមន្ដ្រីបក្សកាន់អំណាចចាត់ទុកថា ការលើកឡើងរបស់ស៊ុយអ៊ែតដូចនេះ គឺកំពុងតែឈ្លានពានលើអធិបតេយ្យភាពកម្ពុជា។ លោក លៀ ស៊ីណា រាយការណ៍ ៖
ការអនុវត្ដលទ្ធិប្រជាធិបតេយ្យ និងស្ថានការណ៍នយោបាយនៅកម្ពុជា រយៈពេលចុងក្រោយនេះ ដែលគេថាកំពុងឡើងកំដៅយ៉ាងខ្លាំងនោះ នៅថ្ងៃនេះតំណាងរដ្ឋាភិបាលស៊ុយអ៊ែតមកធ្វើទស្សនកិច្ចនៅកម្ពុជាបានបង្ហាញក្ដីព្រួយបារម្ភជាខ្លាំង ដោយធ្វើការព្រមានថា ប្រសិនបើគណបក្សសង្គ្រោះជាតិត្រូវបានរំលាយ គឺស៊ុយអ៊ែតនឹងពិនិត្យមើលសហប្រតិបត្តិការទ្វេភាគីជាមួយកម្ពុជាឡើងវិញ។
លោកស្រី Annika Ben David ឯកអគ្គរាជទូតស៊ុយអ៊ែតទទួលបន្ទុកសិទ្ធិមនុស្សដែលមកបំពេញទស្សនកិច្ចនៅកម្ពុជា បានថ្លែងដូចនេះ នៅក្នុងសន្និសីទសារព័ត៌មាននៅទីក្រុងភ្នំពេញ នាថ្ងៃទី១៩ ខែតុលា ឆ្នាំ២០១៧។
លោកស្រីមានប្រសាសន៍ថា ការមកដល់កម្ពុជារបស់លោកស្រីនាពេលនេះ គឺដើម្បីជួបជាមួយរដ្ឋាភិបាលបំណងនិយាយអំពីដំណើរលទ្ធិប្រជាធិបតេយ្យ ការគោរពសិទ្ធិមនុស្ស និងការបើកចំហសិទ្ធិសេរីភាពសម្រាប់គណបក្សប្រឆាំង។ ឯកអគ្គរាជទូតស៊ុយអ៊ែតទទួលបន្ទុកសិទ្ធិមនុស្សរូបនេះ មានប្រសាសន៍ថា ស្ថានការណ៍កម្ពុជារយៈពេលចុងក្រោយនេះគឺជាក្ដីបារម្ភយ៉ាងខ្លាំងរបស់រដ្ឋាភិបាលស៊ុយអ៊ែត។ លោកស្រីអះអាងថា រដ្ឋាភិបាលស៊ុយអ៊ែតនឹងពិចារណាឡើងវិញអំពីទំនាក់ជាមួយកម្ពុជា ប្រសិនបើគណបក្សប្រឆាំងដ៏ធំមួយត្រូវបានរំលាយ។ លោក Annika Ben David ៖«អ្វីដែលខ្ញុំចង់និយាយគឺថា ប្រសិនបើគណបក្សប្រឆាំងដ៏ធំមួយត្រូវបានរំលាយ យើងថា គណបក្សសង្គ្រោះជាតិអញ្ចឹង អញ្ចឹងយើងអាចថា ដំណើរហ្នឹងវាមិនត្រូវទេ ឆ្ពោះទៅកាន់ទិសដៅមួយដែលខុសហើយ សម្រាប់ដំណើរការលទ្ធិប្រជាធិបតេយ្យ អញ្ចឹងហើយជាចំណុចមួយដែលយើងត្រូវគិតគូពិចារណាដើម្បីយើងយកមកវិភាគ ថាតើយើងនឹងរៀបចំការទំនាក់ជាងមួយនិងប្រទេសកម្ពុជាយ៉ាងម៉េច»។
យ៉ាងនេះក្ដីលោកស្រី Annika Ben David បង្ហាញក្ដីសង្ឃឹមថា រដ្ឋាភិបាលកម្ពុជាកម្ពុជានឹងធ្វើឲ្យស្ថានការណ៍នយោបាយ និងលទ្ធិប្រជាធិបតេយ្យ ក៏ដូចជាការគោរពសិទ្ធិមនុស្សវិលត្រឡប់មករកសភាពដើមវិញ។
តែយ៉ាងណាក៏ដោយ មន្ដ្រីជាន់ខ្ពស់រាជរដ្ឋាភិបាលកម្ពុជា មិនទទួលយកការរិះគន់នេះទេ ដោយចាត់ទុកការលើកឡើងរបស់លោកស្រីឯកអគ្គរាជទូតស៊ុយអ៊ែតទទួលបន្ទុកសិទ្ធិមនុស្ស ដែលមកបំពេញទស្សនកិច្ចនៅកម្ពុជានេះ ថាកំពុងឈ្លានពានអធិបតេយ្យភាពកម្ពុជា។
លោក ផៃ ស៊ីផាន អ្នកនាំពាក្យទីស្ដីការគណៈរដ្ឋមន្ដ្រី បានប្រាប់វិទ្យុស្ដ្រីថា រដ្ឋាភិបាលមិនទទួលយកការលើកឡើងនេះទេ ដោយលោកសង្កត់ធ្ងន់ថា អ្វីដែលស៊ុយអ៊ែតមើលឃើញគឺមិនឆ្លុះបញ្ចាំងពីការពិតនៅកម្ពុជា។ លោកបន្ដថា ក្នុងនាមរដ្ឋាភិបាល គឺមិនទទួលយកការលើកឡើងរបស់ស៊ុយអ៊ែតជាដាច់ខាត។ លោក ផៃ ស៊ីផាន ៖«ការលើកឡើងហ្នឹងយើងមិនអាចទទួលស្គាល់ទេក្នុងនាមរដ្ឋាភិបាល គឺកំពុងតែឈ្លានពានអធិបតេយ្យរបស់កម្ពុជាហើយ»។
ជាមួយគ្នានេះអ្នកនាំពាក្យទីស្ដីការគណៈរដ្ឋមន្ដ្រី នៅតែអះអាងពីភាពត្រឹមត្រូវនៃការអនុវត្ដច្បាប់របស់កម្ពុជា ក្នុងការចាប់ខ្លួនលោក កឹម សុខា ប្រធានគណបក្សសង្គ្រោះជាតិ ពីបទក្បត់ជាតិ និងការប្ដឹងរំលាយបក្សនេះដោយសារតែបានប្រព្រឹត្ដិបទល្មើសជាប្រព័ន្ធ។
គួរកត់សំគាល់ថា មិនមែនមានតែប្រទេស ស៊ុយអ៊ែត មួយទេ ដែលសម្ដែងក្ដីព្រួយបារម្ភពីការអនុវត្ដលទ្ធិប្រជាធិបតេយ្យ និងការគោរពសិទ្ធិមនុស្សនៅកម្ពុជា គឺកាលពីពេលថ្មីៗនេះ សហរដ្ឋអាមេរិក អូស្ដ្រាលី សហភាពអ៊ឺរ៉ុប និងសភាអាស៊ាន សុទ្ធតែបានបង្ហាញក្ដីព្រួយបារម្ភពីការអនុវត្ដលទ្ធិប្រជាធិបតេយ្យនៅកម្ពុជា ដែលបានទាមទារឲ្យរដ្ឋាភិបាល ដែលដឹកនាំដោយគណបក្សប្រជាជនកម្ពុជា ធ្វើឲ្យស្ថានការណ៍តានតឹងនាពេលបច្ចុប្បន្ននេះវិលត្រឡប់មករកសភាពដើមវិញ៕
